1Alabaraɗe Də Mabərkiziti 19 - Bible en Guidar

Ɗiy gugriɗ na Davit mərbə sit wili

¹ Dərɓaga asna, Nahas məlĩ net mə Ammonɗe amtə, wətən dəzəm məlĩ a gəlani.

² Yaŋ Davit anah na: «Wanəgəɗ moggon sən Hanun wətən Nahas tamə, vi afən agəɗ suwək moggon lahəŋka.» Davit aslənək ɗiy azan əsɗan na afən amtə, gewleɗ na Davit agapaŋgək aka dələv net mə Ammonɗe aza Hanun, kasɗani.

³ Yaŋ deyeɗe net mə Ammonɗe anahaŋ sənən Hanun na: «Azok na Davit ki afuk aɗi aslən əsɗokuŋ sa? Namna vi kaprəman gəm kakkesen gabba dələv kawmõhuni gewleɗiŋ azzoŋ azok ɓa sa?»

⁴ Yaŋ Hanun arme gewleɗ na Davit nek afaɗ eŋgemeti, ataw lukutɗe net səza way gebbeti, appet addoŋgu.

⁵ Yaŋ mədda ənah sən wən net ɗiy vet sən Davit, yaŋ aslən ələmsiti, vi wil adeninik diyɗa. Yaŋ məlĩ anah sit na: «Məssoŋ a Yeriko hã an eŋgemekum agulyoŋko asna kəzzoŋgəni.»

Əgay dit mə Ammonɗe gəm mə Aramɗe

⁶ Adan mə Ammonɗe awlanən na, tahəŋ law ama hara Davit ɓa, Hanun dit mə Ammonɗe agəmaŋ təbəz babar kilo gabal kaklaw hoku, nalbəh mawteŋge nawgay dit məpeŋgeŋ pilseŋge, səvet ɗiy na Aram na Weleŋgit-Məlpeŋge, mə Aramɗe na Ma'aka gəm na Soba.

⁷ Albahaŋgək mawteɗ nawgay ka net gabal kaklaw hoku kiyit sula, məlĩ na Ma'aka dit ɗiy nan azzoŋ əmpanən dibirgidik net a Madaba, mə Ammonɗe akkalaŋgək sə walaŋgəleɗe gugriɗ neti, azzoŋ kawgaya.

⁸ Davit aprəma, aslən Yo'ab dit məzəlpaŋ məs mekret kãhə.

⁹ Mə Ammonɗe agilyoŋ ama əgaya, yaŋ assoŋ gaŋgaŋ a maddamba na walaŋgəla-metiŋ. Milyeŋge dəzzoŋ əskaŋ sitin aziweŋ a mapoho takərgiti.

¹⁰ Yo'ab awla na əgay tay aban də dərɓagan pakə; awel ɗiy səret mə Israyelɗe məs vet awbəta afuŋ ɓa pakə, assẽh abet mə Aramɗe.

¹¹ Appet medembirgit məzəlpaŋ sən Abisay məlməni, net assahãŋ abet mə Ammonɗe.

¹² Yaŋ amna: «An mə Aramɗe tahəŋ ədayaŋ kiywa, asna kədegən əsək suwa, an mə Ammonɗeŋ dədayaŋ kiyko, asna intə naddaw əsək suko.

¹³ Ampa təlko, mərbəgən gboŋgboŋ ammbet ɗiy namə, viyit walaŋgəleɗe gugriɗ na Maŋgəlva namə. Yawe an dəsan lew a maharan adaɗɗa.»

¹⁴ Yo'ab mbat dit ɗiy nan abe aket mə Aramɗe kawgaya; yaŋ anzoŋ sənəni.

¹⁵ Adan mə Ammonɗe awlenin mə Aramɗe adanzoŋgu, ndəɗaŋ ɓak tam səba Abisay məlmən Yo'ab, ndəɗaŋ toŋ a walaŋgəla-metiŋ. Yo'ab mbat a Yerusalem.

¹⁶ Adan mə Aramɗe awlanən na, mə Israyelɗe askanənək wəleti, aslənaŋgək maslənɗe akinin mə Aramɗe na dəgar ki Efrat. Sofak daya net məzəlpaŋ na Hadadezeri abeti.

¹⁷ Mənah səni Davit. Yaŋ Akkelet mə Israyel pakə, ndən dəgar ki Yurden, ndən gap azeti, assahãŋgək abeti. May Davit assahãŋ nawgay abet mə Aramɗe, alpaŋgək dəndəni.

¹⁸ Mə Aramɗe ɓak səbet mə Israyelɗe, Davit abayək ɗiy net mawteɗ gabal buhulu, məzəlpaŋ də tilit gabal kaklaw poɗo. Abayək Sofak, daya net məzəlpaŋgə.

¹⁹ Gewleɗ na Hadadezer, awlanən na mə Israyelɗe askanənək wəleti; akayaŋgək əsler də Davit, aɗɗaŋ sənənək wəza. Mə Aramɗe dəŋgereŋ əbbah sit mə Ammonɗe əmpa ɓa.