1Korintus 2 - Bible en Guidar

Ərban Kristu məkpa'ən aka məzliwrihe

¹ Aka ndaw anokumda na milmiŋgiɗwa, də gagdak na əsən əpele awaniɓa na maɗɗula nəmbat ərban sukum wən məɗama na Maŋgəlva ɓa.

² Vi zəga tay niynan nawsən anokumda abbər Yesu Kristu an məkkpa' aka məzliwrihe ɓa.

³ Ya naw də əddaka, də geslne gəm də əkker diyɗa ndaw anokumda.

⁴ Əpel nawdoɗ ki ɗəf də əsən tay addəv əpel naw də ərbawən naw ɓa, də ərba na Əmpəsa gəm də əɓap yi.

⁵ Vi ətaf nokum adawziw aka əsən net ɗiy ɓa, ka dəziwgən aka əɓap na Maŋgəlva.

Maɗɗula na Maŋgəlva

⁶ Ya maɗɗula mədarba a walaŋgit məzutafaŋ məsɓeti, maɗɗula na pay an kakaŋkəŋki ɓa, net deyeɗe na pay an kakaŋkəŋki məs nawzaŋgəŋ ɓa.

⁷ Məɗama na maɗɗula na Maŋgəlva mərbani, məs dəsan haɗamma, məs Maŋgəlva azaɓan dafsən tak əzəməɗ na dələv ammba gagdak namə;

⁸ məs taka səret deyeɗe na pay an kakaŋkəŋ tay dəsənən ɓa; va asənənka, kəta akkpa'ən na Daya na gagdak aka məzliwrihe ɓa.

⁹ Va məverin na: Zegeɗ məs hara ɗəf dule ɓa, məs sləma ɗəf dəpprim ɓa, məs makra ɗəf dəɗɗum ɗah ɓa. Zəgeɗ vetiskiŋ Maŋgəlva azeɓet viyit məs dəŋgluwəni.

¹⁰ Ya səmi Maŋgəlva arban səm də Əmpəsa; vi Əmpəs tay əkoson zəga pakə, zəgeɗ kpukpumɗe na Maŋgəlva daydayə.

¹¹ Vi naway sə walaŋgit ɗiy dəsən an dəwəlsən ɗəf an əmpəs na ɗəf məs dəsan addəvni ɓa di? Vaski yi'e ɗəf tay dədawsən an dəwəlsən Maŋgəlva an Əmpəs na Maŋgəlva yi ɓa ɓa.

¹² Ya nam na, əmpəs na dəlvəŋ mərah ɓa, Əmpəs an dəde səza Maŋgəlva yi, vi məsingin zəgeɗ məs Maŋgəlva apsəm də mbəlembəle;

¹³ məs mədawpel aket məza də ərba dəde səza maɗɗula na ɗəf ɓa, də ərba na Əmpəsi, də əsapan an dəwəlsən Əmpəs də an dəwəlsən Əmpəsa.

¹⁴ Ɗəf sən kiyən awtaf an dəde səza Əmpəs na Maŋgəlva ɓa, azan na va dərway, awɓap əsənən ɓa, vi də Əmpəsi əkoson nani.

¹⁵ Ɗəf də Əmpəs na Maŋgəlva, wakoson zəga pakə, ya nan ɗəf tay nawkoson an nazan ɓa.

¹⁶ Vi: Naway dəsən əɗɗum na Daya di? Naway narbə sən zəga di? Ya namə, mənam tat də əɗɗum na Kristu.