Yakob 1 - Bible en Guidar

Ətoŋ addəvən ( 1:1 ) Wəsɗa

¹ Ɗereweləŋka, in Yakob nəvere, intə məgəɗ wəza na Maŋgəlva də na Daya Yesu Kristu. Nəsɗetik mahəlfaɗe kəlaw kiyit sula məs dətrayaŋ ammba dələv pakə.

Ətafa gəm maɗɗula ( 1:2-8 ) Əziw ɓəɓəl addəv tatwahã

² Milmiŋgiɗwa, mənneken zukum diyɗa an wən tatwãh temtem arəhkumuko.

³ Vi kəsənənka pay wən tatwãh asla wətaf nokum, wapsukum əɓəsa.

⁴ Ya əɓəs dərbə təstəsə, vi kəssoŋgən təstəs gərrak məza də mambray azokum ɓa.

⁵ An ɗəf sərokum tay məs maɗɗulan agəsə, dəŋgəl ava Maŋgəlva məzəpsən ɗəf pak məza də tatwah ɓa gəm məza də əsəɓ ammban ɓa, wapsəni.

⁶ Ya dəŋgəl də wətafa məza də kuzuŋ dayday ɓa, vi ɗəf məgəɗ kuzuŋ pak tay va vovolumɗe net iŋkile a pehe, məs səmyã adawka də təki aŋgəl pakə.

⁷ Ɗəf an vaska adaɗɗum nawrəh zəga səva Daya ɓa.

⁸ Vi dəpan kiyən sən Maŋgəlva gərak ɓa, dəsən an va adaɗɗa də wəɗɗum nan ɓa.

Sãhã gəm əba ( 1:9-11 ) Sãhã gəm arya

⁹ Aba Maŋgəlva, məkristu məssahã, dənneken zəni vi Maŋgəlva aɗi sənək kiyni.

¹⁰ Məkristu məsarya, dənneken zən sən Maŋgəlva aggəsani. Vi məsaryeɗ wamtaŋ va uffiyo na zəga awra.

¹¹ An pay tay əzla də təki kakãha, waɓət kevile, uffiyo nan wayo'u, lelew nan pak wagrakə. Vaski'e məsarya adawza də wəza nan pakə.

Ula naza ɗəfa gəm əraka ( 1:12-18 ) Əsla gəm wəraka

¹² Əzaɓ aza ɗəf məzuɓəs əsla, vi an aɓəsək əsla, warah mətərkiya na zeŋgille məs Maŋgəlva anah napsit ɗiy məs dəŋgluwəni.

¹³ An wərak armak ɗəfa, adawnəh na Maŋgəlva dərakawa ɓa. Vi kawslani Maŋgəlva də mambray ɓa, areɗ na ɗəf addəv əɗɗa mambray ɓa.

¹⁴ Ɗəf pak əsim zəga nan dədawreɗin, dədawkani gəm dədawmbəɗani.

¹⁵ An əsim zəga nan awanək zəni, wakkpaŋ mambraya. An mambray aɓayka, wawə əmta.

¹⁶ Milmiŋgiɗwa, kədawmbəɗanən zukum ɓa.

¹⁷ Zəga moggon dədawrəhəm pakə gəm əvəl moggon pak sə disiŋ ade, səza Maŋgəlva, məs dəzəmiɗ əkasakɗe. Maŋgəlva nan addəɗ ɓa, akkpaŋ ɓa, guzli tay azan ɓa.

¹⁸ Də wəŋgla nani apsəm zeŋgile də wəpel nan an gesiŋ, vi məsamgəm dadabya net zəgeɗ en azəməɗ pakə.

Əprəma gəm əɗɗa wəza dəndəni ( 1:19-27 ) Wəprəm wəna gəm əɗɗa an məs anahə

¹⁹ Milmiŋgiɗu na makrawa: Məɗɗum aka wənnəŋka, ɗəf pak dəpak sləman əprəm wəna, ya adawgəm zən wəpel də kakara ɓa, adawgəm zən wədagədəv ɓa'a.

²⁰ Vi ɗəf mədəgədəva aɓap na wəɗɗa zəga nannek zə Maŋgəlva ɓa.

²¹ Vi wən aski məppan wəza mambray sə makrokum pakə. Kədaɗɗaŋ mambray əmpa ɓa, məpak sləmokum ammba wənnəŋka, məs Maŋgəlva aɗi a makrokum, ndəni dədawɓap əkõhgukum.

²² Kədassoŋ məzaprəm wən na Maŋgəlva də sləmokum kaka ɓa, gəssi. An kaɗɗanən an wən na Maŋgəlva anah ɓa asna əmbəɗan ki zukumi.

²³ Ɗəf awandi dəprəm wəpel na Maŋgəlva kaka'ə ya dəɗɗa an anah ɓa, asna nan tay va ɗəf məzula haran də darawgal, awlak haran va asani.

²⁴ Səza awla harani, ambatka, azgətək go'ləŋ ki va asani.

²⁵ Ya ɗəf an məzəɗɗum aka mahenziŋ na Maŋgəlva məzupələm məsamgən na kiymə, məzəzbani, waprəm əpele, azgət na ɓa waɗɗa an əpel van anahə, ɗəf nani zən wasan nek addəv an adaɗɗa pakə.

²⁶ An ɗəf aɗiyək zən va ɗəf na Maŋgəlva, an awzi zən aza wəpel na man ɓa, zən adawɗiyəs ɗar mekeleŋgi, tepelke adawa aka zəni.

²⁷ Aba Maŋgəlva Afən na, əzba an dəslə yaŋka: əzga sləma aket mitiwɗeŋge gəm aket gil net gəbayɗe addəv əzəmsãhã neti, gəm ətaɗ kizə ɗəf ka adawraygən zən dit zəgeɗ negge ɓa.