Titus 1 - Bible en Guidar

Ətoŋ addəvən ( 1:1-4 ) Əsɗa

¹ Intə Pol, məgəɗ wəza na Maŋgəlva, maslən na Yesu Kristu, vi kawki məweleɗe na Maŋgəlva aka ətafa gəm aka əsən gesiŋ gərak va dəslə də geslne' na Maŋgəlva,

² vi dəssoŋgən də əɗɗum nawga zeŋgile an faɗ məs Maŋgəlva məza awawən ɓa aynanman tak əzəməɗa,

³ məs dərban əpel nan də pay məs aɗiyə, məpsu nətəlgən ma nan va aza Maŋgəlva məzukõhgəm aɗi wən nani.

⁴ Sən Titus, wətu an gesiŋ addəv ətaf məs dəsapamə. Mbəlembəle də zazay na Maŋgəlva Afəni gəm na Kristu Yesu məzukõhgəmə dəssoŋ akoko.

Deyeɗe naddəv Gəla-na-Maŋgəlva ( 1:5-16 ) Wəza na Titus a Kereta

⁵ An nəppok sən a Kereta na, vi kəzaɓangən wən məs dəpələ gəm kəɗigin ɗiy məsɓet net məkristuɗe a walaŋgəla-metiŋ pak va nəɗɗisuk wən nani.

⁶ Ɗəf nan dəsan məza wən akan ɓa, zələt guluk taka, dəsan dit kirin məzutafaŋgə, məza ədaw mbərayən ɓa, ki ɓəɓəl ɓa.

⁷ Vi aslək məzutaɗa net məkristuɗe dəsangən məza də wən akan ɓa, vi ndəni məzudawgən wəza na Maŋgəlva. Adawsan ɗəf məzukaɓ ɓa, mədəgədəv ɓa, dəppan kiyən sən mbazla ɓa, məŋgəl əgay ɓa, məs mamayã na ərəh net wil ɓa.

⁸ Ya dəsan mətaf melekeɗ annanda, məŋgəl əɗɗa moggoni, məs maɗɗulani, ɗəf təstəsə, salala, mərəm ki zəni,

⁹ dəsan ɗəf məs dəppan kiyən sən əpel məs dəslə də ətafa va mərbani vi dəɓapgən əmpəsit ɓəɓəl sit ɗiy də əɗɗa əyak moggoni gəm dətakgən met məbayaŋ ma.

¹⁰ Vi ɗiy diyɗaŋ ki ɓəɓəlɗe, məpeleŋ ɗarə gəm məmbəɗetin ɗiyi, sasak a walaŋgit məs dəskəlaŋ awra.

¹¹ Amsan meti, tahəŋ əraygitin ɗiy də gəla net pakə, də əɗɗa əyak məs dəslə ɓa vi kawrəh ərəh net wili.

¹² Ɗəf taka səmmbeti, məskəleŋ neti amna: Ɗiy na Kereta məs tepelkeɗiŋ faɗə, zəgeɗ memeyẽɗ mbəreytiŋ, məs memeyẽɗ mətampəlɗe.

¹³ Əpeləs gesiŋgi, vi vaski ahayẽt zuk soksoku, vi dəsoŋgən də ətaf an moggoni,

¹⁴ adappanən kiyit sit mambeɗ net mə Yudeɗi ɓa mãy sit mahenziŋɗe net ɗiy məs dəppanən gegesiŋ ɓa.

¹⁵ Zəga pak moggoni azet məs makret barə, ya azet ɗiy mbəreyti dit ɗiy məs dətafaŋ ɓa, zəga moggon tay ɓa, vi maɗɗuleti gəm kpukpum na mekret arayaŋka.

¹⁶ Tahəŋ ənah na asənnənək Maŋgəlva, ya ndəɗaŋ əzelen də wəza neti, məreygitiŋ, məɓoŋgitiŋ, wəza moggon tay adawɓapaŋ əɗɗa ɓa.