1Milyeŋge 12 - Bible en Guidar

Uɗak na məlyã ( 12:1—22:53 ) Əɓoŋ net mahəlfaɗe na tapaslay pay na kəla disiŋ 12:1—14:20 Wəkkal na Sikem

¹ Robo'am alək a Sikem, vi a Sikemi yi mə Israyelɗe pak akkalaŋ vi kawɗiyən aka məlyã.

² Adan Yerobo'am wətən Nebat, aprəm na, tay a Eziptə a təki anzan sən məlĩ Salomoŋ tagay, a Eziptə asan də gəla.

³ Ndəɗaŋ slən əyanəni, yas Yerobo'am ade də əsap net ɗiy na Israyel pakə; aɓsənən Robo'am na:

⁴ «Afuk atatwahãnək wəza akamə: ya nok kakaŋ na, akaftakan səm tatwãh na balam afuk aɗi akaməŋka, məgəɗ sukgən wəza.»

⁵ Yaŋ aɓsit na: «Məddoŋ tagay, kəmilyoŋgən azaw addəv əvoŋ hoku.» Yaŋ ɗiy ambataŋgə.

⁶ Robo'am assõh əbbah azet ɗiy məsɓet en dəssoŋ də Salomoŋ afən lahəŋ pay asan egge: «Də wənəh na mbar kənahaŋ nawzlan sit ɗiyiŋ di?»

⁷ Apeleŋ sənən aɓɗaŋ na: «An dəpaŋ kəɗiyək zuk məgəɗ sit wəza sit ɗiyiŋki, an is tat əgəɗ sit wəza, is tat əzlan siti gəm əpel sit wən neneke, asna wassoŋ ka məɗɗaŋ wəza nok faɗə.»

⁸ Yaŋ appan əbbah net ɗiy məsɓet naka, assõh əbbah avet kirin en dəɓayaŋ dəndən en naka wəza nani.

⁹ Aɓsit na: «Mbar kənahaŋ nawzlan sit ɗiyiŋ dənah suwən na: “Akaftakan səm wəza tatwãh afuk aɗi gəres akaməŋkaŋ di?”»

¹⁰ Gewleɗ dəɓayaŋ dəndən nek apeleŋ sənən dawnəh na: An kədawnah sit ɗiyiŋ məs dəpeleŋ sukun dawnəh na: Afuk atatwãhanək wəza namə, nok akaftakan səm səkaməŋ na, yaŋka: kəpel sitigin na: Pərəŋ vaw na dime ɓiɓirzliki yi day ki gize əbba;

¹¹ təŋ dəpaŋka, adan afu akrək sukumək wəza tatwãha, naw wanəgagdakan sukum azani; də ɗoŋgroŋ na zumi yi afu azga' sukumu, ya naw dit hərziyeɗ nədazga' sukum!

¹² Yaŋ Yerobo'am dit ɗiy pak azzoŋ aza Robo'am aka pay mahoko'o va məlĩ apel dawnəh na: Kəmilyoŋgən addəv əvoŋ hoku naka.

¹³ Yaŋ məlĩ azlan sit ɗiy nek də wəlan na ŋgboro: əpel net ɗiy məsɓet apeleŋ sənən nak firik azgani,

¹⁴ anah sit ɗiy nek va gewleɗ nek anahaŋ sənən na: «afu akrək sukumək wəza tatwãha, naw wanəgagdakan sukum azani; də ɗoŋgroŋ na zumi yi afu azga' sukum, ya naw dit hərziyeɗ nədazga' sukum!»

¹⁵ Məlĩ dəprəm met ɗiy ɓa, vi wən nan səza Yawe asili, vi naknəh an Yawe van apel sən Yerobo'am wətən Nebat, də ma məskəleŋ Ahiyya na Silo.

Məlĩ awɗakka

¹⁶ Mə Israyelɗe dəwənnet awlanənək na, məlĩ dəprəm met ɓa; yaŋ amndagan sənən əpel sən məlĩ dawnəh na: «Miy dəsapam də Davit di? Zəga tay an dəsapam də wətən Yesse ɓa! Mədam anamda Israyel; Kakaŋ na, is də gəla noko Davit.» Mə Israyelɗe mbat anetda.

¹⁷ Mə Israyelɗe naddəvit walaŋgəleɗe na Yuda kaka', Robo'am azəm məlĩ aketi.

¹⁸ Məlĩ Robo'am aslənək Adoram, daya na wəza na vavyakə, yas mə Israyelɗe beymet askanən dit gərmeŋge amtə; məlĩ Robo'am akõh əpeŋ aka mawta nan anzan a Yerusalem.

¹⁹ Mə Israyelɗe aɓoŋgoŋguk aka zev Davit; hã gap va pay dəpaŋka.

²⁰ Adan mə Israyelɗe aprəmən na, Yerobo'am amilke, ndəɗaŋ slən iyan addəv əkkala, yas aɗiynən məlĩ aka Israyel baymani; mahəlfa tay ammba gəla na Davit abbər mahəlfa na Yuda takərgən ɓa.

²¹ Yaŋ Robo'am ade a Yerusalem akkalan gəla na Yuda baymani də mahəlfa na Benyamin, məwele nalpa aɗɗaŋgək gabal səkat də kaklaw dodopoɗo, kadawgay dit mə Israyelɗe, kamndagan məlĩ sən Robo'am, wətən Salomoŋ.

²² Yaŋ əpel na Maŋgəlva ade sən məskəleŋ Semaya dawnəh na:

²³ «Apel sən Robo'am wətən Salomoŋ, məlĩ na Yuda dit ɗiy na Yuda pak gəm sit mə Benyamin də madembirgit ɗiyi, anah sit na:

²⁴ Vaŋ Yawe anahə: “Kədaddoŋ əgay dit milmiŋgiɗkum mə Israyelɗe ɓa; naway pak dəmil eŋgil ananda, vi wənəs səzaw asili.”» Aprəmənək ma Yawe, amndoŋguk vi kazban va əpel na Yawe.

²⁵ Yerobo'am arkak walaŋgəla-metiŋ na Sikem aweleŋgit gərəmeŋge na Efrayim, asan adaka. Agil sədak əmpa al arka Penuwel.

Mambray na Yerobo'am

²⁶ Yerobo'am aɗɗum a makran na: «Zəgaŋ na məlĩ wamndan avet kirtin Daviti.

²⁷ An ɗiyiŋ tahəŋ əzbanən ədawzaɓ-Maŋgəlva addəv Gəla na Yawe a Yerusalem na, mekret wakkpaŋ aza daya net Robo'am, məlĩ na Yuda; vasna wabaywəni, wakkpaŋgaŋ ammba va Robo'am məlĩ na Yuda.»

²⁸ Məlĩ arahək əɗɗum mbərən, avotuk kirit wasliɗe mezeŋgleket na meleŋge sula, yaŋ aɓsit ɗiy na: «Ədda nokum a Yerusaleməŋ məki; meŋgilveɗ nok yeŋ məs dəgilgukun səka dələv na Eziptə Israyel.»

²⁹ Ndən ta' taka a Betel, ndən ta' maɓɓan a Dan,

³⁰ Zəgaski dəsan mambraya. Ɗiy rimiɗ rimiɗ dəddoŋ abat wət wasliyək maɓɓat hã gap a Dan.

³¹ Yaŋ arkə gəla sit tuyeŋge, aɗi məsdəlveŋge səret ɗiy, məza zev levi ɓa.

³² Yerobo'am aɗɗak wəzləra aka təla madodopoɗon də əvoŋ makəlaw kiyən masle'en va wəzləra adaɗɗa a Yuda ɗayɗayə. Ateŋ a matuya naka. Vaski agəɗ a Betel, azaɓ-Maŋgəlva sit kirit wasliɗe avot neki. Aɗi məsdəlveŋge na gəleɗe-nettuyeŋge məs arkə a Betel naka.

Mətakni əɗi ki Maŋgəlva a Betel

³³ Apeŋ a matuya arkə a Betel nak də wəvoŋ kəlaw kiyən sle' na təla madodopoɗoni, əvoŋ an aɗi na kini! Agəɗək wəzləra viyit mə Israyelɗe, ndən peŋ a matuya kawzla tursan.