1Milyeŋge 13 - Bible en Guidar

¹ Ɗəf na Maŋgəlva adek sə Yuda a Betel dəka əpel na Yawe gala Yerobo'am adawzla tursan aka matuya.

² Dəka əpel na Yawe, aŋgəslək vaŋvəl aka matuya, amna: «Matuya! Matuya! An Yawe anah yaŋka: Wiyin yaŋ muwan səddəv zev Davit, iya nan na, Yosiyas. Wataw wəlet məsdəlveŋgə na gəleɗe-nettuyeŋge məzuzlaŋ tursan akokəŋ akoko; gəm wazla sleŋsleŋɗe na ɗəf titir akoko.»

³ Məskəleŋ agəɗək tetele pay dəpas dawnəh na: «Tetele narban na Yawe dəpeliŋ yaŋka, matuya wapɗakə, moŋglo nakan waggbo'u.»

⁴ Səza məlĩ aprəm əpel na ɗəf na Maŋgəlva aka matuya na Betel dayadaya naka, Yerobo'am van təl dəka matuya, amna: «Mərma!» Yaŋ van atəl azan nak amtə soku, dəɓap əktəmən azan ɓa.

⁵ Matuya nak pəɗakə yaŋ moŋglo azirif va tetele məs ɗəf na Maŋgəlva anah aka əpel na Yawe naka.

⁶ Yaŋ məlĩ nak azlani anah sən ɗəf na Maŋgəlva amna: «Kamə azzayan makra Yawe Maŋgəlva noko, akkam ambawa, vawəŋ dəktəmgən azawa.» Ɗəf na Maŋgəlva azzayanək makra Yawe, va məlĩ nak aktəmək azani; akkpaŋgək va asan lahəŋka.

⁷ Yaŋ məlĩ anah sən ɗəf na Maŋgəlva nak na: «Atoŋ anawda kəzəmgəni, nəpsukgən zəga na makaryam.»

⁸ Ɗəf na Maŋgəlva nak anah sən məlĩ na: «Va wakəpsu wərasl na gəla nok dayday na, nətoŋ na anokda ɓa, nəzəm na way ɓa, nəsə na iŋkile a təkiyəŋ ɓa.

⁹ Vi Yawe aɗi su wən nan vaŋ dawnəh na: Kədawzəm ɓa, kədawsa iŋkile ɓa, kədamndok dəka tive an kəmbat ɓa.»

¹⁰ Agəmək tive mbərən, dəmndan dəka tive məs ade dəkan a Betel ɓa.

Məskəleŋ tay əggbak ma

¹¹ Məskəleŋ mazza tay taka də gəla a Betel adaka: wətən aze aboton sən afən an ɗəf na Maŋgəlva agəɗ a Betel dəpaska gəm əpel an anah sən məlyã.

¹² Afən aɓsən na: «Tive mawan agəm di?» Wətən awlak tive an ɗəf na Maŋgəlva dəde sə Yuda nak ambatə.

¹³ Yaŋ anah sən wətən na: «Aynan su mazaŋga na koro naw ɗa!» Aynan sənəka, ndən peŋ akani.

¹⁴ Azbanək ɗəf na Maŋgəlva nak gap ruf ərufun, tay ɗewwe ammba wəlaŋga metiŋgini. Aɓsən na: «Istə ɗəf na Maŋgəlva kəde sə Yudaŋ sa?» Azlan sən na: «Intə!»

¹⁵ Aɓsən na: «Dam anawda kəzəmgən waya.»

¹⁶ Yaŋ ɗəf na Maŋgəlva nak azlan na: «Nəɓap na kawmilyãw də is ɓa, nəmbat na də is ɓa; nəzəm na way gəm nəsə na iŋkile də is a təkiyəŋ ɓa,

¹⁷ vi əpel an Yawe anah su yaŋka: kədawzəm way ɓa, kədawsa iŋkile adak ɓa, kədamndok dəka tive an kəmbat ɓa.»

¹⁸ Yaŋ anah sən na: «Məskəleŋ nan va isi, maslay dəpel su əpel na Yawe dawnəh na: Amilgən anokda; dəzəmgən waya, gəm dəsəgən iŋkile.» Wən awə səni.

¹⁹ Amilik dəndəni, way namnam ananda gəm iŋkile rəhə.

²⁰ Aka tahəŋ ɗewɗew əzəmaŋgə, əpel na Yawe ade sən məskəleŋ məs dəmndagan naka;

²¹ yaŋ aya ɗəf na Maŋgəlva dəde sə Yuda naka, anah sən na: «An Yawe anah yaŋka: Adan kəggbak ma Yawe, kərma əpel an Yawe Maŋgəlva nok aɗi suk wən nanəŋ ɓa,

²² kəmilike, kəzəm waya gəm kəsə iŋkile a təki məs anoh suk na: “Kədawzəm way ɓa, kədawsa iŋkile ɓaŋ na,” ki gəbayuk atoŋ na addəv magamas net afiŋgiɗuk ɓa.»

²³ Adan ɗəf na Maŋgəlva nak azəmə, asə, məskəleŋ mazza nak aynan sən mazaŋga na koro na ɗəf na Maŋgəlva amə'gən naka,

²⁴ yaŋ ɗəf nak al əlma də ɓoolu aka tive, ndən bay əbayni. Kigəbayən aka tive ɓulohu, koro ziw də maŋgava gəbay nak dahã, ɓoolu tam ziw dahã.

²⁵ Ɗiy məzutoŋgoŋ awlanən kigəbay ɗəf frikke aka tive, ɓoolu ziwwe a maŋgava kigəbayni. Azzoŋ ənahaŋ a walaŋgəla-metiŋ an məskəleŋ mazza asan naka.

²⁶ Məskəleŋ dəmilgin səka tive nak aprəm wən nani, amna: «Ɗəf na Maŋgəlva dəɓoŋ sən əpel na Yawe naki yi! Yawe appan sən ɓoolu abakani, abay va əpel na Yawe anah səni.»

²⁷ Anah sit kirtin na: «Miynan su mazaŋga na koro nawa!» Aynan sənəni,

²⁸ ndən teki; arəh kigəbayən firikke aka tive, koro də ɓoolu tahəŋ ziwziw a maŋgavani. Ɓoolu dəmpər kigəbayən ɓa, dəbay koro ɓa.

²⁹ Məskəleŋ mazza nak agəm kigəbay ɗəf na Maŋgəlva naka, akrək aka koro nani, aki a walaŋgəla-metiŋ kawhəm kigəbayən də wəndəkni.

³⁰ Avoŋgənək addəv magamas nani, məɗɗay gəlabayni: «Aw, məlmu nawa!»

³¹ Dərɓaga andəka, anah sit kirtin na: «Pay nədamta, kəndəkwəngən a magamas na ɗəf na Maŋgəlvaŋka. Kəziyningən sleŋsleŋɗe naw a maŋgavet en nani.

³² Vi əpel na Yawe apel aka matuya na Betel, aket gəleɗe-nettuyeŋge net walaŋgəleɗe gugriɗ na Samari pak waknahə.»

³³ Də as pak, Yerobo'am dəppan tive nan mbəraynəŋ ɓa. Ndən təŋ ənde ɗiy ka məsdəlveŋge net gəleɗe-nettuyeŋge sə weleŋgit ɗiy-ɗarə. Ɗəf an dəŋgəl nawsan məsdələv pak əpsən zəga, asna ndən əɗiyən məsdələv net gəleɗe-nettuyeŋge.

³⁴ Aski mambray na gəla na Yerobo'am, sən wən nani yi, məzan gəla nan kakãh səka dəlvafuŋ.