1Alabaraɗe Də Mabərkiziti 29 - Bible en Guidar

Wəvəl ammba ərka Gəla na Maŋgəlva

¹ Məlĩ Davit aɓsit ɗiy məkkelit pak na: «Wətu Salomoŋ əŋka, anani yi Maŋgəlva aweli, gawla yi, hizliwhizliwi yi. Ya wəza naɗɗa siɗikke yi ɓa, gəla narkaŋ sən ɗəfi yi ɓa, sən Yawe, Maŋgəlva yi.

² Nəppanək zu pak wəkkelet zəgeɗ narka Gəla na Maŋgəlva nawa, meleŋge sən zəga na meleŋge, təbəz babara, sən an na təbəz babara, təbəz pepreŋge sən an na təbəz pepreŋge; təbəz titire, sən an na təbəz titire; wəleŋɗe dəwəl sit wəleŋɗe; girmeŋge na hõlhõ, gərmeŋge meɓɓet nawveren gəla, gərmeŋge tuturɗe, gəm məslahẽt temtemi, zeŋvit gərmeŋge na sləma temtemi, gərmeŋge mə nzoloknzolok diyɗa.

³ Gəm addəv əŋgla nəŋglu Gəla na Maŋgəlva nawa, meleŋge də təbəz babar nawray vaw, nəziyək ammba Gəla na Maŋgəlva nawa, sap dit en nəkkelet ammba Gəla salala əŋka:

⁴ Nəpsənək meleŋge na Ofir, kilo gabal səkatə; təbəz babar saksak kilo gabal səkat sula də kaklaw poɗo, nakkəɗ zit Gəleɗe veti;

⁵ zəga an dəwəl sən meleŋge, dəwəl sən təbəz babara də wəza naɗɗa də vet ɗiy pakə. Naway məs makran dəkol napsən Yawe dəpaŋ di?»

⁶ Yaŋ deyeɗe net migil gəla gəm deyeɗe net mahəlfaɗe na Israyel, deyeɗe naket məzəlpaŋ gabal gabalə, naket səkat səkatə dit məzəɗɗaŋ wəza na məlĩ aɗiyaŋgək də mekret taka

⁷ yaŋ aziynin ammba wəza na Gəla na Maŋgəlva: meleŋge kilo gabal səkat də kaklaw buhulu, koɓeɗ na meleŋge gabal kəlawə, təbəz babar adayək ki kilo gabal səkat hoku, na təbəz pepreŋ wagəɗ hara kilo gabal səkat sləre, təbəz titir adayək ki kilo gabal təl gabal hoku.

⁸ En məs dit gərmeŋge na sləma avet aziyninik a təki nawɗi arya naddəv Gəla na Yawe ava Ye'iyel ɗəf na mahəlfa na Gerson.

⁹ Zit ɗiy annekik də wəvəl net sən Yawe də mekret paparə. Məlĩ Davit pak zən annekik diyɗa sawɓa.

Əkkam na Davit

¹⁰ Davit agagdakanək Yawe daret ɗiy məkkeltiŋ pakə, amna: «Gagdak azoko, Yawe Maŋgəlva na Israyel, afəm an lahəŋka hã faɗə.

¹¹ Yawe, mẽmẽtiŋge, əɓapa, əkekeɓe'e, gagdaka, əkasaka, vi zəga na disiŋ də an naka dəlvafuŋ pak noki yi. Yawe istə məlĩ də gagdak aka zəga pakə.

¹² Arya də gagdak səzok azzoŋgu, istə aket pakə. Avoki wəɓap də gbogboŋ pakə; tive nawɓaygən də əɓɓəlan an kəŋgəl pak avoki yi.

¹³ Ya kakaŋ na, Maŋgəlva namə, mənam tat əgagdakoko, mənam tat əɗi ki iya na əkekeɓe'e noko;

¹⁴ vi intə nawa di, ɗiy naw may nawaŋ mərahgən əɓap əvəl də makram papar vaŋkəŋ di? Vi səzok ade pakə, an məpsuk səvoki ade.

¹⁵ Vi molhõyẽɗ mənan aboko, melekeɗ mənan va efiŋgiɗmə; ənziya nam aka dəlvafuŋ tay va zeŋgile, tay mədawga nawrəh ɓa.

¹⁶ Yawe Maŋgəlva namə, zəgeɗ kpew kpewiŋ pak məkkalet narkə suk Gəla aka iya nok salalaŋ na, səvokəŋ, pak nokəŋgə.

¹⁷ Maŋgəlva nawa, nəsənəka, kakkesen makra ɗəfa, əssa təstəs kədaŋgla, naw makraw papar nəzi zəgeɗiŋ pakə, kakaŋ na ɗiy nok en neŋkiŋ in tat ulet əkisukun əvəl də zit nek mekret taka.

¹⁸ Yawe, Maŋgəlva na Abraham, na Isak, na Israyel, efiŋgiɗmə, azaɓan zev əɗɗuməs a mekret ɗiy nok faɗə, asɓan mekret ka noko.

¹⁹ Apsən geslne a makra Salomoŋ wətu dərmagən wəsəɓɗe noko, wəzga'ɗe dit mahenziŋɗe noko, vi dəzbangəni, dərkagən gəla məs nəkkalan zəga vinəŋka.»

²⁰ Yaŋ Davit anah sit ɗiy dəkkalaŋ pak na: «Məgagdakan Yawe Maŋgəlva nokum haya.» Ɗiy pak agagdakanənək Yawe Maŋgəlva net efiŋgiɗti. Aɓe'eŋke, appu'oŋguk aba Yawe gəm aba məlyã.

Salomoŋ məlyã

²¹ Mazayən nani, azaɓaŋgək-Maŋgəlva sən Yawe, adaŋgək əvəl nawzla kurmbuɗuk sən Yawe: Medgeɗgeɗe gabalə, ndergeyẽɗ gabalə, kirit timeŋgiɗ gabalə də mbazla nawpesl ammbeti, wəlet zəgeɗ mətewit diyɗa viyit mə Israyelɗe pakə.

²² Azəmaŋka, asaŋgək aba Yawe dəpas də zit mamyãk mamyãkə. Masulani aɗiynən Salomoŋ wətən Davit aka məlyã, məpeslən də mẽl dəsangən ka daya aka wəza na Yawe, Sadok ka məsdəlva.

²³ Salomoŋ asanək aka mazaŋga na Yawe ka məlĩ a gəla Davit afəni, adawək abani. Mə Israyelɗe baymet tahəŋ əprəmən mani.

²⁴ Deyeɗe baymeti, məzəlpaŋgə gəm kirtin məlĩ Davit dəwənnet pak apsənənək vet sən məlĩ Salomoŋ.

²⁵ Yawe aɓaygənək Salomoŋ ama heret mə Israyelɗe pakə, apsənək gagdak nawzəm məlyã, məlĩ tay dəsan aka Israyel daabəŋ kiyən va ndən ɗah ɓa.

²⁶ Davit wətən Yesse, azəmək məlĩ aka Israyel dəwənnani.

²⁷ Ənziya nawzəm məlĩ nan aka Israyel agəɗək əzva kaklaw poɗo: Azəm məlĩ a Hebron əzva buhulu gəm a Yerusalem kaklaw hoku kiyən hoku.

²⁸ Agalək diyɗa gala amtə, abək əzva, arya kənaykənayə, ɗəf gədakə; Salomoŋ wətən dəzəm məlĩ a gəlani.

²⁹ Alabara na məlĩ Davit, wətəŋ nan də wəgrak nan pak yeŋ məverit addəv ɗerewel na wəza na Samiyel məzula, na wəza na məskəleŋ Natan gəm na Gad məzula.

³⁰ Də əzəm məlĩ nani, makra nani, də zəga an dəgəɗ akani də aka Israyel gəm aket milyeŋge meɓɓeti.