1Korintus 7 - Bible en Guidar

Əttok aka əɗi gulku

¹ Dəwəlsən wən məs kəvereŋ suwən akan na, lewi aza ɗəf mizilin adawrəŋgət gulku.

² Ya vi əkuh a gizbe adawsan ɓa na, ɗəɗah ɗəf pak dəsan də guluk nani, guluk pak təsat də zəlta.

³ Ɗəf mizilin dəbay sət mãy nat guluk nani, guluk tam təbay sən mãy na zəlta.

⁴ Guluk təgəɗ na an təŋgəl də gəba zət ɓa, na zəlti, vaski yi'e ɗəf mizilin agəɗ na an aŋgəl də gəba zən ɓa, nat gulkuni.

⁵ Kədawɓoŋgoŋ sənən zukum dawvoŋ ɓa, abbər ki an kəslereŋgək akan vi pay siɗikke kakkama ɓa, səbbərən na məsap əmpa, vi Satan adawrakokum sən kəɓapən na ətak zukum ɓa ɓa.

⁶ Nədawnah vasna va aza əsleri, əɗi wəni ɓa.

⁷ Nəŋgələk kəta ɗiy pak dəssoŋgən va nawa, ya naway pak də əvəl na mbəlembəle məs dəde səza Maŋgəlva yi. Ɗəf mbərən vas məpsəni, ɗəf maɓɓan tam temme.

⁸ In tat ənah sit ɗiy məs dəɗiyaŋ gil ɓa gəm sit gil net gəbayɗe, lewi an kəssoŋguk va nawa.

⁹ Ya an aɓapən na ərma zit ɓa, ɗəɗah dəkayaŋ gili. Vi dəɗah əgəm guluk ki wən nan əzluk a mokroko.

¹⁰ Ya ɗiy en dəkayaŋ gil səkayə, in tat ənah siti, (Intə ɓa, Daya iyi) guluk tədawɗak də zələt ɓa.

¹¹ Ya an tuɗakək də zəlta, təsat məza ammba zil ɓa, awaniɓa təmsak əsler də zəlta: Ɗəf mizilin adawɗak dət ɗak nan ɓa.

¹² In tat ənah sit ɗiy meɓɓet tam na, intə, Daya yi ɓa: An ɗəf tay dət guluk nan məza tətaf Maŋgəlva ɓa, ya tətafək na watəsat dəndəni, adarɓahat ɓa;

¹³ an guluk tat də zələt məza dətaf Maŋgəlva ɓa, ya atafək na wasan dənta, tədawgilyet ɓa.

¹⁴ Ɗəf mizilin məs dətaf Maŋgəlva ɓa, salalay ammba əsap nan dət guluk nani, vaski yi'e guluk məs tətaf Maŋgəlva ɓa, salala tə ammba əsap nat də zələt ɗəf na Maŋgəlva. Vas ɓa na kirtukum wassoŋ salala ɓa, ya kakaŋ na salalaŋgə.

¹⁵ Ya an ɗəf məs dətaf Maŋgəlva ɓa, man aka uɗaka, duɗakə. Məlməm mizilin awaniɓa məguluŋgut belemɗe net zəgeɗ veskiskəŋ ɓa. Maŋgəlva ayukum na ka kəssoŋgən zay yi.

¹⁶ Vi is gulku, kəsənək na wakəkõhgən zəlko sa? Awaniɓa is ɗəf mizilin kəsənək na wakəkõhgət guluk noko sa?

Ənziya va Maŋgəlva ayukum səni

¹⁷ Naway pak dədaw va Daya apsəni va aka asan pay Maŋgəlva aya. Aski nədawɗi wən nan sit ɗiy na Maŋgəlva pakə.

¹⁸ An Maŋgəlva ayak ɗəf aka askələkawra səkayə, adawɗaman ɓa, an Maŋgəlva ayak ɗəf aka asan gayã, adaskəlawra ɓa.

¹⁹ Vi əskəlawra zəgay ɓa, əssa gayã zəgay ɓa, abbər ki ərma mahenziŋɗe na Maŋgəlva ɓa.

²⁰ Naway pak dəsan addəv va asan aka pay məyani.

²¹ An balam kənan aka məyuko, adosok ɓa. Ya an wakəɓap əbit kiyko, abite.

²² Vi balam məs məyan addəv Daya, Daya abitke. Vaski yi'e ɗəf na kiyən məs dərah iya, balam na Kristu yi.

²³ Məlbəhkumi də əfaɗ akokum. Kədakkpaŋgaŋ belemɗe net ɗiy ɓa.

²⁴ Milmiŋgiɗwa, naway pak dəsan aba Maŋgəlva va aka pay məyani.

Əttok dəwəlsit ɗiy məs dəɗiyaŋ gil ɓa gəm gil net gəbayɗe

²⁵ Dəwəl sit kirin ŋgbuɓɓo na, in tat də an nawɗi wən nan dəde səza Daya ɓa, əɗɗum nawi va ɗəf məs də ulasahã na Daya məs dəslə nawtaf wən nani.

²⁶ Aŋki an nədaɗɗum kana: Sən tatwãh an kakaŋkəŋka, lewi an ɗəf asanək vaska.

²⁷ Is tat dət guluk sa? Kədawkay uɗak dəndət ɓa. Is tat də guluk ɓa sa? Kədawkay guluk ɓa.

²⁸ Ya an kəkayək gulku, mbərayən kəgəɗ ɓa. Vaski yi'e an waŋ ŋgbuɓɓo təɗiyək zile, mbərayən təgəɗ ɓa. Ya məs dəɗiyən zit na, warahaŋ tatwahã, ndəni naw nəŋgəl ətərkum səzani.

²⁹ Milmiŋgiɗwa aŋki məs nədawnaha: Pay duɗukkoy, təŋ kakaŋka, ɗiy en dit gili dəssoŋgən va dit gil ɓa.

³⁰ Ɗiy en məzuhəmaŋgə va tay əhəmaŋ ɓa, məzənnekenən ziti va tay ənnekenən zit ɓa, məzəlbahaŋ zəga va tahəŋ də zəga avet ɓa.

³¹ Məzəmaŋ ma arya naka dəlva, va tay ərəhaŋ zəga gesiŋ ɓa. Vi dəlvəŋ wagrakə.

³² Nəŋgəl na kəssoŋgən məza də əɗɗum ɓa. Ɗəf məza guluk ɓa, əɗɗum nan aket zəgeɗ na Daya yi. Ndən əkayan va adanneken zə Daya.

³³ Ya ɗəf an də gulku, əɗɗum nan aket zəgeɗ negge yi. Ndən əkayan va adanneken zət guluk nani.

³⁴ Maɗɗulan awɗakka. Vaski yi'e, guluk məza zələt ɓa gəm waŋ ŋgbuɓɓo tahəŋ də əɗɗum aket zəgeɗ na Daya, vi dəssoŋgən salala də gəɓa ziti gəm də əmpəs neti. Ya guluk nammba zile, nat əɗɗum nat aket zəgeɗ negge yi, ndət əkayan va tədanneken zə zəlta.

³⁵ Nədawnah vas na, nəŋgəl dəsan sukumgən moggoni ɓa na vi kanslən bizwil a bokumi ɓa. Vi kəɗɗaŋgən moggon an dəslə yi gəm kəsapaŋgən aza Daya, məza uɗak ɓa.

³⁶ An gawla van awlak na aɓap na əppat mədaha nan məza ərəŋgət ɓa ɓa na, ka wən dədawgən də tiveni, dəɗɗa va makran aŋgələ. Mbərayən adaɗɗa ɓa, dəɗinən ziti.

³⁷ Ya an ɗəf aynanək ɓəlɓəl a makran məza wəlan məskan ɓa, də əska wəla əŋgla nani, də iynan a makran nappat mədaha nan ŋgbuɓɓo ndən sən kiyən, moggon adaɗɗa.

³⁸ Vasna, Ɗəf an dəgəmət mədaha nani, moggon adaɗɗa, ɗəf an dəgəmət ɓa dədaɗɗa moggon day.

³⁹ Guluk miynattə aza zələt hã gap əzva na maway nata. An zələt amtəka, na kiyəttə nawɗi ɗəf an təŋgələ, addəv Daya kaka kan hara.

⁴⁰ Ya aza əɗɗum naw na, an təsatək va təsatəs tədawsat zət nek day. Naw pak in tat də Əmpəs na Maŋgəlva.