1Alabaraɗe Də Mabərkiziti 11 - Bible en Guidar

Əzəm məlĩ na Davit ( 11:1—29:30 ) Gəgrəŋɗe gəm wəzeɗe məɗɗeti 11:1—22:1 Məɗini Davit ka məlĩ na Israyel

¹ Yaŋ mə Israyelɗe pak akkalaŋ aza Davit a Hebron, də wənəhaŋ na: «Awle milmiŋgiɗuk na gogo mənani.

² Far lahəŋ aka Sawlu asan məlĩ daydayə, istə kədadaw abet mə Israyelɗe. Yaŋ Yawe Maŋgəlva nok anah suk na: Istə kədawteɗ ɗiy naw na Israyel, istə nawsok daya aket ɗiy naw na Israyel.»

³ Ɗiy məsɓet na Israyel pak azzoŋguk aza məlĩ a Hebron, Davit aziwgənək wənmiyna dənɗaŋ a Hebron aba Yawe. Appay sənənək mẽl na məlĩ sən Davit ka məlĩ a Israyel, va əpel na Yawe anah sən Samiyel.

Davit amõhuk Yerusalem

⁴ Davit ambatək dit ɗiy na Israyel pak a Yerusalem, va wənah na Yebus, mə Yebusɗeŋ aka dələv vani.

⁵ Mə Yebusɗe aɓsənən Davit na: «Kətoŋ na aŋ ɓa.» Yaŋ Davit amõh walaŋgəla-metiŋ na korgu na Siyon: ndəni walaŋgəla-metiŋ na Davit.

⁶ Yaŋ Davit amna: «Ɗəf an dəbay mə Yebus daabəŋ na, wasan daya net məzəlpaŋgə.» Yo'ab wətət Seruya, dəmbat daabəŋ, akkpaŋgək daya.

⁷ Davit ɗew də gəla a korgu naka; ndəni miyan na walaŋgəla-metiŋ na Davit.

⁸ Yaŋ azlzleten walaŋgəla-metiŋ kiyən tərwəslə, təŋ sə Millo hã suləkə, Yo'ab azaɓan təki an dəpəl naddəv walaŋgəla-metiŋ vani.

⁹ Gagdak na Davit aɓayək abe abe, Yawe Məzuɓappak na disiŋ tay dəndəni.

Məzəlpaŋ na Davit

¹⁰ Eŋkiŋ deyeɗe net məzəlpaŋ na Davit məs mekreti, məs dəsapaŋ dit ɗiy na Israyel beymeti, dərmanən ɓəlɓəl aka adawzəm məlĩ nani, vi dəzəmgən məlĩ aka Israyel va əpel na Yawe anahə.

¹¹ Ya eŋkiŋ məzəlpaŋ məs mekret na Davit veti: Yasobe'am, wətən Hakmoni, daya net məzugaŋ hoku. Ndəni dəgəm tulhõ nan aket məzuzelɗe net səkat hoku, abey aka ma taka.

¹² Dərɓagani, Ele'azar wətən Dodo mə Aho'a, naret məs mekret hoku.

¹³ Ndəni dəsan də Davit a Pas-Dammim, gala mə Filistiɗe akkalaŋ adak nawgaya; guli na haykəmari pepreŋ tay adaka, məzəlpaŋ na Israyel anzoŋ sitinik mə Filistiɗe;

¹⁴ Ndəɗaŋ ziw addak guli naka, amõhnəni abeynin mə Filistiɗe, Yawe apsit əska wəla metiŋgini.

¹⁵ Hoku səret deyeɗe kaklaw hoku net məzəlpaŋ nek azzoŋ aka milɓe aza Davit, a bətəŋ na Adullam. Məzəlpaŋ net mə Filistiɗe aɗiynənək dibirgidik net a walaŋ net mə Rafayɗe.

¹⁶ Na Davit tay a təki nawɗam an moggoni, mgbim net mə Filistiɗe tam tay a Bet-Lehem.

¹⁷ Yaŋ wəray ade sən Davit, yas amna: «Naway nawki su iŋkile nawsa sə vov sə maddamba na Bet-Lehem ndak kaŋ di?»

¹⁸ Yas məs mekret hoku nek atoŋgoŋ gõk a dibirgidik net mə Filistiɗe, ambaɗaŋ iŋkile sə vov na Bet-Lehem dəsan a maddamba naka, akiytini, apsinin Davit. Yaŋ Davit dəŋgəm əset ɓa; ametik aka dəlvafuŋ sən Yawe.

¹⁹ Yaŋ amna: «Əray yi azaw aba Maŋgəlva nawa an nəɗɗak zev zəgaska, an nəsek na va nəse mbel net ɗiy məs dəkay əzanən ki zitiŋki ɓa sa?» Vi ki zit akay əzanən dadawkiy iŋkile veti yas dəŋgəm əset ɓa. Aski zəga an ɗiy məs mekret hokiŋ aɗɗaŋgə.

²⁰ Abisay, məlmən Yo'ab, ndəni daya net ɗiy hoku neki. Ndəni dəskan tulhõ nan aket ɗiy səkat hoku dəbeye, ya sləman dəgil aret ɗiy məs mekret hokiŋ ɓa.

²¹ Məgagdakani səret hokiŋ gap təl sula, akkpaŋgək ka daya neti, ya ɗəf tay dəday kiyən səret hokiŋ ɓa hara.

²² Benaya wətən Yoyada ɗəf gambara dəde sə Kabseyel, agəɗək wəza diyɗa. Ndəni dəbey osloronɗe sula na Mo'ab pakə; ndəni diprik dəbay ɓoolu sə vov net iŋkile, gala pay net ɓeɓrezlerizze;

²³ Ndəni dəbay ɗəf na Eziptə, məɓayən gap metir sula də meŋgeslni; mə Eziptə van tay də tulhõ avani, wəlaŋgən gba wəlaŋ saka. Ammbat azan də zleŋge avani, amõh tulhõ səva mə Eziptə nak mõhu, abay də tulhõ nan dəvan tusso.

²⁴ Zəgeɗ en Benaya, wətən Yoyada agəɗiski, agilginənək sləman aret ɗiy hoku məzəlpaŋ gambereɗ neki;

²⁵ Anan məgagdakan səret ɗiy kaklaw hoku, ya tay aret ɗiy hoku nek ɓa hara. Yas Davit aɗiy daya net məga nani.

²⁶ Məzəlpaŋ məs mekret na: Asayel məlmən Yo'ab; Elhanan, wətən Dodo na Bet-Lehem;

²⁷ Samot, mə Harori; Heles mə Pelon;

²⁸ Ira wətən Ikkes, mə Tekowa; Abiyezer, mə Anatot;

²⁹ Sibbekay, mə Husa; Ilay, mə Aho'a;

³⁰ Mahray, mə Netofa; Heled wətən Ba'ana mə Netofat;

³¹ Itay wətən Ribay na Gibeya net kirtin Benyamin; Benaya, mə Piryaton;

³² Huray na lolohẽɗ na Ga'as; Abiyel, mə Arbat;

³³ Azmawet, mə Baharum; Elyahba, mə Sa'albon,

³⁴ Kirtin Hasem, mə Gizon; Yonatan wətən Sage, mə Harar;

³⁵ Ahiyam, wətən Sakar, mə Harar; Elifal wətən Ur;

³⁶ Hefer, mə Mekerat; Ahyiya, mə Pelon;

³⁷ Hesro mə Karmel; Na'aray wətən Ezbay;

³⁸ Yo'el məlmən Natan; Mibhar wətən Hagri;

³⁹ Selek mə Ammon; Nahray mə Berot, mərəm baray na Yo'ab, wətət Seruya;

⁴⁰ Ira, mə Yitri; Gareb, mə Yitir;

⁴¹ Uri mə Hitti, Zabad, wətən Ahlay,

⁴² Adina wətən Siza, mə Ruben, daya net mə Rubenɗe, dit ɗiy kaklaw hoku ammbani,

⁴³ Hanan wətət Ma'aka, Yosafat na Mitni,

⁴⁴ Uzziya mə Asterot, Sama gəm Ye'iyel, kirtin Hotam mə Arower,

⁴⁵ Yediya'el wətən Simri, də Yoha mə Tisit məlməni,

⁴⁶ Eliyel na Mahawim, Yeribay də Yosawya kirtin Elna'am gəm Yitma mə Mo'ab,

⁴⁷ Eliyel, Obed gəm Ya'asiyel na Soba.