1Alabaraɗe Də Mabərkiziti 10 - Bible en Guidar

Əmta na Sawlu ( 10:1-14 ) Əlpa a Gilboa, əmta na Sawlu

¹ Mə Filistiɗe alpaŋgək dit mə Israyelɗe, ɗiy na Israyel anzoŋ sitinik mə Filistiɗe, abayaŋgək səmmbet aka mossorgo metiŋ na Gilbo'a diyɗa.

² Mə Filistiɗe arufnənək Sawlu dit kirtini. Mə Filistiɗe abeyninik may Yonatan, Abinadab gəm Malki-Suwa, kirtin Sawlu.

³ Əlpa aləɓək aka Sawlu; səza ɗiy na bəle aggbotoŋ akan na, ndən təŋ əkker abeti.

⁴ Sawlu anah sən mərəm baray nan na: «Aptu masalam noko, abaywa, vi ganyẽɗiŋ adasmayaŋ də in ɓa.» Mərəm baray ɓoŋgu vi geslne armak diyɗa. Yaŋ Sawlu agəm masalam atuk askot akani.

⁵ Adan mərəm baray nan awla Sawlu nak amtə, atuk masalam nan tam askot akan ndən zamə.

⁶ Sawlu, kirtin hoko'ogiti dit ɗiy neŋgil ananda pak amtaŋgək pay dəpaska.

⁷ Adan mə Israyel na walaŋ awlenin mə Israyelɗe ənzoŋgu, may Sawlu dit kirtin amtaŋka, ndəɗaŋ ɓak mbəgitin walaŋgəleɗe gugriɗ neti. Mə Filistiɗe pay gurom də gəla addəvti.

⁸ Vit pummo nan mə Filistiɗe mbat kawtor zəgeɗ səzet ɗiy mimtiti, ndəɗaŋ gas ərihnin kiy gəbeyit may Sawlu dit kirtin aka mossorgo metiŋ na Gilbo'a ɓəloh-ɓəloh.

⁹ Atornin zəgeɗ səzani, akanən kiyən dit zəgeɗ nawgay nani, abbalanən wən nan aka dələv net mə Filistiɗe, kawnah sit meŋgilveɗ net dit ɗiy neti.

¹⁰ Aziynin zəgeɗ nawgay nan addəv gəla net meŋgilveɗ neti, yaŋ akkpa'nən bəbər kiyən addəv gəla na Dagon.

¹¹ Ɗiy na Yabes na Galad pak aprəmənək va mə Filistiɗe aɗɗaŋ sənən Sawlu pakə.

¹² Məzəlpaŋ mes mekret pak asilyoŋgu, andenin kiy gəbeyit may Sawlu dit kirtin akinin a Yabes. Andiknin sleŋsleŋɗe net ammba wəlaŋga adawyaŋ na Ela na Yabes; aɗɗaŋ meme pay buhulu.

¹³ Sawlu amtə na, vi dəprəm ma Yawe ɓa, aggbak ma əpel na Yawe gəm vi ammbat əkay əbbah azat məpel dit məsvefɗe,

¹⁴ məza dəssohõn Yawe ɓa. Ndəni, Yawe abaya, apsən məlĩ sən Davit wətən Yesse.