1Korintus 10 - Bible en Guidar

Əzga aka wən net zəgeɗkamaŋgəlva

¹ Milmiŋgiɗwa, nəŋgəl kəssoŋgən slamma ɓa, efiŋgiɗəm pak assoŋguk ammba slaybuna, baymet pak akkaɗaŋgək ki pehe Pepreŋge.

² Ndəɗaŋ pak arəhaŋgək baptem addəv slaybuna gəm a pehe nazban Moyis.

³ Ndəɗaŋ pak azəmaŋgək way an məstaka dəde sə disiŋ.

⁴ Ndəɗaŋ pak asaŋgək əsa an məstaka dəde sə disiŋ. Asaŋgək addəv milɓe na əmpəsa məs dədaw dənɗaŋ, milɓe nan ndəni Kristu.

⁵ Də as pak, Maŋgəlva dənnek də vadaysa net ɓa, vi kigəbayit asanək kpororo a kapta-muyã.

⁶ Zəgeɗiski, tahəŋ abamə vi mədawsim zəga mbərayən va net asimnənəŋ ɓa.

⁷ Kədakkpaŋgaŋ məzbaŋ zəgeɗkamaŋgəlveɗ va meɓɓet səret ɓa, va məverin na: Ɗiy assoŋguk kawzəma, kawsa, ndəɗaŋ le kasmaya.

⁸ Mədappan zəm sən polkoyo va net ɗiy meɓɓet səret, amtaŋgək gabal kaklaw sula kiyən hoku aka pay taka.

⁹ Mədawsla naza Kristu va net ɗiy meɓɓet səret aslanən ɓa, dohõɗe azetinke.

¹⁰ Kədaɗɗaŋ wərwər va net ɗiy meɓɓet səret aɗɗaŋ wərwər ɓa, məzet ɗiy azetike.

¹¹ Zəgeɗis pak aɗɗaŋ aket na, vi karban sit ɗiy meɓɓeti. Məverit na vi kazgasəmi, mənam məs məgap aza pay nagraka.

¹² Vini, ɗəf məs dədaɗɗum na tay ziwwe, dəzi zəni adazbər ɓa.

¹³ Wərak məs dərukum pak gala ɗəfi. Maŋgəlva təstəsi appan na tive sən wərak dədaygən kiykum ɓa. Addəv ərak na, wapsukum gbogboŋ nawgilye səddəvən gəm nawɓəsən.

¹⁴ Vini kana, bayneŋgiɗwa, məzar səza əɗi ki zəgakamaŋgəlva.

¹⁵ In tat əpel sukum va sit ɗiy məs də maɗɗuleti. Məɗɗumon wən məs nədawnahəŋka.

¹⁶ Huloŋguk na əzaɓ mədagəɗ sən soko sən Maŋgəlva vitəŋ na əsap dit mbel na Kristu tə ɓa sa? Məpteke məs mədarɗanəŋ na əsap də gəba zə Kristuwi ɓa sa?

¹⁷ Adan mepteke taka yi, də məsam diyɗa pak zəm taka yi, vi mənam pak məsapək aka mepteke taka.

¹⁸ Mula mə Israyelɗe: Nam na məzəmaŋ slu na əzaɓ-maŋgəlva sən tuya na asapaŋgək də matuya ɓa sa?

¹⁹ Mi nədaŋgla əpel di? Sluw nawzaɓ-maŋgəlva sən zəgakamaŋgəlva na wasan də ətərwəraya awaniɓa zəgakamaŋgəlva yi də ətərwəray sa?

²⁰ Ya zəga mətawən nawzaɓ-maŋgəlva net sit tuyeŋge yi ɓa na sən Maŋgəlva adawtawən ɓa, ya maw tay aka kəsapaŋgən də tuyeŋge ɓa.

²¹ Kəɓapən na əsa zəga addəvət huloŋ na Daya gəm addəvət huloŋ net tuyeŋge ɓa. Kəɓapən na əzəm way na Daya gəm an net tuyeŋɗe ɓa.

²² Awaniɓa mam aka əsilgin kotorok na Daya sa? Gbogboŋ mənan daykiyən sa?

Əɗɗa zəga pak vi gagdak na Maŋgəlva

²³ Zəga pak məppani tive nani, ya paki moggon ɓa. Zəga pak məppani tive nani, ya pak dədawɓaygən ɗəf ɓa.

²⁴ Ɗəf adawkayan an natər sən wəray kaka ɓa, dəkayan an natər sən ɗəf maɓɓani.

²⁵ Məs adawvəlaŋ a lumo pak məzəm məza əssohõ akan sən əɗɗum na mokrokum ɓa.

²⁶ Vi dəlvafuŋ də an dəsan akan pak na Daya iyi.

²⁷ An ɗəf məs dətaf Maŋgəlva ɓa, ayukumək aka əzəm eŋgil annanda, an kətafənək əddo adaka, asna, an məs aɗi abokum pak məzəma məza əssoh akan sən na əɗɗum na mokrokum ɓa.

²⁸ Ya an ɗəf anah sukumək na: Aŋ slu na əzaɓ-maŋgəlva sən tuya yi na kədawzəmnən ɓa, vi ɗəf məs dəssak sukum gəm vi sən əɗɗum na mokrokum.

²⁹ An nədanəh na əɗɗum na mokrokuməŋ na, əɗum na mokrokum anokumi ɓa ya an na ɗəf maɓɓani. Vimi əɗɗum na ɗəf maɓɓan adawtaw wən aka əsa naw na kiyu di?

³⁰ An in tat əɗɗa soko sən Maŋgəlva aka an nədawzəma, vimi ɗəf maɓɓan adawɗi su dolgoy aka an nədaɗɗa soko sən Maŋgəlva di?

³¹ An əzəm kədawzəmaŋgə, an əsa kədawsaŋgə, zəga an kədaɗɗaŋ pak, məɗɗa vi gagdak na Maŋgəlva.

³² Kədassoŋ ka zəga nazbərgit ɗiy ɓa, sit mə Yudeɗi ɓa, sit Gərekɗe ɓa, mãy sit ɗiy na Maŋgəlva ɓa.

³³ Vaski, naw nədawsok zu ənneken zit ɗiy pak addəvit zəgeɗ pakə, məza əkayan an natər su wəray sən kiyu kaka ɓa ya an natər wəray sən vadaysa net ɗiyi, vi dəkõhoŋgəni.