Zakarya 11 - Bible en Guidar

Əza net dəlveŋge gagdakɗe

¹ Liban akol maddambeɗe noko, offo dəzimgin muguguleɗ noko.

² Anɗəsə wəlaŋga lelewe, vi wəlaŋga ɓəɓəl na Liban aɓəzlka, vi məzeti wəleŋɗe en na sləma. Mənɗəsə, korvoŋɗe na Basan, vi muyã dit wəleŋɗe rəɓ arayka.

³ Məprəm ɓaɓəlma ənɗəs net məzuteɗeŋge, vi gagdak net azəka. Məprəm əhəm net kirtin ɓoolu, vi əkaɓ na Yurden azəka.

Məzuteɗeŋge sula

⁴ An Yawe Maŋgəlva naw anah yaŋka: «Ateɗ gilew məɗiyit ka nawtaw wəleti.

⁵ En məs dədelbihnin adawtewin wəlet awlanən na va aɗɗaŋgək mbərayən ɓa; en dədawvilnin tay ənahaŋ na: “Soko sən Yawe, nəkkpaŋgək məsarya” ya en dədawteɗin dayday awlanən sasẽhit ɓa.

⁶ Vi Yawe aɗiyman na, nəppet na ɗiy naka dələv mederet əmpa ɓa. In yakəŋ əppet ɗiyi, ɗəf pak ava galani, gəm ava məlĩ nani. Waŋkənnən dəlva, nəkõhgit na ɗiy səvet ɓa.»

⁷ Wanəteɗ gilew en məmanən vet adawkaŋ a təki nawtaw wəlet əŋka. Nəndək zleŋɗe sula. Niya taka na Neneke, maɓɓan tam niya na, wəslere, in ɗew əteɗ gilewi.

⁸ Yaŋ nəzet məzuteɗəŋge hoku aka təla taka. Maɗɗulaw dəɓəs əsan aket ɓa, net pak mekret tay akaw ɓa.

⁹ Yaŋ nəmna: «Nətaɗkum na əmpa ɓa! An namta dəmtə, an nahhiya dəhhəyə! En dədassoŋ medereti, wazəmnən ziti!»

¹⁰ In zleŋge naw nədawya na Neneke nak gəmə, in ɓal əŋzluwən, vi kawpəl wənmiyna naw məs niynə dit ɗiy pakə.

¹¹ Apələk dəpas ləŋgə, məvəlaŋ zəgeɗ memeyẽɗ məs heret yarra akaw nek asənənək na, aŋ əpel na Yawe yi.

¹² Yaŋ nənah sit na: «An moggoni azokum na, məfaɗ su iya nawa, ya an vaski ɓa na məppani.» Yas afaɗ suwən iya naw nak də təbəz babar kaklaw hoku.

¹³ Yaŋ Yawe aɓsu na: «Azgan sən mərkə mesteɓe, əfaɗ na sləma məs afaɗaŋ suwəni.» Nəgəmək təbəz babar kaklaw hoku nak nəzgan sən mərkə mesteɓe addəv Gəla na Yawe.

¹⁴ Yaŋ nəŋzlu zleŋge naw masulan adawyaŋ wəslere naka, vi karsla məlma naka walaŋ Yuda də Israyel.

¹⁵ Yawe aɓsu na: «Kakaŋ na, agəɗ va məzutaɗa dərwa.

¹⁶ Vi wanəsilgən məzutaɗa maɓɓan aka dəlvəŋka: wən nan tay də an dəhhi ɓa, akayan na an dəzə ɓa; aynan na təl an dəŋgəzl ɓa; an məs petpeti, azəmgən na ɓa. Wampər slu net en məkirti, wappoŋ eperkeperke tilti.»

¹⁷ Əray aka məzutaɗa məs awtər wəray ɓa, məppet gilew ndolu! Masalam dəbəl vani, dəɓəh haran dəzəŋ! Van dəŋkəl soku! Haran dəzəŋ dəgəɗ turum turumu!