1Alabaraɗe Də Mabərkiziti 22 - Bible en Guidar

¹ Davit amna: «Aŋki gəla na Yawe Maŋgəlva, gəm aŋki matuya nawda əvəl nawzla kurmbuɗuk na Israyel.»

Əzaɓan wən narka Gəla na Maŋgəlva ( 22:2—29:30 ) Davit tay əzaɓan wən narka Gəla na Maŋgəlva

² Davit anahək nakkelet molhõyẽɗ naka dələv na Israyel, yaŋ azi məslmaŋ gərmeŋge dəslmaŋgən gərmeŋge narka Gəla na Maŋgəlva.

³ Davit akayək təbzeŋɗe diyɗa vi kawvot penteɗe net maddambeɗe dit məslakataɗe neti gəm təbəz pepreŋ məs gagdak nan awsla ɓa diyɗa.

⁴ Muguguleɗ na Liban aŋɗaŋ ɓa, vi mə Sidonɗe dit mə Tirɗe akiyaŋ sənənək muguguleɗ na Liban diyɗa sən Davit.

⁵ Davit adawnəh na: «Salomoŋ wətu gawlay hizliwhizliwi, gəla narkə sən Yawe əŋna, sləman dəgilgən ndundu aket dilveŋge pak sən mẽmẽtin nani gəm lelew nani. Vasna wanəkkelet sən zəgeɗ nani.» Davit akkeletik zəgeɗ diyɗa tak dəmtə ɓa.

Davit tay əpsən wəza narka Gəla na Maŋgəlva sən Salomoŋ

⁶ Ayak Salomoŋ wətəni, aɗi sən wən narkə sən Gəla sən Yawe Maŋgəlva na Israyel.

⁷ Davit van aɓsən Salomoŋ na: «Wətuwa, tay a makraw narka Gəla aka iya na Yawe Maŋgəlva naw kəta.

⁸ Yaŋ əpel na Yawe ade su də wənah na: “Kəziyək mbel diyɗa gəm əlpa metiŋ-metiŋ kəgəɗəŋka. Kərkə su Gəla aka iya naw ɓa vi kəziyək mbel afuŋ abaw diyɗa.

⁹ Wakəwə wiyin yaŋka, nan wasan ɗəf naffete, wanəpsən əffet abet məzuzelɗe nan dətərwəslnən kiyin pakə, vi kawyani na Salomoŋ, wanəpsit zazay də əssa fendeŋge sit mə Israyelɗe aka pay nani.

¹⁰ Ndəni narka Gəla aka iya nawa. Nan wasan ka wətuwa, wanəsaw ka afəni, wanəsɓan mazaŋga na məlĩ nan aka Israyel hã faɗə.”

¹¹ Kakaŋ na wətuwa, kəta Yawe dəsan də isi, wən nan wadaw ammboko gəm wakərka Gəla na Yawe Maŋgəlva nok va apel akoko!

¹² Kəta Yawe dəpsuk maɗɗula moggon də wəsən pay adawɗiyuk aka Israyel, vi kərmagən mahenziŋ na Yawe Maŋgəlva noko!

¹³ Vasna wən nan wadaw ammboko an kəgəɗək maɗɗula kərmek mahenziŋɗe dit tiveɗnanziya, məs Yawe aɗi wən nan sən Moyis aka an dəwəl sən Israyel. Ampa təlko, asok zuko! Kəgeslne' ɓa, mokrok azlah ɓa.

¹⁴ Nəgayək əkkelet zəgeɗ narka Gəla na Yawe, nəkkalək meleŋge day ki kilo gabal kaklaw hoku, təbəz babar day ki kilo gabal hã gap gabal kaklaw hoku, vaski təbəz pepreŋ də titir aŋɗaŋ ɓa. Nəkayək wəleŋɗe dit gərmeŋɗe. Kəkaygən azeti'e.

¹⁵ Is tat dit məɗɗaŋ wəza diyɗa, məslmaŋ gərmeŋge, məsənaŋ wəɗa wəza dit gərmeŋge gəm wəleŋɗe, dit ɗiy məs vet asən wəza temtemi.

¹⁶ An dəwəl sən meleŋge, təbəz babara, təbəz pepreŋge gəm titire, kawɓapi əsən əŋɗa net ɓa. Asil aɗɗa wəza, kəta Yawe dəsan də isi!»

¹⁷ Davit aɗiyək wən nan sit deyeɗe na Israyel pak dəbbahaŋ sənəngən Salomoŋ wətəni:

¹⁸ «Yawe Maŋgəlva nokum tay də mənokum ɓa sa? Dəffetekum dahã dahã pak ɓa sa? Vi apsiwik ɗiy naka dəlvəŋ məs məvoŋgən kiyən aba Yawe gəm abet ɗiy nan ammba vawa.

¹⁹ Kakaŋ na, məɗi mokrokum də zeŋgilokum aka əkayan Yawe Maŋgəlva nokum. Misili, mərka təki salala na Yawe Maŋgəlva, kawki akoti na wənmiyna na Yawe dit zəgeɗ na matuya na Maŋgəlva addəv Gəla an mərkan aka iya na Yawe.»