1Alabaraɗe Də Mabərkiziti 16 - Bible en Guidar

¹ Akiynənək akoti na Maŋgəlva, aɗiynən addak gizlirke məs Davit ampə səni, sissiŋ adaŋ əvəl nawzla kurmbuɗuk gəm əzaɓ-Maŋgəlva nawrəh zazay aba Maŋgəlva.

² Səza Davit agrak əda əvəl nawzla kurmbuɗuk də əzaɓ-Maŋgəlva nawrəh zazaya, aɗɗak wəzaɓ aket ɗiy də iya na Yawe.

³ Sissiŋ na awɗak peŋ kuɗuvurro, gəpa məpəpla net kirtin gogozlo gəm net kirtin megezlembirke sit ɗiy na Israyel pakə, ɗəf pak arahək haran nani ɗəf mizilin va gulku.

Mə Levi tahəŋ əɗi ki Maŋgəlva

⁴ Davit aziyək mbəraw net mə leviɗe aba akoti na Yawe, vi naɗɗa wəza, vi kaɗɗum akani, kawgagdakan gəm kawɗi ki Yawe, Maŋgəlva na Israyel.

⁵ Asaf daya də Zakarya masulani; sissiŋ Aziyel, Semiramot, Ye'iyel, Mattatiya, Eliyab, Benaya, Obed-Edom gəm Ye'iyel tahəŋ dit gəzləŋtəndəŋɗe; na Asaf tam nan ndayɗe adawbaya.

⁶ Məsdəlveŋge may Benaya də Yahaziyel, net mohoŋɗe adoffoŋ ɗayɗay aba akoti na wənmiyna na Maŋgəlva.

⁷ Pay dəpaski Davit atəŋ əpsit wəza nawɗi ki Yawe, sən Asaf dit milmiŋgiɗni.

⁸ Məɗi ki Yawe, miya iya nani, mərban an agəɗ naggət akan a weleŋgit ɗiyi.

⁹ Miyə sən gəlya, məlvani; məɗɗumet sekeneɗ nan pakə.

¹⁰ Məɗi ənnek nokum aka iya nan salala, mənneken zukum mənokum məkayanən Yawe!

¹¹ Məkayan Yawe də gbogboŋ nani, məkayan ula haran pay pakə.

¹² Məɗɗum aket teteleɗe en agəɗə, sekeneɗ en agəɗ gəm wətawwən an dəgil sə mani,

¹³ mənokum zev Israyel, gawla nani, mənokum kirtin Yakob, məwele nani!

¹⁴ Ndəni Yawe Maŋgəlva namə, məzuzəm məlĩ aka dələv gboŋgu.

¹⁵ Məɗɗum pay pak aka wənmiyna nani, aka aɗi wən nan sən sayit ɗiy gabalə.

¹⁶ An aynə də Abraham, dərbə də əsway sən Isak,

¹⁷ aɗiyək va mahenziŋ sən Yakob, ka wənmiyna sən Israyel hã faɗə,

¹⁸ gala anah na: «Wanəpsuk dələv na Kana'an, hara dələv nokumi!»

¹⁹ Dasək na, ngbəra' kənanaŋgə, molhõyẽɗ aka dələv adaka.

²⁰ Ətiwileŋ aka dələv temtemi, aka va net məlyeŋge temtemi.

²¹ Ya appan ɗəf dəsərgən met ɓa, azgasitik milyeŋge aka wən neti:

²² «Kədawrəŋgitin en məpeslit naw ɓa; kədaɗɗaŋ mbərayən sit məskəleŋɗe naw ɓa.»

²³ Dələv gboŋgu, məyə gəlya sən Yawe; mərban pay pak na avani əkõho;

²⁴ Mərban gagdak nan aweleŋgit ɗiy-ɗarə, sekeneɗ nan aweleŋgit ɗiy pakə.

²⁵ Vi Yawe metiŋgi, nawgagdakani diyɗa. Adahək nawgeslne' səni, adayək kiyit meŋgilveɗ pakə:

²⁶ meŋgilveɗ net ɗiy-ɗar pak zəgeɗ ɗarəŋ, Yawe yi dəɗɗa disiŋ.

²⁷ Gagdak də əwiɗ tay abani, gbogboŋ də wənnek tay a təki asani.

²⁸ Mənokum ɗiy pakə, məɗi ki Yawe, mərban gagdak gəm gbogboŋ na Yawe.

²⁹ Məgagdakan iya na Yawe. Məki əvəl nokum, məde abani. Məppu' afuŋ aba Yawe, aka salala nan adarban zəni.

³⁰ Məkker abani mənokum nammba dələv pakə, Ndəni dəziwgən mammba dələva aɓəl na ɓa.

³¹ Disiŋ anneken zuko, dələvafuŋ apepɗeki! Kawnahi a weleŋgit ɗiy-ɗarə na: «Yawe yi məlyã!»

³² Pehe dəbay gagay dit zəgeɗ naddəvni; Muyã pak dənnek dit zəgeɗ naddəvni!

³³ Wəleŋɗe rəɓ dəŋzlaŋ vaŋvəl sən ənneke, aba Yawe, vi tay əzzan ətawwən aka dəlvafuŋ.

³⁴ Məɗi ki Yawe, vi moggoni, vi moggon nan tay hã faɗə.

³⁵ Mənah na: akõhgəmə, Maŋgəlva əkõh namə, akkalamə, abitəm səret ɗiy-ɗarə. Vasna waməɗi ki iya nok salala, waməgagdakan zəm də wəɗi kiyko.

³⁶ Soko sən Yawe dəsan Maŋgəlva na Israyel, far lahəŋka hã faɗə. Ɗiy pak dənahaŋgən na: «Dəsan vaska gəm məɗi ki Yawe!»

³⁷ Davit appetik may Asaf dit milmiŋgiɗin aba akoti na wənmiyna na Yawe, vi dəɗɗaŋgən wəza aba akoti pay pak va məɗiwən nan va təki addaŋgə;

³⁸ awelik Obed-Edom dit milmiŋgiɗin kaklaw sləre kiyit dodopoɗo, Obed-Edom wətən Yedutun gəm Hosa nawga maddamba.

³⁹ Davit appanək məsdələv Sadok dit məsdəlveŋge en milmiŋgiɗin aba təki nassa na Yawe, addəv gəla-na-tuya na Gabawən,

⁴⁰ kawda əvəl nawzla kurmbuɗuk sən Yawe ɗayɗay aka matuya nawzla əvəl nawzla kurmbuɗuk də pummo gəm də moskoyo, gəm kaɗɗa an va məverin addəv mahenziŋ, an Yawe aɗi wən nan sit mə Israyel.

⁴¹ Dəsapaŋ azet na, may Heman, Yedutun də madembirgit ɗiy muwelit də iya net nawɗi ki Yawe: «Vi moggon nan tay hã faɗə.»

⁴² Net may Heman də Yedutun na, mohoŋɗe, ndayɗe, gəm zəgeɗ nawɗəmgən gəlya na Maŋgəlva tahəŋ aveti. Kirtin Yedutun məziyit nawga maddamba.

⁴³ Ɗiy pak ambataŋka, naway pak ananda, Davit tam buryok eŋgil vi kaɗɗa əzaɓ aket ɗiy nananda.