1Korintus 13 - Bible en Guidar

Əŋgla

¹ An nəsənək zəga hã in əpel də ma net ɗiy temtem gəm də ma net maslayɗe pakə, ya an in tat də əŋgla ɓa, naw nəgilik va təbəz pepreŋ məzəzləndəma awaniɓa va nday məɗiyaŋ geŋgere.

² An in tat də əsən naɗɗa kəleŋ gəm nawsən an məɗama pakə, awaniɓa an in tat də ətaf gala nawzargit mossorgoɗe gugriɗe dəndəni, an in tat də əŋgla ɓa, nəgap zəga ɓa.

³ An nuɗakək arya naw pakə, an nəppanək zu əzla vi kawrəh gagdaka, ya an in tat də əŋgla ɓa, də as pak, tay an adatəru ɓa.

⁴ Əŋgla waɓəsə, əŋgla zəga moggoni, əŋgla aɗɗa kotorok ɓa, awɗi ki zən ɓa, awkaɓgən zən ɓa.

⁵ Aɗɗa zəga net wil ɓa, an nawtərsən anan kaka adawkayan ɓa, awdagədəv ɓa, arma ɗəf a makran ɓa.

⁶ Annnek də mambray ɓa, də gegesiŋ adanneken zəni.

⁷ Appan wən sə makran pakə, awtaf zəga pakə, awga zəga pakə, awɓəs zəga pakə.

⁸ Əŋgla awza kpak ɓa. Kəleŋ wazə, əpel də ma temtem pak wagrakə, əsən wazə.

⁹ Vi əsən namə də meŋgeyi, kəleŋ nam pak də meŋgeyi.

¹⁰ An, an dəsan gərrak arbanək zəni, an dəsan də meŋge wazə.

¹¹ Aka nəsaw muzliya, va muzliya nədawpele, va muzliya, nədaɗɗumo, va muzliya nədaɗɗa zəga. Səza nəkkpaŋ ɗəfa, nəppan zəga na muzliya.

¹² Vi kakaŋ mənam tat ulan va addəv zəga nawla hara ɗəfa, lufluf ɗarə, ya asna haram də harani. Kakaŋ əsən naw də meŋgeyi, ya asna, wanəsən lewlewi va asənwa.

¹³ Kakaŋ kan na, zəgeɗ hokiŋ tahəŋ: Ətafa, əga gəm əŋgla. Ya an dəday kiyit pak na əŋglay.