1Korintus 1 - Bible en Guidar

Ətoŋ addəvən ( 1:1-9 ) Wəsɗa

¹ Səza Pol məs məyan dəsangən maslən na Yesu Kristu də əŋgla na Maŋgəlva gəm səza məlməmə Sostenes.

² Sit ɗiy na Maŋgəlva a Korintus, sit en dəppanən kiyit sən Yesu Kristu, məyet dəssoŋgən salala, dit en məzuyanən iya na Daya nam Yesu Kristu a təki pakə, Daya neti gəm namə.

³ Mbəlembəle də zazay na Afəm Maŋgəlva gəm na Daya Yesu Kristu dəsan sukum.

Əɗɗa moggon mərah səza Yesu Kristu

⁴ In tat əsokon Maŋgəlva naw pay pak aka wən nokum vi mbəlembəle na Maŋgəlva məs məpsukum də Yesu Kristu.

⁵ Vi dəndəni kəkkpaŋgaŋ məs aryeɗ addəv zəga pakə, na əpele gəm na əsən zəga pakə,

⁶ va əpel məpel aka Kristu asan ɓəlɓəl awalaŋkum.

⁷ Vas na əvəl na Maŋgəlva tay dəmbər sukum munokum məzuganən əzza na Daya nam Yesu Kristu əŋ ɓa.

⁸ Ndəni nawziwgukum ɓəlɓəl hã gap əgrak nani, vi kədassoŋ də wən akokum pay Daya nam Yesu Kristu adazzan ɓa.

⁹ Nawtafi wən na Maŋgəlva məs dəyukum addəv əsap də Wətəni, Yesu Kristu Daya namə.

Uɗak a walaŋgit ɗiy na Maŋgəlva ( 1:10—4:21 ) Uɗak awalaŋgit ɗiy na Maŋgəlva

¹⁰ Milmiŋgiɗwa, in tat əsɓokum də iya na Daya nam Yesu Kristu, ka mokum dəsangən taka, uɗak adawsan awalaŋkum ɓa, məsleri, kəssoŋgən əɗɗum taka gəm maɗɗulokum taka.

¹¹ Milmiŋgiɗwa, nəprəmək səmet ɗiy neŋgil ana Kolowe da na, əgay tay a walaŋkum.

¹² Nənah vasna, vi ɗəf sə walaŋkum pak tay ənəh na, naw na Pol nani, naw na Apollos nani, naw na Kefas nani, naw na Kristu nani.

¹³ Kristu awɗakək sa? Məkkpa'ni Pol aka məzliwrihe vikum sa? Awaniɓa də iya na Pol kərəhaŋ baptem sa?

¹⁴ In tat əsokon Maŋgəlva vi nəgəɗ baptem sən ɗəf təttaka səmbokum ɓa, abbər ki Krispus də Gayus.

¹⁵ Vi ɗəf adawnah na də iya naw kərahaŋ baptem ɓa.

¹⁶ Ya nəgəɗ baptem sit ɗiy neŋgil ana Estefanas da'e, dabərki aska, tay məs nəsən na nəgəɗ baptem sən ɗəfa ɓa.

¹⁷ Vi Kristu dəslənu wəɗɗa baptem abbər ki ərban alabara nenek ɓa, nərbangən məza də əsən na əpel ɓa, vi məzliwrihe na Kristu adawsan ɗar ɓa.

Yesu Kristu, əɓapa gəm maɗɗula na Maŋgəlva

¹⁸ Vi əpel aka wən na məzliwrihe na, va dərwa azet məzuzaŋgə, ya azet məs dəkõhoŋ na, əɓap na Maŋgəlva yi.

¹⁹ Vi məverni na: Wanəzan maɗɗula net məsmaɗɗuleti, wanəzgan əsən net məs əsən aketi.

²⁰ Ngay məsmaɗɗula di? Ngay mərbə-mahenziŋ di? Ngay məsən gabba wən na pay an kakaŋkəŋ di? Maŋgəlva dəkkpaŋgan maɗɗula naka dəlvəŋ ɗar ɓa sa?

²¹ Vi, adan ənziya egge də maɗɗula nani, dəsən Maŋgəlva addəv maɗɗula na Maŋgəlva ɓa, Maŋgəlva awlak lew nawkõhgit məs dədawtafaŋ də dərwa na ərban wəna.

²² Adan mə Yudeɗ adassohõŋ sekeneɗi, Gərekɗe tamə, əkayaŋ maɗɗula.

²³ Ya namə, mənam tat ərban Kristu məkkpa'ən aka məzliwrihe, azet mə Yudeɗ na, nazbərgiti yi; azet ɗiy-ɗar tamə, va dərway yi.

²⁴ Ya azet məs Maŋgəlva ayə, mə Yudeɗi gəm Gərekɗe, Kristu wi əɓap na Maŋgəlva gəm maɗɗula na Maŋgəlva.

²⁵ Vi va dərwa na Maŋgəlva adayək ki maɗɗula net ɗiyi, əddak na Maŋgəlva gbogboŋgi daykiyit ɗiyi.

²⁶ Mula milmiŋgiɗwa, aka kərahaŋ iya na Maŋgəlva: məsmaɗɗulet a maheret ɗiy tahəŋ diyɗa ɓa, ɗiy gagdakɗe tahəŋ diyɗa ɓa, ɗiy tektek tahəŋ diyɗa ɓa.

²⁷ Ya Maŋgəlva awelik zəgeɗ en ɗar naka dələv vi karbə sit wil sit məsmaɗɗuleti. Gəm Maŋgəlva awelik zəgeɗ meddekit naka dələv vi karbə sit wil sit məs gbogboŋɗe.

²⁸ Maŋgəlva awelik zəgeɗ ɗar naka dəlva gəm zəgeɗ məzelti, en məs tahəŋ ɓa vi kawzet en məs dəssoŋgu.

²⁹ Vi ɗəf adawgagdakan zən aba Maŋgəlva ɓa.

³⁰ Dendəni, nokum, kəssoŋ addəv Yesu Kristu, məs dəkkpaŋ maɗɗula dəde səza Maŋgəlva vimə, gəm əmpa təstəsə, salala gəm əbite.

³¹ Vi, va məverin na: Ɗəf məzukaɓa, dəɗi əkaɓ nan addəv Daya.