1Korintus 14 - Bible en Guidar

An dərbə dəwəlsən əvəl na Zeŋgile Salala

¹ Məkaya əŋgla. Mokum dəsan aka əvəl na əmpəsa, sasak əɗɗa kəleŋgi.

² Vi ɗəf məpel də ma temtem məs məsəni ɓa, sit ɗiy adawpel sit ɓa, sən Maŋgəlva yi, vi ɗəf tay naprəmən ɓa, də Əmpəs adawpel an dəsan məɗama.

³ Ya ɗəf məzəɗɗa kəleŋ na, sit ɗiy adawpel siti, kawɓaygiti, kahheɗeti gəm kasɓeti.

⁴ Ɗəf məpel də ma temtem məs məsəni ɓa, ki zən adasɓan kaka'ə. Ya ɗəf məgəɗ kəleŋ na, ɗiy na Maŋgəlva adawɓeygiti.

⁵ Nəŋgələk kəpeleŋgən pak nokum də ma temtem məs məsəni ɓa kəta, ya an nəŋgəl day na, kəɗɗaŋgən kəleŋ. Məgəɗ kəleŋ adayək ki məpel də ma temtem məs məsəni ɓa, abbər an ɗəf van amanək ma vani ka əsap net ɗiy na Maŋgəlva dərahgən an nasɓani.

⁶ Ya kakaŋ na milmiŋgiɗwa, an nədek anokumda, nəpel sukumək də ma temtem məs məsəni ɓa, aza mi nədawtər sukum wəray an əpel naw dəki sukum ərba ɓa, əsən ɓa, kəleŋ ɓa awaniɓa əyak ɓa di?

⁷ Vaski yi'e də ɓaɓəlma net zəgeɗ nasmaya, va pozloro gəm dəgəlla, an ɓaɓilmet duɗak ɓa na, mbarmbari adawsənən na pozloro iyi awaniɓa dəgəlla iyi di?

⁸ Ya an ɓaɓəlma gozloro tay əgiyen ta' ɓa na, naway nawsla zən nawgay di?

⁹ Vaski yi'e nokum, an mənokum tat əpel an naprəm ɓa na, mbarmbari ɗəf adawsən an məs kəpeleŋ di? An vaski na, aka səmyã kədawpeleŋgə.

¹⁰ Ma tay temtem diyɗa addəv dəlva, ya tay an məs məza aŋgəl ənah ɓa ɓa.

¹¹ Ya an nəsən an aŋgəl ənah ɓa, in tat va dərwa aza ɗəf məpele, ɗəf məzupel van tam tay va dərwa azawa.

¹² Vaski yi'e nokum, adan mokum tay sirsir aka əvəl na Əmpəsa, məgay əkayan zukum soksoku vi nawɓeygit ɗiy na Maŋgəlva.

¹³ Vini, ɗəf məzupel də ma məza məsənni ɓa, dəkkamə dərargən əvəl nawɓap əbotoni.

¹⁴ An in tat əkkam də ma məza məsənni ɓa, əmpəs naw tay əkkama, ya əsən naw tay əɗɗa wəza ɓa.

¹⁵ Ya mbari kan di? Wanəkkam də əmpəsa, ya anəkkam də əsəna'e. Anəyə gəlya də əmpəsa, ya wanəya də əsəna'e.

¹⁶ Ya an is tat əfet aka Maŋgəlva də əmpəsa, ɗəf an ɗar na waloŋkum dəpas mbar adawzlan Amin ammba əfet nok di? Adan dəsən an kədawpel ɓa di?

¹⁷ Vi əkkam nok moggoni, ya asɓan na ɗəf mbərnəs ɓa.

¹⁸ In tat əɗɗa soko sən Maŋgəlva, vi in tat əpel də ma məza məsənni ɓa day kikum.

¹⁹ Ya addəv əsap net ɗiy na Maŋgəlva na, ɗəɗah nəpel wən sle' appaka ta' ta' nawsən net ɗiyi nawɓaygiti, ki in əpel wən temtem də ma məza məsəni gabal kəlawə.

²⁰ Milmiŋgiɗwa addəv əɗɗum kəssoŋ kirin memeɗeŋge ɓa. Ya aza mambray na, məssoŋ kirin memeɗeŋge. Addəv əɗɗum na, məssoŋ va ɗiy gugriɗe.

²¹ Məverin addəv mahenziŋ na: Wanəpel sit ɗiyiŋ dit ɗiy məpeleŋ ma məza məsənni ɓa, də ma net temme. Ya də as pak zlaŋ, aprəmən na maw ɓa, Daya anahə.

²² Vasna, əpel də ma məza məsənni ɓa, tay viyit məs dətafaŋ ɓa, viyit məza dətafaŋ ɓa yi. Ya kəleŋ na, tay viyit məza dətafaŋ ɓa ɓa, viyit məs dətafaŋgi yi.

²³ An ɗiy na Maŋgəlva akkalaŋgə a təki taka, yaŋ pakgit adawpeleŋ də ma məza məsənni ɓa na, ya an ɗiy-ɗarə awaniɓa məza dətafaŋ ɓa atoŋgoŋguk arokum na, anahaŋ na mətemkum kənanəni ɓa sa?

²⁴ Ya an pakgit tay əɗɗaŋ kəleŋgi, an ɗəf məza dətaf ɓa awaniɓa ɗəf ɗarə, atoŋguk arokum na, wən nan warma, watawwən akani.

²⁵ Əɗɗum məɗama na makran warbə. Asna, watək kiyən afuŋ kappu' aba Maŋgəlva, wanah na, gesiŋ Maŋgəlva tay a walaŋkum.

An dəslə a təki əkkala

²⁶ Mbar kan di milmiŋgiɗwa? Pay kədakkalaŋgə, ɗəf mbərən də gəlyanalva, ɗəf mbərən də əyaka, ɗəf mbərən də hənhən, ɗəf mbərən də ma məza məsənni ɓa, ɗəf mbərən əman ma məza məsənni ɓa vani, zəgas pak dəsangən vi naway pak dəɓaygəni.

²⁷ An ɗəf tay dədawpel ma məza məsənni na, adawday kiyit ɗiy sula awaniɓa hoku ɓa, də mabərki ziti, gəm ɗəf dəmani.

²⁸ Ya an ɗəf nawman tay ɓa, ɗəf məzupel də ma məza məsənni ɓa van dəsan ɓatɓat aret ɗiyi, dəpel sən zəni gəm sən Maŋgəlva.

²⁹ Dəwəl sən kəleŋ na, ɗiy sula awaniɓa hoku dəpeleŋgi, ɗiy meɓɓet dəkosonəni.

³⁰ An ɗəf mbərən səret ɗiy məs dəssoŋ ɗewɗew arah hənhən na Maŋgəlva. Asna ɗəf an daabəŋ dəɓətə.

³¹ Wakəɓapən əɗɗa kəleŋ baymokum naway pak də pay nani vi ɗiy pak dəyakaŋgəni gəm dəsɓaŋgəni.

³² Məskəleŋɗeŋ migil əmpəs na kəleŋ məs dədahheɗeti.

³³ Vi Maŋgəlva na matakatakay ɓa na zazay yi. Va adaɗda addəv əkkal net ɗiy na Maŋgəlva en salala təki pakə.

³⁴ Gil dəssoŋ ɓatɓat addivit əkkalɗe net məzutafaŋgə. Vi məpəl siti tive dəpeleŋgən ɓa, dəvoŋgənən kiyti, vaski yi'e mahenziŋ anahə.

³⁵ Ya an met aka əprəman gabba wən na, dəssohetin zilgiɗit eŋgili. Vi zəga net wili an guluk tat əpel addəv əkkal net ɗiy na Maŋgəlva.

³⁶ Sənokum da əpel na Maŋgəlva agil sa awaniɓa sukum takərgukum ade?

³⁷ An ɗəf tay əɗɗum na məskəleŋgi awaniɓa arahək əmpəs na Maŋgəlva, dəsən na, an nədawver sukuməŋka mahenziŋ na Daya iyi.

³⁸ Ya an ɗəf nan dəsən ɓa, Maŋgəlva pak dəsən ɗəf van ɓa.

³⁹ Vini milmiŋgiɗwa, mokrokum dəsan aka əɗɗa kəleŋ, ya mətakni əpel də ma məza məsəni ɓa ɓa.

⁴⁰ Zəga pak dəsan va an dəslə də tiveni.