Yo'el 1 - Bible en Guidar

Tatwãh an zarayɗe akiyaŋgə ( 1:1—2:17 )

¹ Əpel an Yawe apel sən Yo'el wətən Petuwel.

Əzza na zaray gəm koloy

² Mənokum ɗiy məsɓokum məprəma, ɗiy naka dələv pakə, məpak sləmokum. Zev aŋ agəɗək pay nokum, awaniɓa pay net efiŋgiɗkum ɗah sa?

³ Məŋɗan sit wən nan sit kirtukum mezeŋgleketi, kirtukum sit kirtiti, kirtit tam sən sayit an dədazzani.

⁴ An məs «deberzeɗek» apələ, «zaray» azəməka, məs «zaray» apələ, «sesɓeke» atarna'ka, an məs «sesɓeke» apələ, «tatwãh» apalkatəka.

⁵ Məfɗahə mənokum məs mbazla abayə, məhəmə; mənɗəsə, mənokum məsaŋ mbazla pakə, aka batam mbazla na meketepe məs məɗoh mokum səkani.

⁶ Ɗiy gambereɗ agilginənək dələv nawa, hiɗimhiɗimiŋ gboŋgboŋguŋ. Sleyit, va slay ɓooli yi, polkomit va na ɓoolu mugolun.

⁷ Tay əɗi guli na megezlembirke naw ka kapta-muyã, abəletik sokoyeɗ nawa. Aproɗike, ndən ndol əndolit afuŋ, kiyvet kpaŋ ofrohu.

⁸ Ahəmgən kiyuk va waŋ ŋgbuɓɓo tiynə sakazlaŋ na gəlabaya, tədawhəmgən zələt an na gore nata.

⁹ Əvəla, zəga nawsa, awkiyaŋ addəv gəla na Yawe əmpa ɓa. Məsdəlveŋge tahəŋ a gəlabaya, ndəɗaŋ məɗɗaŋ wəza na Yawe neki.

¹⁰ Gulyeŋge arayaŋka, dələv tay a gəlabaya. Haykəmari arayka, mbazla na meketeke təɗek dayday tay ɓa, mẽl akkpa'ka.

¹¹ Wil dədukuməni, məzinseŋgi, məhəmə, minseŋ guli na megezlembirke, ammba haykəmari gəm haykəmari pepreŋ: vi əbəl na mawala azəka.

¹² Megezlembirke aklaŋka, sokoyo tay əŋkəla; tonzoku, gogozlo, goɗoŋgoy, wəleŋɗe na guli pak aklaŋka. Wənnek arslək sə weleŋgit ɗiy.

Wəya naɗɗa meme də wəɓuhma aza Yawe

¹³ Məsdəlveŋge miynan dadokkum, məɓuh mokum, məhəmə mənokum məɗɗaŋ wəza a matuya. Mide məvoŋ dit sakɗe azokum, ɗiy gugriɗ na wəza na Maŋgəlva nawa: vi awkiyaŋ əvəl də mbazla nawpesl addəv Gəla na Maŋgəlva nokum əmpa ɓa.

¹⁴ Məgəɗ meme, məgəɗ əkkal na paya, məkkelet ɗiy məsɓet gəm ɗiy naka dələv pak addəv Gəla na Yawe Maŋgəlva nokum, məhəm sən Yawe.

Pay na Daya

¹⁵ Aw! Pay miy aŋ di! Vi pay na Yawe agapka; tay əzzan va əray adazzan səza Məzuɓappakə.

¹⁶ Daram darami əzəm arslə, gəm wənneke, əssa waryak waryak səddəv Gəla na Maŋgəlva nam ɓa sa?

¹⁷ Zeŋveɗe aŋkəlaŋgək sə ma vovu; gəzləkɗe aɓzlaŋka, məkreptiŋ mehẽɗi, vi hay tay ɓa.

¹⁸ Məprəm va zəgeɗ memeyẽɗ adanɗəsaŋgə! Gebetɗe net wasliɗe tahəŋ soŋgoŋ soŋgoŋgu: vi marbaza nawtaɗ net tay ɓa. Gilew dayday tay ətaraŋgə.

Wəkkam na məskəleŋ

¹⁹ Anok nədawhəm suko, Yawe: offo tay əzəm təki nawtaɗ sura; nzilim nzilim na offo tay əpalket wəleŋɗe na guli pakə.

²⁰ Zəgeɗ nawra dayday tay əkkpaŋgaŋ kəlazoko: lolohẽɗ asã'ãtaŋka gəm offo tay əzəm kevile nawra.