1Korintus 15 - Bible en Guidar

Əsilye na Kristu səka əmta gəm net məzutafaŋgə ( 15:1-58 ) Əsilye na Kristu səka əmta

¹ Milmiŋgiɗwa, in tat əɗɗumon sukum Alabara Nenek məs nərban sukum kətafaŋ kəziweŋ akanəŋka.

² Alabara Nenek məs kədawkõhoŋ dəndəni an kərmanənək va nərban sukum. An vaski ɓa na, ətaf nokum wasan ɗarə.

³ Vi an in sən kiyu nərah nəgorgən sukumuk daabəŋ na: Kristu amtək vi mambray namə va Əverɗe anahaŋgə.

⁴ Andəknənka, asilik səka əmta də pay mahoko'ən va Əverɗe anahaŋgə.

⁵ Arbanək zən aza Kefas, siske azet en kəlaw kiyit sula.

⁶ Sədərɓagani arbanək zən azet milmiŋgiɗəm dayki səkat sle. Vadaysa net mederetiŋ hã kakaŋka, meɓɓet amtaŋka.

⁷ Sədərɓaga aska, arbanək zən aza Yakob, siske, azet maslənɗe pakə.

⁸ Dərɓedərɓe faɗə, arban zən azaw va aza muzliya məlotun.

⁹ Vi naw intə muzliya nammbet maslənɗe, nəslə nawyu na maslən ɓa, vi nəsərək met ɗiy na Maŋgəlva.

¹⁰ Də mbəlembəle na Maŋgəlva yi nəsaw va nəsawəŋka, mbəlembəle nan viyu dəsan ɗar ɓa. Nəgəɗək wəza daykiyit pak dərəŋgə, in nəɗɗa ɓa, mbəlembəle na Maŋgəlva məs dəsan də iyni.

¹¹ Kəta dəsan iyna, kəta dəsan ndəɗaŋ, anani mədawtəl ma nani, anan kətafaŋgə.

Əsilye nam səka əmta

¹² An mənam tat ətəl ma na: Kristu asilik səka əmta, mbarmbar ɗiy meɓɓet səwaloŋkum adawnahaŋ na, əsilye net ɗiy mimtit tay ɓa di?

¹³ An əsilye net ɗiy mimtit tay ɓa, asna Kristu pak dəsil səka əmta ɓa.

¹⁴ An Kristu dəsil səka əmta ɓa, asna ərbawən nam mekeleŋgi, ətaf nokum pak mekeleŋgi.

¹⁵ Məsamək va məziwweɗe na Maŋgəlva məwaŋ wəna, vi məpelik aka Maŋgəlva na, asilginik Kristu səka əmta, mbaraka dəsilgin ɓa, an gesiŋgi ɗiy mimtit awsilyoŋ səka əmta ɓa.

¹⁶ Vi an ɗiy mimtit awsilyoŋ səka əmta ɓa, asna Kristu pak dəsil səka əmta ɓa.

¹⁷ Ya an Kristu dəsil səka əmta ɓa, asna ətaf nokum ɗari, mənokum tat addəv mambray nokumə'e,

¹⁸ as kan na, ɗiy məs dəmtaŋ addəv Kristu azaŋka.

¹⁹ An məɗiyək əga nam aka Kristu vi ammba ənziya eggeŋ kaka'ə, asna mənamtə na sahã daykiyit ɗiy pakə.

²⁰ Ya kakaŋ na, Kristu asilik sə walaŋgit ɗiy mimtiti, ndəni dadabya net ɗiy mimtit dəsilyoŋgu.

²¹ Vi, adan əmta adek də ɗəf taka. Vaski yi'e, də ɗəf taka əsilye net ɗiy mimtit adazzani.

²² Va ɗiy pak adamtaŋ vi əsap net də Adam. Vaski yi'e addəv Kristu adawrahaŋ zeŋgile,

²³ ya naway pak də gəlani: Kristu wi daabəŋ, siske, pay əzza nan na, ɗiy na Kristu.

²⁴ Asna wəgrak na dələv wagəɗə an amndagan sənək əzəm məlĩ sən Maŋgəlva Afəni, an azanək dələv net milyeŋge, gagdaka, gəm əɓap pakə.

²⁵ Vi adahək dəzəmgən məlyã, hã gap an avoŋgitik məzuzelin pak ammba təlni.

²⁶ Məzuzel an dədirɓe faɗə nawzani, ndəni əmta.

²⁷ Vi avoŋgitik zəgeɗ pak ammba təlni, pay adawnəh na: Zəgeɗ pak məvoŋgiti ammba təlnəŋka, vasna mbəksa ɗəf an məs dəvoŋgit sən zəgeɗ pak ammba təlnəŋki.

²⁸ Pay adawvoŋgit sənən zəgeɗ pak ammba təlni, asna Wətən zək nan wavoŋgən kiyən ammba təl ɗəf məs dəvoŋgit sən zəgeɗ pak ammba tələn naka, vi Maŋgəlva dəsangən pak aka zəga pakə.

²⁹ An vaski ɓa na, mbar ɗiy en dədawtafaŋ baptem a gəlet ɗiy mimtit adaɗɗaŋ di? An gesiŋgi yi, ɗiy mimtit awsilyoŋ ɓa, vimi adawtafaŋ baptem a gəlet di?

³⁰ Vimi nam mədawsam aba mandara pay pak di?

³¹ Pay pak in tat əmta, milmiŋgiɗwa, gesiŋ mənokumtə ənnek naw addəv Yesu Kristu Daya namə.

³² An nəgəɗək əgay metiŋgin va ɗəf titir dit zəgeɗ darawit a Efesus, mi adawtər su di? An ɗiy mimtit awsilyoŋ ɓa, məzəm səmə, məsə səmə, vi mazayən waməmtə.

³³ Kədawzanən zukum ɓa! Ədaw də ɗəf mbərayən waraygən ənziya an moggon na ɗəfa.

³⁴ Məziwgin maɗɗulokum təstəsə, kədaɗɗaŋ mambray ɓa, vi ɗiy meɓɓet tahəŋ də əsən na Maŋgəlva ɓa. Nənah vasna sən ərba wil nokumi.

Gəɓa zit ɗiy en dəsilyoŋ səka əmta

³⁵ Kuzuŋ ɗəf wanah na: Mbarmbari ɗiy mimtit adawsilyoŋ di? Də gəɓa zit awan adassoŋ di?

³⁶ Dərwa! Nok, an kədazlga, an dəmtə ɓa na, asan na madaran ɓa.

³⁷ An məs kədaslga na, an dəgil kədazlga ɓa, zeŋve yi, an haykəmari yi awaniɓa zəgeɗ meɓɓetiŋgə.

³⁸ Maŋgəlva tay əpsən gəɓa zə zeŋve va aŋgələ. Zeŋve awandi pak də gəɓa zəni.

³⁹ Sluw zəga pak məstaka yi də an na maɓɓan ɓa. Sluwit ɗiy awɗakək də sluwit zəgeɗ memeyẽɗi, də sluwit biŋgeɗi, də sluwit kilfeŋge.

⁴⁰ Zəgeɗ na disiŋ tahəŋ, zəgeɗ naka dəlvafuŋ tahəŋ ɓa. Gagdak net zəgeɗ na disiŋ awɗakək də gagdak net zəgeɗ naka dəlvafuŋgu.

⁴¹ Lelew na pay tay temme, lelew na təla tay temme. Lelew net ngərzleɗ tay temme. Lelew na ngərzla maɓɓan awdayki na an maɓɓani.

⁴² Vaski yi'e əsilye net ɗiy mimtiti. An naŋgənay məndəka. An məza aŋgəna ɓa yi nawsilyeni.

⁴³ An məndəkən nawzeli, wasil də gagdaka. An məndəkən məddakni, wasil də əɓapa.

⁴⁴ An məndəkən sluwi, wasil əmpəsa. An gəɓa zən na slu tayi, asna na əmpəs tayi'e.

⁴⁵ Vaŋki yi'e məverni: Adam ɗəf maddaabəŋ akkpaŋgək ɗəf də zeŋgilen madarani, ya Adam an dədirɓe akkpaŋgək əmpəs məzəpsən zeŋgile.

⁴⁶ An na əmpəsi daabəŋ ɓa, an na gəɓa zəni daabəŋ, siske na, an na əmpəsa.

⁴⁷ Ɗəf an daabəŋ məɗɗan də dələv na naka dəlvi. Ɗəf masula'ən sə disiŋ ade.

⁴⁸ Va an məɗɗan na dələv asani vaski en məɗɗet na dələv assoŋgu. Va an na disiŋ asani vaskəŋgə'e en na disiŋ.

⁴⁹ Va məgil səɗek va an məɗɗan na dəlva, waməgil sədəki'e va an na disiŋ.

⁵⁰ Aŋki an nədarbani milmiŋgiɗwa: An slu zəni gəm mbelin atoŋ na məlĩ na Maŋgəlva ɓa. An naŋgəna azəm na gəla aza an aŋgən na ɓa ɓa.

⁵¹ Məɗama nədarban sukum yaŋka: Mənam pak mədamta ɓa, ya mənam pak gəɓa zəm wakkpaŋgə.

⁵² Wagəɗ go' va hara ɗəf adaɗɗa pilim pay gozloro an dədirɓe faɗ adaffo, vi gozloro waffu, asna ɗiy mimtit wasilyoŋ də zit an aŋgən na ɓa, ya namə, gəɓa zəm wakkpaŋgə.

⁵³ Vi aslək zəm an naŋgənaŋ dəgulgən zəm an məs naŋgənay ɓa gəm zəm an namtaŋ dəgulgən an məs namtay ɓa.

⁵⁴ An zəm naŋgənaŋ aguluk zəm an məs naŋgənay ɓa gəm zəm namtaŋ aguluk zəm an məs namtay ɓa, asna əpel məvernəŋ waknahə: Əskawəla asɗəkək əmta.

⁵⁵ Əmta ngay əskawəla nok di? Əmta ngay gbogboŋ nok di?

⁵⁶ Gbogboŋ na əmta mambray yi, əɓap na mambray tam mahenziŋgi.

⁵⁷ Ya soko sən Maŋgəlva, məs dəpsəm əskawəla də Daya nam Yesu Kristu.

⁵⁸ Vini, milmiŋgiɗu na makrawa, məssoŋ ɓəlɓələ, kədaɓlaŋ ɓa. Məddoŋ abe abe addəv wəza na Daya pay pakə, məsən na əzəm sahã nokum asan na ɗar addəv Daya ɓa.