1Korintus 9 - Bible en Guidar

An dədah aza maslən gəm wəza nani

¹ Na kiyu nan ɓa sa? Maslən nan ɓa sa? Nula Daya nam Yesu ɓa sa? Wəza naw kənanaŋ addəv Daya ɓa sa?

² Ya an ɗiy meɓɓet duluwən va maslən ɓa, maslən nan azokum. Mənokumtə zəga narban wəza na maslən naw addəv Daya.

³ Əhãy naw ammba zu abet məpeleŋ akaw yaŋka:

⁴ Mənam tat də tive nawzəm gəm nawsa ɓa sa?

⁵ Mənam tat də tive nawgəm məlməm məguluŋgut ka guluk va net madammbirgit maslənɗe, milmiŋgiɗin Daya gəm Kefas ɓa sa?

⁶ Awaniɓa intə kaka də Barnabas məza tive nassa məza əɗɗa wəza ɓa sa?

⁷ Naway dəgəɗ wəza nalpa dəzgəl kiyən dəvan di? Naway məmpə megezlembirke məza ndən əzəm uwa nan ɓa di? Naway nawtaɗ zəgeɗ mmemeyẽɗ məza ndən əsa momvo net ɓa di?

⁸ Va aza əɗɗum na ɗəf nədawpel vas sa, mahenziŋ pak tay əpel vas ɓa sa?

⁹ Vi məverni addəv mahenziŋ na Moyis na: Kədawgul taɓak ama wasli mərgə hay ɓa. Vasna Maŋgəlva aket wasliɗe adaɗɗum sa?

¹⁰ Akam adawpel gərak ɓa sa? Gesiŋ aka wən nami məverni. Məzənse dənsi də əɗɗum nawrəh haran nani, məzərga haya dəsan də əɗɗum nawrəh haran nani.

¹¹ An məzlgəsukumək zəgeɗ na əmpəsa, ərəh zəga səvokum na metiŋgini day sa?

¹² Ya an ɗiy meɓɓet tahəŋ də gagdak nawtaf zəga səvokum na, sasak mənam dərəŋ ɓa sa? Də as pak məgəɗ wəza də gagdak vanəs ɓa. Mənam tat əɓəs zəga pak dərəŋgə, vi mədaɗɗa zəga nawtak Alabara nenek na Kristu ɓa.

¹³ Kəsənnək na, məgəɗ wəza nawpal Maŋgəlva na əzəm nan pak səddəv Gəla na Maŋgəlva adawrəhəni, məɗɗaŋ wəza a matuya səza an na matuya adawrəhən haran neti ɓa sa?

¹⁴ Vaski yi'e, Daya aɗi wən nan sit mərbanən Alabara Neneke, dəzəmaŋgən də wəza narban Alabara Neneke.

¹⁵ Ya naw nəgəɗ ɗah wəza də as ɓa. Nəver wən nan vi kassohon zəga nan ɓa. Ɗəɗah nəmtə! Ɗəf tay nawmõh su əkaɓəs ɓa.

¹⁶ Vi ərban Alabara Nenek na əkaɓi azaw ɓa, zəga an də wərayi məɗi suw vavyak nani; ərayi azawa an in tat ərban Alabara Nenek ɓa.

¹⁷ An də əŋgla na makraw nədaɗɗani, asna anərah əfaɗ na iya nawa. Ya an də əŋgla na makraw nədaɗɗan ɓa, wəza yi məppan su avawa.

¹⁸ Awani kan əfaɗ na wəza naw di? Ndəni əka Alabara Nenek məs nədarbanəŋ na mekeleŋ, məza əssohon gagdak məs Alabara Nenek van adawvay ɓa.

¹⁹ Na kiyu nan aza ɗəf pakə, ya nəɗɗak zu va balam net ɗiy pak vi nərahgən vadaysa neti.

²⁰ Awalaŋgit mə Yudeɗi, in kpaŋ va mə Yuda, vi nərehgin mə Yudeɗi. Awalaŋgit məzəzbanən mahenziŋ, in kpaŋ va məzbə mahenziŋ də in sən kiyu nəsaw məzbə mahenziŋ ɓa pakə, vi nərehgin məzbaŋ mahenziŋ.

²¹ Dit en məs tahəŋ də mahenziŋ ɓa, in kpaŋ va in tat də mahenziŋ ɓa, tak in tat məza mahenziŋ na Maŋgəlva ɓa ɓa, adan Kristu wi mahenziŋ nawa, vi nərehgin məs tahəŋ də mahenziŋ ɓa.

²² Dit ɗiy məddekit addəv ətafa, in kpaŋ va məddakwa, vi nərehgin ɗiy meddekti. Nəkkpaŋganək zu azet ɗiy pak addəv va assoŋ addəv zəga pakə, vi də tive awan di pak na nərahgən əkõhgit ɗiy meɓɓeti.

²³ As pak nədaɗɗan na vi Alabara Neneki, ka nərahgən haran naw səzani.

²⁴ Kəsənən na, ɗiy məzənzoŋ a təki nanza na pak adanzoŋgu ya ɗəf taka dədawrəh an məɗiyən ɓa sa? Mənzoŋ vaska vi kərahəŋgən.

²⁵ Məzugaya, addəv zəga temtem pak na tay əsok zəni, nan dərəŋ ammba mətərkiya məs nawrayi, ya namə ammba mətərkiya məs aray na ɓa yi.

²⁶ Naw vaŋ nədanzaw kana: məza mədaŋgaru ɓa; vaŋ nədaslkəra: məza aka səmyã ɓa.

²⁷ In tat əzəmgən sahã na gəɓa zuwa, in tat əkkpaŋgan va balam, vi in məs nərbə alabara sit ɗiy meɓɓet nədasaw məgilgu ɓa.