1Korintus 16 - Bible en Guidar

Əvəl ne məkristuɗe viyit mə Yudeɗi ( 16:1-4 ) Əkkal zəga ammbet məzutafaŋgə

¹ Aka an dəwəlsən əkkal zəga ammbet ɗiy salala na, va nəɗi wən nan sit məzutafaŋ naka na Galat, kəɗɗanəngən vaska'e.

² Pay maddaabəŋ na əvoŋ buhul, ɗəf pak dəɗigən koɓo a maŋgava an məs adawɓap əzaɓani, vi adassan əga əzza naw kawtaf əvəl van ɓa.

³ Pay nədagap eske na, wanəslin ɗiy məs kədaweleŋ, dit letərɗe avet dəkanəngən əvəl nokum a Yerusalem.

⁴ An aslək ndawgəni, asna waddoŋ də iyna.

Əɗɗum na kiyən gəm əgrakən ( 16:5-24 ) An məs Pol adaɗɗum naɗɗa

⁵ An nadaw anokumda na, kəla Makedoniya nədawtoŋgo, vi dədak nədawtoŋgo.

⁶ Mbərən ɓa na wanənzi anokumda, awaniɓa wanətoŋgən təlapaya. Vi kəbbahaŋ suwəngən ka nərahgən əzban tive nawa.

⁷ Vi kakaŋ na, nəŋgəl nulukumgən səka tive əmpa ɓa, vi in tat əɗɗum nassa də mənokum pay siɗikke an Daya aŋgerke.

⁸ Ya wanəsaw a Efesus hã gap Pentekot.

⁹ Vi mative akolul abaw sloproku gəm nawtərwəraya, də məzuseɓwən asoŋ diyɗa zlaŋ.

¹⁰ An Timote adeke, mətaf moggoni vi adawsan də geslne anokumda ɓa. Vi wəza na Daya adaɗɗa va nawa.

¹¹ Ɗəf adawzelen ɓa. Məbbah səni vi dəmilgən azaw zayə. Vi in tat əgan dit milmiŋgiɗwa.

¹² Aka an dəwəlsən məlməm Apollos na, nəgayək əpel diyɗa ka dəmbatgən anokumda dit milmiŋgiɗəm meɓɓeti. Ya aɓoŋko, man tay aka əddan kakaŋ ɓa. Ya an arahək pay na wambatə.

Əpel an bayma faɗə gəm əsɗa

¹³ Məga, məmpa təlkum addəv ətafa, məssoŋ ɗiyi, məsɓan zukum.

¹⁴ Zəga nokum pak dəsan də əŋgla.

¹⁵ Milmiŋgiɗwa, kəsənənək na, Estefanas də gəla nani ɗiy en dətafaŋ daabəŋ a Akaya, ya appanənək zit əɗɗa wəza viyit ɗiy salala.

¹⁶ Məɓe' sit ɗiy en veski gəm sit en dədaɗɗaŋ wəza gəm dədawzəmaŋ sahã va neti.

¹⁷ Zu neki də əzza net mãy Estefanas də Fortunatus gəm Akaykus. Ndəɗaŋ dəssoŋ azaw a gəlokum.

¹⁸ Affetenənək makrawa, va affetenən mokrokum, məɗi kiyit ɗiy en veski.

¹⁹ Məzutafaŋ na Asiya pak asɗokumunko. Akilas dət Piriskilla dit məzəkkalaŋ eŋgil annetda pak asɗokumunək də iya na Daya.

²⁰ Milmiŋgiɗəm pak asɗokumunko. Məsɗan zukum də ərma zukum na zazaya.

²¹ In Pol nəver əsɗaŋ də vawa.

²² An ɗəf dəŋglu Daya ɓa, əray dəsan akani! Maranata!

²³ Mbəlembəle na Daya Yesu dəsan də munokum.

²⁴ Əŋgla naw tay də munokum pak addəv Yesu Kristu.