1Alabaraɗe Də Mabərkiziti 15 - Bible en Guidar

Davit tay əzaɓan wən nawki akoti na Maŋgəlva

¹ Davit arkək gəleɗe a walaŋgəla-metiŋ na Davit; azaɓək təki nawɗi akoti na Maŋgəlva, ampək gizlirke vini.

² Yaŋ Davit amna: «Kawslani akoti na Maŋgəlva na an mə Leviɗeŋ ɓa ɓa, vi aneti yi Yawe awel nawslan akoti na Yawe gəm nawgəɗ sən wəza hã faɗə.»

³ Davit akkaletik mə Israyelɗe pak a Yerusalem, vi kawka akoti na Yawe a təki məs azaɓ səni.

⁴ Davit Akkeletik kirtin Aron dit mə Leviɗe.

⁵ Səret kirtin Kehat: daya Uriyel dit milmiŋgiɗin pak aɗɗaŋgək səkat də kaklaw sula;

⁶ səret Kirtin Merari: daya Asaya, dit milmiŋgiɗin pak aɗɗaŋgək səkat sula də kaklaw sula;

⁷ səret Kirtin Gersom: daya Yo'el dit milmiŋgiɗin pak aɗɗaŋgək səkat də kaklaw hoku;

⁸ səret kirtin Elisafan: daya Semaya dit milmiŋgiɗin pak aɗɗaŋgək səkat sula;

⁹ səret kirtin Hebron: daya, Eliyel dit milmiŋgiɗin pak aɗɗaŋgək kaklaw dodopoɗo;

¹⁰ səret kirtin Uzziyel: daya Aminadab dit milmiŋgiɗin pak aɗɗaŋgək səkat də kəlaw kiyit sula.

¹¹ Davit ayek məsdəlveŋge Sadok də Abiyatar gəm mə leviɗe: Uriyel, Asaya, Yo'el, Semaya, Eliyel gəm Aminadab.

¹² Yaŋ aɓsit na: «Mənokum migil gəleɗe net mə leviɗe. Məbbur zukum, mənokum dit milmiŋgiɗkum, məka akoti na Yawe Maŋgəlva na Israyel a təki nəzaɓ səni.

¹³ Aka maddaabəŋ na adan mənokum tat ɓa, Yawe Maŋgəlva nam azetik ɗiy mbirit səramə vi məkayan də tive nan ɓa.»

¹⁴ Yaŋ məsdəlveŋge dit mə leviɗe abburnənək zit vi kawka akoti na Yawe Maŋgəlva na Israyel.

¹⁵ Mə Leviɗe aslanən akoti na Maŋgəlva akki vet dit ɓeɓeleɗ va Moyis aɗi sit wən nan va əpel na Yawe anahə.

¹⁶ Yaŋ Davit anah sit ɗiy gugriɗ net mə Leviɗe dəɗiningən milmiŋgiɗit aka wəza net nawya gəlya dit zəgeɗ naskəl temtemi, gazaŋvəlɗe, gaŋgaraɗe, ndayɗe, ɓaɓəlmet dəprəmgən diyɗa, ka zəga narban ənneke.

¹⁷ Mə leviɗe aɗiyninik ɗiy aka wəza neti: Heman wətən Yo'el, gəm səret milmiŋgiɗni, Asaf wətən Berekiya; sə weleŋgit kirtin Merari, milmiŋgiɗti, Etan wətən Kusaya;

¹⁸ milmiŋgiɗit nabbah sit na, məgaŋ maddambeɗe: Zakarya, Ben, Ya'aziyel, Semiramot, Ye'iyel, Unni, Eliyab, Benaya, Ma'aseya, Mattatiya, Eliflehu, gəm Mikneyahu, Obed-Edom də Ye'iyel.

¹⁹ Səret miyaŋ gəlya na: Heman, Asaf, də Etan, tahəŋ dit ndayɗe na təbəz pepreŋ naɓlan təkiya;

²⁰ Zakarya, Aziyel, Semiramot, Ye'iyel, Unni, Eliyab, Ma'aseya, də Benaya net də gazaŋvəlɗe məzəprəmaŋ heleŋ heleŋgi;

²¹ Mattatiya, Eliflehu, Mikneyahu, Obed-Edom, Ye'iyel, də Azaziya, net gaŋgaraɗe dit helegeɗ dodopoɗo, kawɗəmgən gəlya.

²² Kenaniya daya net mə leviɗe nawka akoti, azaɓanək wən nawkani, vi nan asənək gabbani.

²³ Berekiya də Elkana, ndəɗaŋgə məgaŋ maddamba na gəla na akoti.

²⁴ Məsdəlveŋge, Sebaniya, Yosafat, Netanel, Amasay, Zakarya, Benaya gəm Eli'ezer, net muffoŋ gozloro aba akoti na Maŋgəlva. Obed-Edom də Yehiya, net məgaŋ akoti.

Əgap na akoti na Maŋgəlva a Yerusalem

²⁵ Yaŋ Davit dit ɗiy məsɓet na Israyel gəm deyeɗe naket məzəlpaŋ gabal gabalɗe, addoŋ kawslan akoti na wənmiyna na Yawe, səna Obed-Edom da də wənneke.

²⁶ Vi Maŋgəlva dəbbah sitgin mə leviɗe məzuslanən akoti na wənmiyna na Yawe na, məzaɓi-Maŋgəlva dit medgedgeɗe buhul, gəm ndergeyẽɗ buhulu.

²⁷ Davit aguluk lukut na helege na ngərayã kukuɗo, məstaka va net mə leviɗe, məslaŋ akoti, miyaŋ gəlya, gəm Kenaniya daya nawka akoti. Davit pak tay də lukut na daya net məsdəlveŋge na helege na ngərayã azani.

²⁸ Ɗiy na Israyel beymet akanən akoti na wənmiyna na Yawe na, də salalay, də mohõ, dit gozloreɗi, dit ndayɗe, də wəbay gazaŋvəlɗe gəm gəzləŋtəndəŋɗe.

²⁹ Adan akoti na wənmiyna na Yawe agap a walaŋgəla-metiŋ na Davit, Mikal wətən Sawlu, ɓe' aka təkifoŋgo naza gəla. Tulak məlĩ Davit əpepɗek də wəskəla, yaŋ təzelen a makrata.