1Korintus 6 - Bible en Guidar

Dolgoy aket məlmiŋgiɗko

¹ An ɗəf səwalaŋkum tay də wən a walaŋgən də ɗəf maɓɓani, vimi adawka dolgoy abet ɗiy-ɗar məza abet ɗiy salala ɓa di?

² Kəsənən na ɗiy salala nawtawwən aka ənziya egge ɓa sa? Ya an munokumtə nawtawwən aka ənziya egge na, kəɓapən na ətawwən aka wən siɗikke ɓa sa?

³ Kəsənən na mənamtə nawtawwən aket maslayɗe ɓa sa? Mbəsa an dədawtoŋ addəv ənziyaŋ dərəŋgə!

⁴ Aka an dəwəlsən ətawwən aka an dədawtoŋ addəv ənziya eggeŋka, ɗiy en məs əsap net məzutafaŋ dəsin ɓa kədawɗiyaŋ ka mətawaŋ wəna.

⁵ Nədawnahən na, wil dədukuməngəni. Vas na, məsmaɗɗula tay awalaŋkum nawɓap ətawwən nawalaŋgit milmiŋgiɗin ɓa sa?

⁶ Ya ɗəf əka dolgoy aka məlməni kan məza abet məzutafaŋ ɓa.

⁷ Gesiŋ, əssa də dolgoy awalaŋkum na əddaki. Vimi kawɓəsənən an məgəɗ sukumi an dəslə ɓa di? Vimi kappanən zukum an tay əppətkumən ɓa di?

⁸ Ya mənokumtə məzəɗɗa an məs dəslə ɓa gəm məzəppit ɗiy meɓɓeti, kədaɗɗaŋ vas na sit milmiŋgiɗkumi.

⁹ Kəsənən na məɗɗaŋ ɗarɗar atoŋgoŋ na məlĩ na Maŋgəlva ɓa ɓa sa? Kədawzanən zukum ɓa: Məkuwaŋ a gizbe, məzbaŋ zəgakamaŋgəlva, məpolkoyeɗi, məkkpaŋgaŋ ka gili, ɗəf məvoŋ dit zeli,

¹⁰ məhãlɗe, məŋglaŋ deleɗ diyɗa, məs mbazla adawbaya, məraŋ ɗəfa, məvoŋgoŋ tive, atoŋgoŋ na məlĩ na Maŋgəlva ɓa.

¹¹ Vas ɗiy meɓɓet sərokum assoŋ lahəŋka. Ya məslslaykumi, məkkpaŋgokumi salala, məbburkumi addəv iya na Daya nam Yesu Kristu gəm də Əmpəs na Maŋgəlva namə.

Əppan zuk sən wəza na gagdak na Daya

¹² Tive naɗɗa zəga pak tay abawa, ya paki nawtər wəray ɓa; tive naɗɗa zəga pak tay abawa, ya naw nəppan tive sən zəga dəsangən də gagdak akaw ɓa.

¹³ Zəga nawzəm sən gədəv ɗəfi va gədəv ɗəf asan sən zəga nawzəma; ya Maŋgəlva wazan aŋka də andaka. Zə ɗəf hara na, tay vi əkuh a gizbe ɓa: Nan na Daya iyi, Daya tam na zə ɗəfa.

¹⁴ Maŋgəlva məs dəsilgin Daya səka əmta, wasilgəm səka əmta də əɓap nani'e.

¹⁵ Kəsənən na gəɓa zukum zəgeɗ na zə Kristu əŋ ɓa sa? Wanəgəm gəɓa zə Kristu kakkpaŋgan gəɓa zət məpolkoyok sa? Agəɗ na ɓa!

¹⁶ Awaniɓa kəsənən na, an ɗəf asapək dət məpolkoyok na, gəɓa zit takay ɓa sa? Vi məverni na: Ndəɗaŋ sula wakkpaŋgaŋ gəɓa zit taka.

¹⁷ Ya ɗəf məs dəsap də Daya, əmpəs net takay.

¹⁸ Mənzoŋ səza əkuh a gizbe. Mambray məs ɗəf adaɗɗa pakə, appaka na zəni, ya məs dəppan zən sən əkuh a gizbe aka zən tusso adaɗɗa mambray.

¹⁹ Awaniɓa kəsənən na gəba zukum gəla na Zeŋgile Salala məs dəsan addəvkumi, məs kərahaŋ səza Maŋgəlva gəm na kiykum kənanən ɓa ɓa sa?

²⁰ Vi məmokumi də əfaɗ akokum. Məgagdakan Maŋgəlva kan də gəɓa zukum.