1Korintus 4 - Bible en Guidar

Maslənɗe na Kristu

¹ Muləm va məɗɗaŋ wəza na Kristu, va ɗiy məs məppan sit wən məɗama na Maŋgəlva aveti.

² An məs adassohoŋ ava ɗəf məs məppan sən wəza van avan na, dəsangən ɗəf təstəsə.

³ Ya nawa, dəssaw an mənokum kətawən wən akawa awaniɓa ɗəf maɓɓan ɓa. In pak nətaw na wən akaw in sən kiyu ɓa.

⁴ Makraw tay əɗi su heslepe ɓa, ya də as pak na salala nan an faɗ ɓa: Ɗəf an nawtawwən akaw na Daya iyi.

⁵ Vi vaski kədatawaŋ wən dafsən tak əzza na Daya ɓa, ndəni nawkekeɓe an dəɗam ara guzliyo gəm narban an dəsan a makret ɗiyi. Asna naway pak warah hara gagdak nan səza Maŋgəlva.

⁶ Milmiŋgiɗwa, aka wən nokumi nərban wənəŋ də tive temme, də əsla kivan də zək naw gəm də Apollos, vi kəgəməngən təlmə, vi kədawtoŋgoŋ ki an məverin də əŋglu ɗəf mbərən kawkaɓ aka mbərən.

⁷ Naway dəɗiyuk daykiyit ɗiy di? Mi avok məza dəpse məpsuk ɓa di? An dəpse məpsuk na vimi kədawkaɓ va kəɓəs na dəpse məpsuk ɓa di?

⁸ Kərəhənək an kəŋglaŋ səkay. Kəkkpaŋgaŋgək məsaryeɗ səkay, kətəŋgənək əzəm məlyã məza də mənam ɓa, an məlĩ van kədawzəmaŋ gesiŋ, asna nam pak waməzəm məlĩ də mənokum.

⁹ In tat ulan na, Maŋgəlva aɗimək mənam maslənɗe a dərɓe, va ɗiy mətawwən namta aketi, mərbesəmi wil egge, a maheret maslayɗe də a maheret ɗiy pakə.

¹⁰ Mətemik aka wən na Kristu, ya nokum məsmaɗɗula kənanaŋ addəv Kristu. Nam məddakəm mənani, nokum gboŋgboŋ kənanaŋgə. Nokum məgagdakokum kənanaŋgə ya nam məzeləm mənani.

¹¹ Hã gap pay an kakaŋka, mənam tat əzəmsahã sən maya dit meme, zəm mekeleŋ mənani, mərgəmi a tapaslaymə, mənam tat slorsloru.

¹² Mənam tat əzəm sahã əɗɗa wəza də vamə, an tay əraməni, mənam əɗɗa soko; an tay əsərən mamə mənam əɓəsən;

¹³ an tay əpeleŋ mbərayən akamə, mənam əzlan də wəlam neki, məkkpaŋgək va haslaɓ məkkporən nammba dəlva, zəga nazga net ɗiy pakə, hã kakaŋka.

¹⁴ Nəver sukum wənəs vi karbə sukum wil ɓa, vi kazga sukum va kirtu na makrawi yi.

¹⁵ An kərəhaŋgək məzərbaŋzəga gabal addəv Kristu, efiŋgiɗkum tahəŋ ɓəɓɓay ɓa, vi intə nəwukum də alabara nenek addəv Yesu Kristu.

¹⁶ In tat əkkamokum kana, məzban ədaw nawa.

¹⁷ Sən aski nəslən sukum Timote wətu na makrawa, tay təstəs addəv əsap də Daya. Waprəman sukum tive nanziya naw addəv Kristu, va nədarban a təki pak addivit gəleɗe na Maŋgəlva pakə.

¹⁸ Azet ɗiy meɓɓet na nəmndaw na anokumda ɓa, yaŋ adawgagdakanən ziti.

¹⁹ Ya wanəmndaw abe aŋ siɗikke an Daya aŋgerke. Ya əpel net məgagdakanən zit vetis nədawkayan əsənən ɓa, an adawɓap əɗɗaŋgi.

²⁰ Vi məlĩ na Maŋgəlva dəziw aka əpel ɓa, aka əɓapi.

²¹ Mi kəŋglaŋ di? Ndaw anokumda də zleŋge awaniɓa də əŋgla gəm də maɗɗula na zazay sa?