1Alabaraɗe Də Mabərkiziti 13 - Bible en Guidar

Davit agəmək wən nawki akoti na Yawe a Yerusalem

¹ Davit atawanək wən dit deyeɗe net məzəlpaŋ gabal gabalɗe gəm en net səkat səkatɗe, dit ɗiy en naban pakgiti.

² Davit aɓsən əsap na Israyel dəwənnan na: «An kulanənək wən nan lewi, arbək na səza Yawe Maŋgəlva nam asil na, asna məslən səm azet milmiŋgiɗəm dəssoŋ aka dələv na Israyel gboŋgu, gəm sit məsdəlveŋge dit mə leviɗe a walaŋgəleɗe gugriɗ məs assoŋgu, vi dəsapaŋgən azamə.

³ Asna məkiygən akoti na Maŋgəlva namə, vi məkayan aka pay na Sawlu ɓa.»

⁴ Ɗiy dəkkalaŋ pak aɓɗaŋ na dəgəɗ vaska, vi wən nan agilik lew ama haret ɗiy.

⁵ Davit akkeletik mə Israyelɗe pakə, gəm səma lolohõ na Eziptə hã nawtoŋ a Hamat, kawki akoti na Maŋgəlva sə Kiryat-Ye'arim.

⁶ Davit mbat dit mə Israyelɗe pak a Ba'ala, a Kiryat-Ye'arim na Yuda, vi kawgəm akoti na Maŋgəlva sədaka, məs Yawe asan aket kerubaɗe, a təki adawyanən iya nani.

⁷ Aslanən akoti na Maŋgəlva aka mawta net wasliɗe meleketen səŋgil ana Abinadab da. Uzza də Ahiyo dədawkanən mawta net wasliɗe vani.

⁸ Davit dit ɗiy na Israyel dəwənnet pak tay əskəlaŋ zit soksok aba Maŋgəlva, dit gəlyeɗe, gaŋgaraɗe, gəzləŋtəndəŋɗe, dəgəleɗi, ndayɗe, gəm gozloreɗi.

⁹ Ndəɗaŋ pay hã a kelle na Kidon. Yaŋ Uzza atəl van karma akoti naka, vi wasliɗe aŋglaŋ əzganəni.

¹⁰ Yaŋ gədəv Yawe adə aka Uzza, abaya, vi atəl van aka akoti naka. Ndən zam aba Maŋgəlva adaka.

¹¹ Davit attapək vi awla Yawe abay uzza, yas aya təkiyəs na Peres-Uzza. Hã kakaŋ təki vas adayanəni.

¹² Davit ageslne' sənək Maŋgəlva dəpaska, amna: «Mbarmbar nədawki akoti na Maŋgəlva anawda di?»

¹³ Davit dəka akoti ananda a walaŋgəla mətiŋ na Davit ɓa, yaŋ akkpaŋ azaɓan eŋgil ana Obed-Edom mə Gat da.

¹⁴ Akoti na Maŋgəlva van asanək gap təla hoku ana Obed-Edom da, addəv gəla nani, Yawe akiyək əzaɓ aka gəla na Obed-Edom dit zəgeɗ nan pakə.