1Milyeŋge 11 - Bible en Guidar

Va Salomoŋ aggbak ma Maŋgəlva

¹ Məlĩ Salomoŋ akayək gil na guw diyɗa: mbəksa wətən Farawən əmpa na, mə Mo'abɗe, mə Ammonɗe, mə Edomɗe, mə Sidonɗe gəm mə Hitɗe.

² Gilis pak səka guw temtem məs Yawe anah sit mə Israyelɗe na: «Kədawtoŋgoŋ aweleŋgit ɓa, adawtoŋgoŋ awalaŋkum ɓa, vas ɓa na, wakkpaŋgakumən azet meŋgilveɗ neti.» Salomoŋ asap azet na sən əŋgla gil nanəŋki.

³ Akayək kirtit milyeŋge ka gil nan səkat buhulu gəm gəreŋgiɗin səkat hoku. Gil nan akkpaŋganənək makrani.

⁴ Aza wəgal na Salomoŋ, gil nan akkpaŋganənək makran dəzet meŋgilveɗ meɓɓeti; makran tay aka Yawe Maŋgəlva nan təstəs va makra Davit afən ɓa.

⁵ Salomoŋ azbetik may Astera, maŋgəlvak net mə Sidonɗe, gəm Milkom, zəga narba wil net mə Ammonɗe.

⁶ Salomoŋ agəɗək mbərayən ama hara Yawe, azban Yawe lewlew va Davit afən ɓa.

⁷ Yaŋ Salomoŋ arkə gəlamatuya aka mossorgo aba Yerusalem sən Kemos, zəga narba wil na Mo'ab, gəm sən Molek, zəga narba wil net mə Ammonɗe.

⁸ Vaski agəɗ ammbet meŋgilveɗ net gil nan na guwiŋ pakə: tay əzlaŋ tursan də əzaɓaŋ-Maŋgəlva sit meŋgilveɗ neti.

⁹ Gədəv Yawe adək aka Salomoŋ, vi makran akkpaŋgaŋgək səka Yawe Maŋgəlva na Israyel məs dərban zən təl sula

¹⁰ məs dəɗi sən wən nan na, kədazbet meŋgilveɗ mbərit ɓa; yas dərma an Yawe aɗi sən wən nanəŋ ɓa.

¹¹ Yawe anah sən Salomoŋ na: «Adan vas kənani, kərma wənmiyna naw də mahenziŋ naw nəɗi sukuŋ ɓa, uɗak nədawɗakan məlĩ səkoko, wanəpsən gawla noko.

¹² Ya dorok egge nədaɗɗan ɓa hara, vi afuk Davit; səva wutuk nədawɗakani.

¹³ Wanətaf məlĩ van pak ɓa hara; mahəlfa tay taka nədapsən wətuk ammba Davit gawla nawa gəm vi Yerusalem an nəweli.»

Məzuseɓɗe na Salomoŋ

¹⁴ Yawe asilgənək məzuseɓ na Salomoŋ: Mə Edom, adawyaŋ na Hadad, gabba məlĩ na Edom.

¹⁵ Wən nan agəɗ na, gala Davit agay də Edom. Pay Yo'ab, daya net məzəlpaŋ ambat əndək kigəbeyit məzəlpaŋ na Israyel yaŋ abey zel sə Edom pakə.

¹⁶ Vi Yo'ab dit ɗiy na Israyel pak assoŋguk adak təla sləre hã gap abeynin zəl sə Edom gərakə.

¹⁷ Hadad anzanək dit mə Edomɗe məɗɗaŋ wəza na afəni, addoŋ a Eziptə; Hadad slawraŋga yi.

¹⁸ Sə Madiyan addoŋ a Paran, akəɗɓilinin ɗiy sə Paran ammbeti addoŋ a Eziptə aza Farawən məlĩ na Eziptə. Apsən gəla sən Hadad, amna wazəmgəni gəm arslə sən təkiya.

¹⁹ Hadad arahək ki nenek diyɗa aza Farawən, apsəntək mesini, məlmət Tapanes, ma'ãyə̃k nani.

²⁰ Məlmət Tapanes nak tuwə sənək wiyna, alvan na, Genubat, Tapanes təzgələk ana Farawən da; dit kirtin məlĩ sap Genubat aɓayə.

²¹ Sə Eziptə nak na, Hadad aprəm əmta na Davit, Yo'ab daya net məzəlpaŋ amtəka'e. Hadad anah sən Farawən na: «Appaw nəmbatə, ndawgən aka dələv nawa.»

²² Farawən anah sən na: «Miy dəkkpap suk sənawda aŋ hara kəsilgən girzik, nawmbat aka dələv nokuŋ di?» «Tay ɓa, appaw nəmbat kaka'ə.»

²³ Maŋgəlva asilgənək məzuseɓ na Salomoŋ maɓɓani: Rezon, wətən Elyada. Səna daya nan Hadadezer da, məlĩ na Soba anzani.

²⁴ Akkeletik ɗiy azani, akkpaŋgək daya net məɓoŋti. Pay lahəŋ Davit adawbeyiti, addoŋ a Damasə, assoŋ azəmaŋ məlĩ aka Damas.

²⁵ Rezon asanək məzuseɓ net mə Israyelɗe hã ənziya egge na Salomoŋ gərakə. Mbərayən an Hadad agəɗ na: azelenək Israyel, azəmək məlĩ aka Aramə.

Əɓoŋ na Yerobo'am

²⁶ Yerobo'am, wətən Nebat mə Efrayim na Sereda; iya nat man na, Seruwa, ga gəbaytə; məgəɗ wəza na Salomoŋ gi yi, yaŋ aɓoŋ aka məlyã.

²⁷ Gala Salomoŋ adarka təgbalka adawyaŋ na Millo, asukuk zlava na dələv na walaŋgəla-metiŋ na Davit afəni.

²⁸ Ɗəf Yerobo'am vani, gambaray yi; Salomoŋ awlak va asan gala adaɗɗa wəza azani; ndəni yi aɗi nawla wəza na vavyak aka gebbet kirtin Yosefi.

²⁹ Pay nani, adan Yerobo'am agil sə Yerusalem, məskəleŋ Ahiyya na Silo, aləm sənək aka tive; Ahiyya tay də lukut meleketen azani, ndəɗaŋ sula sula awra.

³⁰ Ahiyya armak lukut meleketen nazan naka, aŋgaranək petepete, kəlaw kiyən sula.

³¹ Yaŋ anah sən Yerobo'am na: «Agəm kəlawə, vi vaski Yawe, Maŋgəlva na Israyel anahə: Yaŋ in tat əmõh məlĩ səva Salomoŋ, kapsuk mahəlfaɗe kəlawə.

³² Mahəlfa taka adawrəh kaka'ə, vi gawla naw Davit gəm vi Yerusalem walaŋgəla nəwel sə weleŋgit mahəlfaɗe na Israyel pakə.

³³ Adan appawən appu'oŋ abat Astera, maŋgəlvak net mə Sidonɗe, aba Kemos, maŋgəlva na Mo'ab gəm aba Milkom, maŋgəlva net mə Ammonɗe, dədawaŋ aka tive naw ɓa, dəɗɗaŋ zəga təstəs ama haraw va mahenziŋ naw dit wəssərəkɗe naw va na Davit afən Salomoŋ ɓa.

³⁴ Səva Salomoŋ nədawmõhən ɓa hara, vi nəɗiyək ka məlĩ hã gap pay nanziya nan egge pakə, gəm vi məgəɗ wəza naw Davit, məs nəweli, məs dəzban wəsəɓ naw dit mahenziŋɗe naw pakə.

³⁵ Səva wətəni yi nədawmõh məlyã, kepsuk mahəlfaɗe net mə Israyelɗe kəlawə.

³⁶ Wanəpsən mahəlfa taka sən wətəni, vi zev gawla naw Davit, dəsangən aka məlĩ faɗ abaw a Yerusalem, walaŋgəla-metiŋ məs nəwel ka naw iya naw dəsangən adaka.

³⁷ Is zək noko, wanəgəmuk kəsokgən məlĩ a təki kəŋgəl nawsok pakə, wakəsok məlĩ aka Israyel.

³⁸ An kəprəmək məs nədawɗi suk wən nani, an kədawək aka tive nawa, an is tat əɗɗa zəga də tiven ama harawa, kərmek mahenziŋɗe naw gəm wəsəɓɗe naw va gawla naw Davit, asna wanəsaw də isi, wanəɗɗa zevuk dəsangən aka məlĩ va nəziwgən na Daviti; wanepsuk Israyel.

³⁹ Wanətoŋgən mahəlfa na Davit addəv tatwãha, ka faɗi ɓa hara.»

⁴⁰ Salomoŋ akayək tive nawbay Yerobo'am; Yerobo'am asil anzan a Eziptə aza Sisak məlĩ nadaka, asan adak hã gap əmta na Salomoŋ.

⁴¹ Madembirgit wəzeɗe na Salomoŋ, en agəɗ pak gəm maɗɗula nani, məvertiŋ addəv ɗerewel net wəzeɗe na Salomoŋ ɓa sa?

⁴² Payan məs Salomoŋ azəm məlĩ a Yerusalem, aka Israyel pak agəɗək əzva kaklaw poɗo.

⁴³ Salomoŋ amtəka, məndəkni yi, a walaŋgəla na Davit afəni. Robo'am, wətən dəgəm məlĩ a gəlani.