1Korintus 12 - Bible en Guidar

Əvəl na Zeŋgile Salala

¹ Aka an dəwəl sən əvəl na Əmpəs na milmiŋgiɗwa, maw tay aka kəssoŋgən slamma ɓa.

² Kəsənnənəka, aka pay kəssoŋ ɗiy-ɗarə, əsa nokum tay əkukum va ərda azet zəgeɗkamaŋgəlva, awpel ɓa.

³ Vini nədarban sukum na: Ɗəf tay nawpel an Əmpəs na Maŋgəlva armak na: Yesu məraygəni ɓa. Ya ɗəf tay nawpel na Yesu Daya iyi an Əmpəs na Maŋgəlva dərban sən ɓa ɓa.

⁴ Əvəl tay temtemi, ya səza Əmpəs məstakay.

⁵ Wəza tay temtemi, Daya takay hara.

⁶ Əɗɗa wəza tay temtemi, ya Maŋgəlva məstaka dədaɗɗa zəga pak addivit ɗiy pakə.

⁷ Əvəl na Əmpəs na Maŋgəlva tay ərba addəv ɗəf pakə, ka dətərgən wəray azet ɗiy pakə.

⁸ Sən ɗəf maɓɓani, Əmpəs əpsən dəpelgən də maɗɗula, sən ɗəf maɓɓani, Əmpəs van əpsən dəpelgən də əsəna.

⁹ Sən ɗəf maɓɓani, Əmpəs əpsən ətaf nawziw ɓəlɓələ, sən ɗəf maɓɓani, Əmpəs taka vanəs əpsən əvəl na mbəlembəle nawmbəlgit ɗiyi.

¹⁰ Sən ɗəf maɓɓani, tay əpsən əɓap naɗɗa sekeneɗi, sən ɗəf maɓɓani, əɓap naɗɗa kleŋ. Sən ɗəf maɓɓani, əpsən uɗakan Əmpəs na Maŋgəlva də əmpəs an ɗarə. Sən ɗəf maɓɓani, əpel də ma məs məsəni ɓa, sən ɗəf maɓɓani, əman ma məs məpelin.

¹¹ Ya zəgeɗis pak Əmpəs an taka gəm an məstakayi pak dədaɗɗeti, tay əpsən ɗəf pak va aza aŋgələ.

Gəɓa zə ɗəf taka dit masleŋsləŋɗe diyɗa

¹² Va gəɓa zə ɗəf asan taka, masleŋsleŋgən tahəŋ diyɗa, masleŋsleŋgən gəɓa zə ɗəf tahəŋ diyɗa, gəɓa zə ɗəf taka, vaski yi'e Kristu.

¹³ Vi addəv Əmpəs məstaka mənam pak mərah əslslay iŋkile na baptem, kəta dəssoŋ mə Yudeɗi, kəta dəssoŋ mə Gərekɗe, kəta dəssoŋ belemɗe, kəta dəssoŋ ɗiy na kiyti, pak səza Əmpəs taka mərah əsa.

¹⁴ Vi gəɓa zə ɗəf masleŋsleŋgən takay ɓa, masleŋsleŋgən diyɗaŋgə.

¹⁵ An təl ɗəf anahək na: Naw va ɗəf nan ɓa, vini naw nəsap də gəɓa zə ɗəf ɓa. Ɗə as pak na, gəɓa zə ɗəfi ɓa sa?

¹⁶ Ya an sləma ɗəf anahək na: Naw hara ɗəf nan ɓa, vini naw nəsap də gəɓa zə ɗəf ɓa. Ɗə as pak na, gəɓa zə ɗəfi ɓa sa?

¹⁷ Va gəɓa zə ɗəf pak hara ɗəfi na, aŋgay əprəm di? Va pak sləma ɗəfi na, aŋgay əffok di?

¹⁸ Ya kakaŋ na, Maŋgəlva asapetik masleŋsleŋɗe aza gəɓa zə ɗəf pak va aŋgələ.

¹⁹ Va masleŋsleŋɗe naza gəɓa zə ɗəf pak takaŋ kaka na, aŋgay gəɓa ɗəf di?

²⁰ Ya kakaŋ na, masleŋsleŋɗe diyɗaŋgə, gəɓa zə ɗəf taka.

²¹ Hara ɗəf aɓap na ənah sən va ɗəf na: Wəray naw tay də is ɓa ɓa. Awaniɓa ki ɗəf aɓap na ənah sən təl ɗəf na: Wəray naw tay də is ɓa ɓa.

²² Ya an dayki asna, masleŋsleŋɗe naza gəɓa zə ɗəf məs mədawla va məddektiŋki, tahəŋ də ətərwəray day.

²³ Ya en naza gəɓa zəm en məs tahəŋ də sləma ɓa, aket mədazlga sləma dayə. En məs mədawɗemeti, anet mədazga sləma aket dayə.

²⁴ Ya en məs dəslaŋgə wəray tay nawɗemet ɓa. Maŋgəlva asapanək gəɓa zə dəf pak də əpsit gagdak sit en məgisti.

²⁵ Vi uɗak adawsan addəv gəɓa zə ɗəf ɓa, ya dəssoŋgən də əbbah sən ziti.

²⁶ Ya an masleŋsleŋ taka tay əzəm sahã, masleŋsleŋɗe pak tay əzəmaŋ sahã dəndəni. An məgagdakani masleŋsleŋ taka masleŋsleŋɗe pak wassoŋ zit nek dəndəni.

²⁷ Munokum pak gəɓa zə Kristu kənanaŋgə, ɗəf pak masleŋsleŋgəni.

²⁸ Ya en Maŋgəlva aɗi addivit məzutafaŋ daabəŋ na: Maslənɗe, masulani məskəleŋɗe, mohokeni məzərbanzəga, siske na, əvəl naɗɗaŋ sekene, siske əvəl nawmbəlgit ɗiy, nabbaha, nawdawgit ɗiyi, gəm nawpel də ma temtemi.

²⁹ Ɗiy pakəŋ maslənɗe sa? Pakəŋ məskəleŋɗe sa? Pakəŋ mərbaŋzəga sa? Pakəŋ məɗɗaŋ sekeneɗ sa?

³⁰ Pakəŋ də əvəl nawmbəlgit ɗiy sa? Pakəŋ məpeleŋ ma temtem sa? Pakəŋ məmanən ma sa?

³¹ Məssoŋ də əŋgla nawkayan əvəl an dəday pakə. Wanərban sukum tive na əvəl an moggon day pakə.