Yeremiya 14 - Bible en Guidar

Aka pay na koloy

¹ Əpel na Yawe sən Yeremiya aka wən na koloy.

² Ɗiy na Yuda tahəŋ addəv gəlabaya, walaŋgəleɗe gugriɗ nan tahəŋ əɓzlaŋgə, assoŋguk afuŋ tirif na sahã. Vaŋvəl na Yerusalem asilik a disiŋ.

³ Deyeɗe aslinik belemɗe net əmbaɗ iŋkile. Ambataŋgək ama bobok dərəhaŋ iŋkile ɓa. Ndəɗaŋ buryok gagiya net mekeleŋ, wil adeninke, zit so'or so'oru, asərətənək kiyti.

⁴ Dələv apɗakka sən buwən tay ɓa. Vini məzinse assoŋ so'or so'oru asərətən kiyti.

⁵ Mune awra dayday azganək wətən an awə dəvan dəvani, vi zəga məkdəkan tay ɓa.

⁶ Korɗe nawra aziweŋgik aket mossorgoɗe pəɗalpəɗalə, tahəŋ əffok mammba səmyã va wawayɗe. Heret ayək dawkay kevile ya tay ɓa.

⁷ An heslepeɗe nam tahəŋ əkkpaŋ akamə Yawe abbah səm vi iya noko. Mərbə sukuk wil təl ɓaɓayə, məgəɗək mbərayən.

⁸ Is məs Israyel aɗi əɗɗum nan akoko, is məs kəkõhgən aka pay na əzəmsahã, mbarmbar kədawsok va molhoyo aka dələv di? May va malaka məs dəmzla vi kawvoŋ di?

⁹ Mbarmbar kədawsok va ɗəf məfayani va gurom nalpa məs aɓap na əkõhgit ɗiy ɓa di? Yawe adan is tat a walaŋgəmə, iya nok tay a mamə kəppam əskot ɓa.

¹⁰ Aŋki an Yawe anah aket ɗiyəŋki: Vas aŋglaŋ əbbal ɓa, tilit awziw a gəlan ɓa. Ya Yawe tay ənan nek dənɗaŋ ɓa, Ya yaŋ na tay əɗɗumonən mambray neti, watawwən aka heslepe neti.

¹¹ Yawe anah suwək na: Kədaŋgla moggon sit ɗiyiŋ ɓa.

¹² An aɗɗaŋgək meme zlaŋgə, nəprəm na əkkam net ɓa. An adaŋ suwənək əvəl nawzla kurmbuɗuk gəm aɗɗaŋ suwənək əvəla, nənnek na dənɗaŋ ɓa. Ya də masalam, mayã gəm gəbaymərma nədawzeti.

¹³ Yaŋ nəzlan na: Aw! Daya Yawe nawa, məskəleŋɗe yeŋ ənah sitin na: Masalam ane'kum na ɓa, may ɓa, Maŋgəlva wapsukum zazay an gegesiŋ a təkiyəŋka.

¹⁴ Yawe azlan suwək na: Məskəleŋɗe wən adawaŋ də iya nawa. Nəslin ɓa, wən tay məs nəɗi sit naɗɗa ɓa. Nəpel sit ɓa. Wən ɗar adawlaŋgə, əpel mekeleŋgi, mekret dədawmbəɗet nawgəɗ sukum kəleŋ!

¹⁵ Vini kan Yawe anah vaŋka: Dəwəl sit məskəleŋɗe məs dəɗɗaŋ kəleŋ də iya nawa, ya in nislin ɓa, dənahaŋ na: aka dəlvəŋ na, masalam asan na ɓa, may ɓa. Ya də masalam gəm may yi məskəleŋɗes adawzaŋ gərakə.

¹⁶ Ɗiy məs aɗɗaŋ sitin kəleŋgi, net wamtaŋ aket tiveɗ na Yerusalem sən mayã gəm ama masalam. Ɗəf asan na nawndikit ɓa, ndəɗaŋgə, gil neti, kirtit mezeŋgleket dit muguluŋgiti. Vas nədaggbo' mbərayən net aketi.

¹⁷ Ya kəpel sitgin əpeliŋka: Sin dəssoŋ araw sliɓsliɓ məza ərsla ɓa dəfəɗ də kapay pakə, vi tatwãh metiŋgin aɗiyək vamvi azet ɗiy nawa vamvi məza anzaɗ kpak ɓa.

¹⁸ An nigilik awra, ɗiy mimtit sən əgay nədawla. An nətoŋguk a walaŋgəla-metiŋgini, ɗiy məzəmtaŋ sən may nədawla. Vi məskəleŋɗe gəm məsdəlveŋge dayday abbalanənək dəlva: dərəhnən gabban ɓa.

¹⁹ Əzga kəzgan Yuda sa? Siyon akiyək mok sa? Vimi kərgəm hã vamvi məza anzaɗ na ɓa ta' azam di? Məɗɗumuk nawrah zazaya ya zəga tay mərah moggon ɓa. Məɗɗumuk aka pay nanzaɗa geslne dəggbo' akam dərəŋgə.

²⁰ Yawe məsənək wəza mambray namə, heslepe net efiŋgiɗmə. Məraygənək aboko.

²¹ Vi iya noko, kəzgam ɓa, kədawla gagdak na mazaŋga na məlĩ nok va zəga ɗar ɓa. Aɗɗumon na is tat ərsla wənmiyna nok də mənamə ɓa.

²² Səweleŋgit meŋgilvet net ɗiy-ɗar vet na tay məs nawɓap əzi buwən sa? Awaniɓa disiŋ dədawki buwən sa? Nam na is Yawe Maŋgəlva nam məs məɗi əɗɗum nam akok tə ɓa sa? Vi istə kəɗɗe zəgeɗis pakə.