1Alabaraɗe Də Mabərkiziti 21 - Bible en Guidar

Davit tay əver ɗiy na Israyel

¹ Satan asilik aka Israyel, yaŋ asilgən makra Davit naŋɗet ɗiy na Israyel.

² Davit aɓsən Yo'ab gəm sit deyeɗe net məzəlpaŋ na: «Məddoŋ məŋɗet mə Israyelɗe, təŋ sə Ber-Seba hã gap a Dan, məki suwa vi nəsəngən əŋɗa neti.»

³ Yaŋ Yo'ab amna: «Yawe dəwet ɗiy gba ndit təl səkatə! Vasna, ndəɗaŋ pak na daya naw məlyã, gewleɗ na daya nawəŋ ɓa sa? Vimi daya naw aŋglu əŋɗa net di? Vimi Israyel adawsan də heslepe di?»

⁴ Ya əpel na məlĩ askak wəla Yo'ab. Yo'ab vit abbalan Israyel dəwənnani, ndən buryok a Yerusalem.

⁵ Yo'ab, apsənək əŋɗa net ɗiy məverit nek sən Davit: Zel na Israyel nawɓap əgayaŋ pak tahəŋ gabal səkat təl kəlaw kiyən taka, zel na Yuda nawɓap əgayaŋ tahəŋ gabal səkat poɗo də gabal kaklaw buhul.

⁶ Məŋɗeti mə Leviɗe dit mə Benyaminɗe aret ɓa, vi əpel na məlĩ dənnek zə Yo'ab ɓa.

Maŋgəlva tay əzga' sən Davit aka mambray nani

⁷ Zəgas dəsan lew ara Maŋgəlva ɓa, yaŋ arbə sən Israyel.

⁸ Yaŋ Davit aɓsən Maŋgəlva na: «Nəgəɗək mambray diyɗa də əɗɗa zəgaska. Ya kakaŋ na, kamə Yawe avvuyon sən heslepe na balam noko. Vi va dərwa an faɗ nəgəɗə.»

⁹ Yawe apel sən Gad, məzula na Davit, dawnəh na:

¹⁰ «Dok anah sən Davit na: An Yawe apel yaŋka: Zəgeɗ hoku nədawɗi suko, awel taka səreti, nəɗɗa sukgəni.»

¹¹ Gad, alək aza Davit, aɓsən na: «Vaŋki Yawe anahə: Agəm an kəŋgələ:

¹² an əzva hoku na May yi, an təla hoku ənzok sit məzuseɓɗe, səma masalam net məzuzelɗe noki yi, awaniɓa əvoŋ hoku aka Yawe ərbəsən dələv də masalam də əslən maslay məzuzet ɗiy dəggbogən gəbaymərma aka va na Israyel ŋgbu'u. Ya kakaŋ na, aweli, wən miy nədamndagan sən ɗəf an dəslənu di?»

¹³ Davit aɓsən Gad na: «Geslne armuwək diyɗa! Dəɗah su nəbət addəv va Yawe ki avet ɗiyi, vi nan awla sasãh diyɗa!»

¹⁴ Yaŋ Yawe aslən gəbaymərma a Israyel, ɗiy gabal kaklaw buhul dəmtaŋ a Israyel.

¹⁵ Maŋgəlva aslənək maslay a Yerusalem vi kawzani, adan adawzet naka, Yawe awla, man agəɗək nzok aka wərayəska. Yaŋ aɓsən maslay məzet ɗiy naka: «Məkə! Kakaŋ avoŋgən voko!» Maslay na Yawe tay ziwwe a maŋgava kelle na Ornan mə Yebus.

¹⁶ Davit le'gən haran, awla maslay na Yawe ziwwe aka walaŋ dəlvafuŋ də təki a disiŋ, masalam nan avan məptuwən kawwã, van təlla kəla Yerusalem. Davit dit ɗiy məsɓet askotoŋguk hã mirbizit afuŋ ne' dit lukutɗe na sak azeti.

¹⁷ Davit aɓsən Maŋgəlva na: «Intə nənah wən naŋɗet ɗiy ɓa sa? Intə nəgəɗ mambray, nəgəɗ məza də tiven ɓa. Timeŋgiɗiŋ miy aɗɗaŋ di? Yawe Maŋgəlva nawa, vok dəsan akaw də gəla na afu kaka'ə, tatwãhəŋ asan aket ɗiy nok ɓa.»

Davit tay ərka matuya sən Yawe

¹⁸ Maslay na Yawe anah sən Gad, dənah səngən Davit na: «Dəmmbat ərka matuya sən Yawe a kelle narga haykəmari na Ornan mə Yebus.»

¹⁹ Davit ambatək va əpel na Gad apel də iya na Yawe.

²⁰ Ornan kpaŋ yaŋ awəl maslay, ndəni kirtin poɗo dəssoŋ dəndən net aɗamaŋgə, Ornan van haykəmari adarga.

²¹ Davit adek aza Ornan, Ornan təm awla Davit; ndən vit sə kelle, appu' aba Davit, mirbizin afuŋ nisi.

²² Davit aɓsən Ornan na: «Apsu gəla kelleŋ nərkagən təki nawzaɓ-Maŋgəlva sən Yawe akani. Apsu aka əlbəh nan təstəsə; vasna əzəmsahãŋ wazar səket ɗiyi!»

²³ Ornan aɓsən Davit na: «Agəm ka noko, kəgəɗgən an dəsan lew ama horoko daya naw məlyã. Kədawlanəŋka: wanəpsuk wasliɗe nawda əvəl nawzla kurmbuɗuku, wəleŋɗe na saret ka seseme, haykəmari, ka əvəl na zəga na mabardaw; nəpsukuk pakə!»

²⁴ Yaŋ məlĩ Davit anah sən Ornan na: «Owwo! Dəlbəh va koɓeɗ nan təstəs nədalbəhni. Nəɓapna kawgəm zəga nok sən Yawe gəm kawda əvəl nawzla kurmbuɗuk na mepeleŋ ɓa!»

²⁵ Davit apsən koɓeɗ na meleŋge səkat sləre sən Ornan aka təki vani.

²⁶ Davit arkak matuya sən Yawe, adak əvəl nawzla kurmbuɗuku gəm əzaɓ-Maŋgəlva nawrəh zazaya. Akkaman Yawe, azlan sən dəsɗa offo sə disiŋ aka matuya naɗɗa əvəl nawzla kurmbuɗuku.

²⁷ Yawe apel sənək maslay, yaŋ agul masalam a gəlani.

²⁸ Gala dəpas adan Davit awla na, Yawe azlan sənək aka kelle na Ornan mə Yebus na, ndən zaɓ əzaɓ-Maŋgəlva adaka.

²⁹ Təki nassa na Yawe məs Moyis agəɗ a kapta-muyã gəm təki nawzaɓ-Maŋgəlva naɗɗa əvəl nawzla kurmbuɗuk dəpas na aka gəla na tuya na Gabawən nəŋgə.

³⁰ Ya Davit aɓap na kawmbat əkkaman Maŋgəlva adak ɓa, vi geslne armak sən masalam na maslay na Yawe.