1Korintus 11 - Bible en Guidar

¹ Məgəm təlwa va naw nəgəm təl Kristu.

Ənziya addəv Gəla-na-Maŋgəlva gəm əɗi kiya ( 11:2—14:40 ) Adahək guluk təsərətgən kiyət pay nawpal Maŋgəlva

² In tat əfet akokum vi munokum tat əɗɗum akaw addəv zəga pakə, munokum tat əzbet əsərəkɗe va nərbet sukum.

³ Ya nəŋgələk kəsənəngən na: Kristu wi daya na ɗəf mizilin pakə, ɗəf mizilin daya nat gulku. Maŋgəlva yi daya na Kristu.

⁴ Ɗəf mizilin pak, an tay əkkama awaniɓa tay əɗaɗa kəleŋ kiyən sərətta na, daya nan adarbə sən wili.

⁵ Ya guluk pak, an tat əkkama awaniɓa əɗaɗa kəleŋ kiyət mekeleŋ, wil tədarbə sən daya nata, vi məstakayi va təfaɗək kiyta.

⁶ An guluk tawsərət kiyit ɓa, asna təfiwwe, ya an ərba wili azat guluk nawfiw kiyta awaniɓa nawfaɗən na, asna təsərət kiyta.

⁷ Ya ɗəf mizilin na, adawsərət kiyən ɓa, vi nan səɗek na Maŋgəlva gəm gagdak nani. Ya nat guluk na, gagdak na ɗəf mizilintə.

⁸ Vi ɗəf mizilni dəgil səzat guluk ɓa, guluktə təgil səza ɗəf mizilin.

⁹ Ya məzəməɗni ɗəf mizilin viyit guluk ɓa, guluktə məzəməɗət vi ɗəf mizilin.

¹⁰ Sən aski guluk tədawsərət kiyita ərban gagdak na zilta, sən wən net maslayɗe.

¹¹ Də as pak, guluk tuɗak də ɗəf mizilin ɓa, ɗəf mizilin duɗak dət guluk aba Daya ɓa.

¹² Vi va guluk təgil səza ɗəf mizilin, vaski yi'e ɗəf mizilin dət guluk muwani. Ya pak səza Maŋgəlva ade.

¹³ Mətawwən nan sən kiykum: Aslək guluk təkkamangən Maŋgəlva kiyət mekeleŋ sa?

¹⁴ Magu zək nan tay ərban sukum na ərba wili an ɗəf mizilin appanək muhur kiyən zek ɓa sa?

¹⁵ Ya gagdaki azat gulku an muhur kiyət tay zeki, vi məpsət muhur zezek na a gəla məsərət kiyay.

¹⁶ An ɗəf tay dəŋgəl əbay ma na, asna anənah sən na: Mənam tat də zev əsərəkəs ɓa, ɗiy na Maŋgəlva pak tahəŋ dəndən ɓa.

Way na Daya

¹⁷ Aŋki nədawɗi wən nani, nəfet na akokum ɓa, vi əkkal nokum akukum na abe abbər əgəɗ sukum mbərayən ɓa.

¹⁸ Dabəŋ nani, nəprəmək an kəkkalaŋgək na uɗak tay a walaŋkum. Nətafək na wasan gesiŋgi.

¹⁹ Aslək uɗak dəgəɗgən a walaŋkum vaska, vi kawsən ɗiy en nawziweŋ aba əsla vani.

²⁰ An munokum tat əkkal kan na, vi kawzəm way na Daya gesiŋgi ɓa,

²¹ vi naway di pak tay əɗɗa kakara əgəm way nan pay kədawzəmaŋgə. Vasna ɗiy meɓɓet əssoŋ də mãya, tak ɗiy meɓɓet abaŋgək hã mbazla əbeyti.

²² Mənokum tat də gəla kəzəmaŋgə gəm kəsaŋgə ɓa sa? Awaniɓa ɗiy na Maŋgəlva kədawzeletin gəm mokum aka ərba wil sit ɗiy en tahəŋ də zəga net ɓa sa? Mbar kəŋglaŋ nənah sukumgən di? Nəɗigən kikum sa? Gesiŋ nəɗi na kikum aka as ɓa.

²³ Vi aŋki an nərah səza Daya, ndəni nədarban sukum: Daya Yesu, dəfəɗ məs məppan avet məzuzelini, agəmək mepteke,

²⁴ agəɗək soko sən Maŋgəlva, arɗanəka, amna: Aŋki gəɓa zuw vikum. Məɗɗa vaska vi kəɗɗumowəngəni.

²⁵ Vas agəɗə'e dət huloŋguk nawsa zəga sə dərɓaga azəmən waya, amna: Huloŋkəŋkə, ndətə wənmiynan meleketeni miynan dit mbel nawa. Pay məs kədawsaŋ səddəvət pakə, məɗɗa vi kəɗɗumowəngəni.

²⁶ Pay kədawzəmaŋ məptekeŋ pak gəm əsa səddəvət huloŋ kəŋ pak na, alabara na əmta na Daya kədarbanən hã gap pay adazani.

²⁷ An ɗəf tay əzəm mepteke na Daya awaniɓa tay əsa addəvət huloŋ nani, məza də tiven ɓa na, mbərayən agəɗ aka gəɓa zə Daya gəm aket mbel nani.

²⁸ Vas kan na, ɗəf pak dula ki zəni, an wazəm mepteke gəm əsa səddəvət huloŋku.

²⁹ Vi ɗəf məs dəzəm gəm dəsə məza duɗakan gəɓa zə Daya də əzəm an maɓɓan ɓa, ətawwən adawki akan də əzəm gəm əsa nani.

³⁰ Sən aski ɗiy diyɗa sə waloŋkum tahəŋ gbəgbaɗe, məddekti gəm diyɗa amtaŋka.

³¹ Ya an məkosonək ki zəmə, asna kawtawi wən akam ɓa.

³² Ya an Daya atawək wən akamə, əzga' adazgasəmə vi mədawsam mətawwən akam sap də ənziya egge ɓa.

³³ Vini, milmiŋgiɗwa, an kəkkalaŋ vi kawzəm way na Daya, məga zukum pakə.

³⁴ An ɗəf tay də mãya, dəzəm siŋgili, ka əkkal nokum adawki ətawwən akokum ɓa. An dəpəl na, wanəzaɓan pay nədazaw anokumda.