1Korintus 3 - Bible en Guidar

Məɗɗaŋ wəza na Maŋgəlva

¹ Naw na milmiŋgiɗwa, nəɓap əpel sukum va sit ɗiy məs də Əmpəs ɓa, va sit ɗiy məs naddəv əŋgla na gəba ziti nəpeli, va sit kirin memeɗeŋɗe addəv Kristu.

² Momvo nawsa nəpsukum, məza way ɓa, vi kəɓəsən na tagay ɓa, kakaŋ zlaŋ kəɓəsən na ɓa.

³ Vi addəv əŋgla na gəɓa zukum kənanaŋgə'e. Adan kotorok də əgay tay a waloŋkum na, addəv əŋgla na gəɓa zukum kənanaŋ gəm va əŋgla na gəɓa zə ɗəf kədawdawaŋ ɓa sa?

⁴ Adan ɗəf sərokum tay ənah na: Naw na Pol nani, maɓɓan tam na, naw na Apollos nani. Vasna addəv əŋgla na gəɓa zə ɗəf kənanən ɓa sa?

⁵ Naway Apollos di? Naway Pol di? Məɗɗaŋ wəza məs kərah ətafaŋ sə kəlazetiŋ, naway pak va aza an Daya apsən sə walaŋti.

⁶ Naw nəmpaka, Apollos azi sənək iŋkile, ya Maŋgəlva yi məzuɓaygəni.

⁷ Vasna, ɗəf məs dəmpa yi dəgap zəga, məs dəzi sən iŋkile yi ɓa, məs məzuɓaygəni yi, Maŋgəlva.

⁸ Ɗəf məs dəmpa də ɗəf məs dəzi sən iŋkile məstakaŋgə. Naway pak warah hara əfaɗ nan va aza wəza nani.

⁹ Vi wəza na Maŋgəlva mədaɗɗa sapə, mənokumtə guli na Maŋgəlva. Mənokumtə ərka na Maŋgəlva.

¹⁰ Va aza mbəlembəle məs Maŋgəlva avayə, nəɗiyək gabban va məsən-ərkagəla məsmaɗɗula, ɗəf maɓɓan ərka akani. Ya naway pak dəsla zən aza va adarkani.

¹¹ Vi ɗəf aɗi na gabba maɓɓan abbər an məɗiynəŋ ɓa, ndəni Yesu Kristu.

¹² An ɗəf arkək aka gabban məɗiyən van də meleŋge, də təbəz babara, də gərəm na sləma, dit wəleŋɗe, dit ŋgevi awaniɓa tərɗa,

¹³ wəza na ɗəf pak warbə. Vi pay nawtawwən warban appaka ta'ə, addəv offo adarba, offo wasla wəza na ɗəf pak va asani.

¹⁴ An wəza na ɗəf aziwke, ɗəf məs dərka van warah əfaɗ na iya nani.

¹⁵ Ya an wəza na ɗəf van ahhətka, nan tay an adawrəh ɓa. Wakõhu, ya va əkkaɗ ki offo yi hara.

¹⁶ Kəsənnən na gəla na Maŋgəlva kənanəni gəm Əmpəs na Maŋgəlva tay addəvkum ɓa sa?

¹⁷ An ɗəf araygənək gəla na Maŋgəlva, Maŋgəlva waraygəni, vi gəla na Maŋgəlva salala yi. Munokumtə gəla vani.

¹⁸ Ɗəf adawmbəɗan zən ɓa, an ɗəf səwalaŋkum tay əɗɗum nawsan məsmaɗɗula aka pay an kakaŋkəŋka, dəkkpaŋ dərwa, vi dəsangən məsmaɗɗula.

¹⁹ Vi maɗɗula naka dəlvəŋ va dərway aza Maŋgəlva. Vi məverni na: Ndəni məzərme məsmaɗɗulet addəv pepet neti.

²⁰ Gəm əmpa na: Daya asənək əɗɗum net məsmaɗɗulet ɗari.

²¹ Vi vaski ɗəf adawɗi ənnek nan aket ɗiy ɓa, vi zəget pak nokuməŋ.

²² Dəsan Pol, dəsan Apollos, dəsan Kefas, dəsan ənziya egge, dəsan zeŋgile, dəsan əmta, dəssoŋ zəgeɗ kakaŋka dəssoŋ zəgeɗ en dədazzoŋgu, zəgeɗ pak nokuməŋ,

²³ nokum na Kristu kənanaŋgə, Kristu tam na Maŋgəlva yi.