1Milyeŋge 1 - Bible en GuidarƏbay ma məlĩ na Davit ( 1:1—2:12 ) Adoniya man akawsan məlyã 1 Məlĩ Davit agalka, əzva nan kpototo diyɗa. An məsərəti zəga akan dayday na, attəman təki kəkãh ɓa. 2 Yaŋ gewleɗ nan anahaŋ sənən na: «Waməkay waŋ goruk ŋgbuɓɓo sən məlyã, təsatgən aka wəza nani, təzgəgən sləma akan gəm təvoŋgən aɓɓan ka zə daya nam məlĩ dəgəɗgən duhduhu.» 3 Aka va na Israyel pakə, akayaŋ waŋ goruk lalawək; yaŋ arahtən Abisag, mə Sunemkə, aki səntənən məlyã. 4 Waŋ goruk vat lalawəktə diyɗa sawɓa, ndət təkkpaŋ nazga sləma aka məlyã, məlĩ dəsənət ɓa hara. 5 Adoniya, wətət mə Hagitək, asili amna: Naw wanəsaw məlyã, agəɗək mawta nalpa sən kiyən dit pilseŋge, gəm ɗiy nanzoŋ də tilit kaklaw sle' abani. 6 Va muwani, afən dəhãyãn ɗah dawnəh na: «Vimi kədaɗɗa vaŋ di ɓa?» Gəm əmpa na, lelewi diyɗa, dərɓaga Absalom man tuwa. 7 Adoniya van azəmək meŋ də Yo'ab, wətət Seruya, gəm məsdələv Abiyatar, yaŋ azzoŋ askaŋ sənəni. 8 Ya məsdələv Sadok, Benaya wətən Yoyada, məskəleŋ Natan, Simey, Rey, ɗiy gambereɗ na Davit pak dəsapaŋ ammba Adoniya ɓa. Natan dət Batseba, məzbanən Salomoŋ 9 Yas Adoniya azi mbel dit timeŋgiɗi, wasliɗe gəm kirit wasliɗe məkirit go'o aza gərəm məlokoɗoko, məs na maŋgava En-Rogel, ayek milmiŋgiɗin pakgiti, kirtin məlĩ dit zel na Yuda naka wəza na məlĩ pakə. 10 Ya diya məskəleŋ Natan ɓa, Benaya ɓa, gambereɗ ɓa, diya Salomoŋ məlmən ɓa'a. 11 Yaŋ Natan aɓsət Betsabe, ma Salomoŋ na: «Kəprəm na, Adoniya wətət mə Hagit, akkpaŋgək ka məlĩ məza daya nam Davit dəsən akan ɓa ɓa sa? 12 Kamə, kakaŋ na, doko! Pepet nədapsuko: pepet nawkõhgən kiyuk də Salomoŋ wətuko. 13 Doko, atoŋ aza məlĩ Davit, kənah səngən na: “Istə daya naw məlĩ məs kəsway sət balamək nok dawnəh na: Salomoŋ wətuk dədawzəm məlĩ dərɓagawa, ndəni nawsan aka mazaŋga na məlĩ nawa ɓa sa? Ya vimi Adoniya asan məlĩ di?” 14 Aka kədassok əpel də məlĩ adak tagay na, naw pak wanətoŋ ammboko, nəknahangən əpel noko.» 15 Batseba toŋ aza məlĩ a giziŋ nani, məlĩ agalək diyɗa, Abisag mə sunemək tədawgəɗ sən wəza. 16 Batseba ɓe', yaŋ təppu' aba məlyã; amna: «Miy kəŋgəl di?» 17 Təɓsən na: «Daya naw məlyã, kəsway sətək balamək nok də Yawe Maŋgəlva noko: “Wətuk Salomoŋ dədawzəm məlĩ dərɓagawa, ndəni nawsan aka mazaŋga na məlĩ nawa.” 18 Yaŋ kakaŋ na Adoniya akkpaŋgək məlyã, məza daya naw məlĩ əsənən akan ɓa! 19 Atawək wəlet medgeɗgeɗe, kirtit wasliɗe məkirit dit timeŋgiɗ diyɗa, ayek kirtin məlĩ gərak dit may məsdələv Abiyatar də Yo'ab daya net məzəlpaŋgə ya gawla nok Salomoŋ na, nan diya ɓa. 20 Ya isi, daya naw məlyã, Israyel pak aziyək haran akoko, ka kənah sitgən ɗəf an nawsan aka mazaŋga na daya naw məlĩ dərɓagani. 21 Pay daya naw məlĩ adamta na, in də Salomoŋ wətu kawləmi va məs mambrayɗe.» 22 Ya təgrak əpel də məlĩ tagay ɓa, məskəleŋ Natan toŋgu. 23 Mənah sən məlĩ dawnəh na: «Məskəleŋ Natan yaŋka!» Atoŋ aza məlyã, appu' aba məlĩ mirbizin afuŋ nisi, 24 Natan amna: «Daya naw məlyã, gesiŋ istə kəɗiwənəŋ na: “Adoniya dəsangən məlĩ dərɓagawa, dəsangən aka mazaŋga nawa sa?” 25 Vi aprikik dəpaŋ a En-Rogel ataw wəlet medgeɗgeɗe, kirit wasliɗe məkirit dit timeŋgiɗ diyɗa, ayek kirtin məlĩ pakə, deyeɗe net məzəlpaŋgə, gəm məsdələv Abiyatar; yaŋ tay əzəmaŋgə, tay əsaŋ abani, ənəhaŋ na: “Məlĩ Adoniya dəsan faɗə!” 26 Ya naw in gawla noko də məsdələv Sadok, Benaya, wətən Yoyada gəm Salomoŋ gawla noko dəyəm ɓa. 27 Gesiŋ, səza daya naw məlĩ wən nan asil sa? Ya mbara kəprəman sən na gawla nok ɗəf an nawsan aka mazaŋga na daya məlĩ naw dərɓagan ɓa sa?» Davit arbanək na Salomoŋ gi nawgəm gəlani 28 Məlĩ Davit azlanka, amna: «Miyət suwət Batseba!» Ndət toŋ pay ziw aba məlyã. 29 Məlĩ suwayə, amna: «Yawe madarani, ndəni dəkõhgu səddəv tatwãh pakə, 30 Va nəsway suk də iya na Yawe Maŋgəlva na Israyel dawnəh na: Salomoŋ wətuk dədawsan məlĩ a gəlawa, ndən nawsan aka mazaŋga naw a gəlawa. Dəpaŋ dəpaŋ nədaɗɗa wən nan vaska.» 31 Yaŋ Batseba təɓe'gən kiyət afuŋ, təppu' aba məlyã, təmna: «Daya naw məlĩ Davit, dəsan hã faɗə.» 32 Yaŋ məlĩ Davit amna: «Miye su may məsdələv Sadok, məskəleŋ Natan, gəm Benaya wətən Yoyada!» Yaŋ azzoŋ aba məlyã. 33 Məlĩ aɓsit na: «Məgim məɗɗaŋ wəza na daya nokum, məpeŋgən Salomoŋ wətu aka koropələs mugolun nawa, miprikgən a Gihon. 34 Adaki məsdələv Sadok də məskəleŋ Natan adappay sənən mẽl nawɗiyən aka məlĩ na Israyel, vasna, kəffonəngən gozloro, kəŋzlaŋgən vaŋvəl na: “Məlĩ Salomoŋ dəsan hã faɗə!” 35 Kəzoŋgən ammban rimiɗ rimiɗi, dədegin əsan aka mazaŋga na məlĩ nawa; ndəni nawzəm məlĩ a gəlawa, nəɗiyək wən nan dəsangən məlĩ aka Israyel gəm aka Yuda.» 36 Benaya, wətən Yoyada, azlan sən məlĩ na: «Dəsan vaska! Vaski Yawe, Maŋgəlva na daya məlĩ naw apeli. 37 Va Yawe asan də daya məlĩ nawa, vas adawsan də Salomoŋ; waɓaygən mazaŋga na məlĩ nan day ki an na daya məlĩ naw Davit.» Məɗini Salomoŋ aka məlyã 38 Məsdələv Sadok, məskəleŋ Natan, Benaya wətən Yoyada, gəm mə Keretɗe dit mə Peletɗe, ndəɗaŋ pirik dəndəni: Apeŋginənək Salomoŋ aka koropələs mugolun na məlĩ Davit, mah əkanən a Gihon. 39 Məsdələv Sadok gəm mohõ na mẽl səddəv gizlirke, aman aka Salomoŋ, kawɗiyən aka məlyã; muffoni gozloro, yaŋ ɗiy pak aŋzlaŋ vaŋvəla: «Məlĩ Salomoŋ dəsan hã faɗə!» 40 Ɗiy pak ammban rimiɗ rimiɗi; ɗiy affoŋguk pozloroɗi, aknəhaŋgək də ənnek hã dələv geŋgeɗgeŋgeɗ sən vaŋvəl neti. Salomoŋ dərma Adoniya a makran ɓa 41 Adoniya dit ɗiy en ayə aprəmənən vaŋvələs də wəgrak əzəm neti; Yo'ab aprəm ɓaɓəlma gozloro, amna: «Vimi gogoyo a walaŋgəla-metiŋgis di?» 42 Dəbayma wəpel nan ɓa, Yonatan wətən məsdələv Abiyatar pohu. Adoniya aɓsən na: «Ade, vi ɗəf na vurum kənan ɓa; sessel, alabara nenek tay amok nawnəhã.» 43 Yonatan, azlan sən Adoniya na: «Vas dərəŋ ɓa, daya nam məlĩ Davit aɗiyək Salomoŋ ka məlyã! 44 Məlĩ aslinik may məsdələv Sadok, məskəleŋ Natan, Benaya wətən Yoyada, gəm mə Keretɗe, dit mə Peletɗe dəndəni; yas apeŋgənən aka koropələs mugolun na məlyã. 45 Məsdələv Sadok də məskəleŋ Natan aman sənən mẽl akan nawɗiyən məlĩ a Gihon, sədaka, amilyoŋ də ənnekən ziti; walaŋgəla-metiŋ pak asanək addəv ənneke: gogoyo aski kəprəmaŋgə. 46 Salomoŋ asanək kpak aka mazaŋga na məlyã; 47 an dəday əmpa na, gewleɗ na məlĩ azzoŋguk əfet aka daya nam məlĩ Davit, dawnahaŋ na: “Kəta Maŋgəlva nok dəgagdakan iya na Salomoŋ day ki an nok əmpa, dəɓaygən mazaŋga na məlĩ nan day ki an noko.” Məlĩ appu'uk aka zəga nawvoŋ nani, 48 Məlĩ pak vas apeli: “Soko sən Yawe Maŋgəlva na Israyel, məs dəvay ɗəf nawsan aka mazaŋga na məlĩ naw dəpaŋka, haraw awlaka.”» 49 Ɗiy en Adoniya ayəŋ pak akkereŋke, ndəɗaŋ hirr, naway pak tive nan gəmə. 50 Geslne armak Adoniya sən Salomoŋ, ndən mbat kãw ərma mohõ gəlamatuya. 51 Məprəman səni məlĩ Salomoŋ na: «Awle! Geslne armak Adoniya suko, armak mohõ gəlamatuya dawnəh na: “Məlĩ Salomoŋ, dəsway su dəpaŋ na, abay na gawla nan də masalam ɓa!”» 52 Salomoŋ amna: «An asanək də maɗɗulani, muhur kiyən taka dayday abət na afuŋ ɓa; an agəɗək wən siɗikke hara na, wamtə.» 53 Məlĩ Salomoŋ slən ɗiy əprikginin səka gəlamatuya. Adek appu' aba məlĩ salomoŋ, Salomoŋ aɓsən na: «Dok anokda!» |
All right reserved
Bible Society of Cameroon