1Alabaraɗe Də Mabərkiziti 28 - Bible en Guidar

Davit tay əwel Salomoŋ dəgəmgən gəlani

¹ A Yerusalem Davit akkelet deyeɗe na Israyel pakə, deyeɗe naket mahəlfaɗe, naket paŋɗe məzəɗɗaŋ wəza na məlyã, naket məzəlpaŋ gabal gabalə, naket səkat səkatə, naket aryeɗi gəm naket zəgeɗ memeyẽɗ na məlyã, gəm net kirtini, dit ɗiy mərgeti, məzəlpaŋ məs mekret dit en gembereɗi.

² Məlĩ Davit asilik aka tələn ziwi, yaŋ amna: «Məpak sləmokum məprəmwa milmiŋgiɗu dit ɗiy nawa. Nərmak a makraw narka Gəla, təki naffet na akoti na wənmiyna na Yawe gəm təki nawteŋ na Maŋgəlva namə, nəzaɓanək zu narkani.

³ Ya Maŋgəlva aɓsu na: “Kərkə su na Gəla aka iya naw ɓa, vi ɗəf nalpa kənani, kəgbo'uk mbeli.”

⁴ Yawe Maŋgəlva na Israyel awelwək sə daŋgla na əbba pak ka nəsawgən məlĩ aka Israyel faɗə, vi Yuda awel lahəŋ ka nawsan aket ɗiyi, səddəv gəla na Yuda, gəla na əbba, səret kirtin əbba, anaw aŋgəl nawɗiyu ka məlĩ aka Israyel pakə.

⁵ Səret kirtu pakə, vi Yawe avayək kirin diyɗa, awel Salomoŋ wətu dəsangən aka mazaŋga na məlĩ na Yawe, aka Israyel.

⁶ Yaŋ aɓsu na: “Wutuk Salomoŋ dədarka su Gəla dit daŋglaɗe nawa, vi anan nəwel ka wətuwa, naw nəsawgən ka afəni.

⁷ Wanəsɓan məlĩ nan ka faɗ an aziwik ɓəlɓəl də əzbet wəsəɓɗe naw dit tiveɗnanziya naw va pay dəpaŋka.”

⁸ Ya kakaŋ na, ama hara Israyeli pakə dəsan əkkal na Yawe, gəm a sləma Maŋgəlva namə: mərme, məkeyet wəsəɓɗe na Yawe Maŋgəlva nokum, vi dələv moggonəŋ dəsangən ka nokum, kəpsitingən kirtukum dərɓogokum ka faɗə.

⁹ Ya nok is wətu Salomoŋ na, asən Maŋgəlva na afuko, agəɗ sən wəza mokrok paparə, də megenegene zuko, vi Yawe tay əkkesen mekret ɗiy, tay uɗakan əɗɗumɗe pakə. An is tat əkayani, wappan suk zən kərəhgəni, ya an kəppanəka, nan wazgok faɗə.

¹⁰ Awla kakaŋka: Yawe awelkuk kərkəgən Gəla dəsangən təki salala. Ampa təlko, aɗɗa.»

Davit apsənək əver na gabba Gəla na Maŋgəlva sən Salomoŋ

¹¹ Davit apsənək əver na gabba Gəla na Maŋgəlva, net gəleɗe nani, nawzeɓet zəgeɗ nani, giziŋɗe na disiŋ, daŋgleɗe gəm gəla nawɗi ma akoti sən Salomoŋ.

¹² Apsənək zev va adarka gəleɗe en aɗɗum narka pakə, daŋgla na Gəla na Yawe gəm giziŋɗe tərwəsl kiyən, maha na arya na Gəla na Maŋgəlva, də an net zəgeɗ salala;

¹³ gəm na paŋgit məsdəlveŋge dit mə leviɗe, gəm wəzeɗe naɗɗa wəza addəv Gəla na Yawe pakə, gəm zəgeɗ na wəza naddəv Gəla na Yawe pakə.

¹⁴ An naɗɗa də meleŋge pak arban sənək gagdak na meleŋge nani, an naɗɗa də təbəz babara, arban sənək gagdak nan va wəza van adawgəma.

¹⁵ Gagdak na meleŋge net zəgeɗ nawɗi lalamɗe na meleŋge aketi, dit lalamɗe na meleŋge nani gəm gagdak net zəgeɗ nawɗi lalamɗe aketi dit lalamɗe net na təbəz babar pak va aza wəza neti.

¹⁶ Gagdak na meleŋge naɗɗa tabəl taka nawɗi way napsən Maŋgəlva aketi gəm təbəz babara, naɗɗe tabəlɗe na təbəz babara.

¹⁷ Təbzeŋge mayorkokɗe nawzəma, hiŋgiɗ naksu' zəga, hiŋgiɗ na meleŋge saksak va gagdak na hĩlĩw asan pakə, net hingiɗ na təbəz babara, va gagdak na hĩlĩw asani:

¹⁸ An dəwəl sən matuya nawzla tursan dəsan na meleŋge saksak də gagdak nani gəm an dəwəl sən zev mawta nawgaya, kerubaɗe na meleŋge məppar persleket pak pak aka akoti na wənmiyna na Yawe.

¹⁹ Baymanəs pak tay addəv an Yawe aver də vani, ndəni dəprəman su zeŋvit wəzeɗes pakə.

²⁰ Yaŋ Davit anah sən Salomoŋ wətən na: «Ampa təlko, asok zuko, aɗɗa kəgeslne' ɓa, mokrok adawzlah ɓa, vi Yawe Maŋgəlva, Maŋgəlva naw tay də isi. Appok na ɓa, azgok na firik ɓa, hã gap əgrak wəza naddəv Gəla na Yawe.

²¹ Paŋgit məsdəlveŋge dit mə leviɗe yaŋka, na wəza naddəv gəla na Maŋgəlva; dədassoŋ də is aka wəza pak ɗiy wassoŋ məs mekret dəpparə, dit en məs maɗɗulet naɗɗa wəza pakə; deyeɗe net ɗiy pak əpel nok adazbaŋgə.»