Nehemi 13 - Bible en Guidar

An məs Nehemi akkpaŋgan temtemi

¹ Aka daska'a ləŋ, daŋɗan ɗerewel na Moyis abet ɗiy na, yaŋ məgap aka təki adawnah na, mə Ammonɗe dit mə Mo'abɗe atoŋgoŋ na ɗah aret ɗiy na Maŋgəlva ɓa.

² Vi dəzzoŋ ələmsitin mə Israyel də zəga nawzəm may iŋkile ɓa; mə Mo'abɗe afaɗaŋ zəga sən Balam dərəŋ vi dəkigən əray aket mə Israyelɗe, yaŋ Maŋgəlva akkpaŋgan əray van ka əzaɓa.

³ Səza Israyelɗe aprəmnən mahenziŋgis na, yaŋ agilgitin ɗiy en məslahã səret baymeti.

⁴ Lahəŋ na, məsdələv Eliyasib məwel dəzgəgən sləma aket gəleɗe nakkalan zəga naddəv gəla na Maŋgəlva namə, həlfən Tobiya na gugo,

⁵ yaŋ appansən gədəv gəla taka metiŋgin məs adakkalan zəga lahəŋ addəvən va: əvəl də zəga na mabardaw, tursan, may hiŋgiɗ naɗɗa wəza addəv gəla na Maŋgəlva, makəlawan na haykəmari, mbazla na meketepe, gəm mẽlẽ, məs məɗiywən nan napsit mə leviɗe, may sit məyaŋ gəlya dit məgaŋ metiveɗi gəm an məsdəlveŋge adawgəmaŋgə.

⁶ Aka pay wənəs adaɗɗa pak na, in tat a Yerusalem ɓa: Ndawək aza Artazerses məlĩ na Babilon addəv wəzva makaklaw hoku kiyən sula nan aka məlyã. Dərɓaga ənziya siɗikke na, nəssohuk tive səva məlyã,

⁷ yaŋ nəmndaw a Yerusalem. Nula mbərayən an Eliyasib agəɗə, dapsən gədəv gəla sən Tobiya a daŋgla na gəla na Maŋgəlva.

⁸ Adan suwək gədəvu diyɗa, ndəni nəndol zəgeɗ na Tobiya pak səddəv gəla appaka.

⁹ Yaŋ nənah sit ɗiy afaɗetin gədəvit gəleɗe nakkelet zəgeɗ salala, vi kamsak əzi hiliŋgiɗ naɗɗa wəza addəv gəla na Maŋgəlva, may zəgeɗ en məvəl dənɗaŋ, gəm tursan pak va lahəŋka.

¹⁰ Nəprəmək əmpa na, mə leviɗe awrəhən zəga an məŋɗan napsit ɓa. Vini kan mə leviɗe gəm məyaŋ gəlya addoŋ nawaydi pak a guli ananda mbagənən weza.

¹¹ Ndəni nehẽyẽt mətawaŋwəna, yaŋ nəmna, vimi məppan gəla na Maŋgəlva firik di? Ndəni nəkkelet mə leviɗe dit məyaŋ gəlya, nəɗi aka wəza a gəleti.

¹² Mə Yudeɗ kan atəŋgən əki makəlawan na haykəmari, mbazla na meketepe gəm mẽl addivit gəleɗe nawzaɓ zəgeɗi.

¹³ Nəwelik ɗiy nazlga sləma aket gəleɗe vetiski, ndəɗaŋgə may məsdələv Selemiya, məzuver Sadok də mə levi Pedaya, gəm ɗəf nabbah siti, ana Hanan wət Zakur wətən wətən Mataniya; vi ɗiy pak tay əwlenin na, tahəŋ də maɗɗuleti. Ndəɗaŋgə nawɗak zəgeɗ vet sit milmiŋgiɗti.

¹⁴ «Aɗɗum akawa Maŋgəlva nawa aka aska! Kədawzan an nəgəɗ də moggon vi gəla na Maŋgəlva naw gəm vi əga nanəŋ ɓa.»

¹⁵ Daska'e nule ɗiy naka dələv na Yuda, əndepetin kirtin megezlembirke a mozgoy nawɗotit gala pay naffete. Ɗiy meɓɓet əsak haykəmari, may əkyak iŋkile na megezlembirke, may uwa na megezlembirke, may uwa na sokoyo, may zəgeɗ temtem aket korɗe vi kawtoŋgit a Yerusalem aka pay naffete. Yaŋ nəhẽyẽt gala adawvəlnin zəgeɗ net veti.

¹⁶ Mə Tirɗe məs dəssoŋ a Yerusalem də gəla tam əkiyaŋ kilfi may zəgeɗ nawzəm temtem, nawvəl sit ɗiy na Yerusalem may na Yuda də pay naffete.

¹⁷ Nəhẽyẽtik ɗiy gugriɗe na Yuda, nəɓsit na: «Zəga mambray miy kədaɗɗaŋ vaŋ gəm əraygən pay naffet di?

¹⁸ Efiŋgiɗkum vas aɗɗaŋgə, ndəni Maŋgəlva nam akgbo' tatwãhɗeŋ akam də aka walaŋgəla-metiŋgəŋ pakə. Yaŋ kədawkiyaŋ ədagədəv də metiŋgin aka Israyel də əraygən pay naffete!»

¹⁹ Aka zeŋgile ade aket metiveɗ na Yerusalem, yaŋ nenah siti, ampetin maddembeɗe nenah sit adawkolnin an pay naffet dətoŋ ɓa ɓa. Yaŋ nəɗi gewleɗ naw meɓɓet a metiveɗ na walaŋgəla-metiŋ, vi zəga təttaka dayday adawtoŋ pay naffet ɓa.

²⁰ Vasna, ɗiy məmanən vet dit məvelaŋ zəgeɗ temtem pak avoŋgoŋguk təl taka may sula appaka.

²¹ Nəhẽyẽtike, nəɓsit na: «Vimi kədafnaŋ aba zlava di? An kətəpaŋ sənənka, wanərmukum.» Təŋ siske na azzoŋ ɗah pay naffet əmpa ɓa.

²² Yas kan nənah sit mə leviɗe dəddoŋgən əslslay ziti, dəmbataŋgən əge metiveɗ na walaŋgəla-metiŋ, vi ɗiy dəɓe'eŋ sənəngən mahenziŋ na pay naffete. «Aw Maŋgəlva nawa, aɗɗum akawa'e vi as pakəska. Awlu sahə̃, vi memetiŋ na moggon noko!»

²³ Aka pay dəpaska'e, nərəh na, mə Yudeɗ akayaŋgək gil na mahəlfa net mə Asdodɗe, mə Ammonɗe may mə Mo'abɗe.

²⁴ Kirtit wəɗak əpeleŋ ma net mə Asdodɗe kana, təttaka tay dəsən əpel ma net mə Yudeɗ ɓa, meɓɓet tam əpeleŋ ma net ɗiy nahã may nada'ə.

²⁵ Nəhẽyẽtike, nəɗɗak mefɗeke aketi; hã nərgək ɗiy meɓɓeti, may nəmzohuk muhur kiyti. Nəswaygitik də iya na Maŋgəlva na, kədapsitin kirtukum muguluŋgit sit kirtit ɓa, may əgim kirtit sit kirtukum mezeŋgleket may ka nokum ɓa.

²⁶ «Sən wən vaski Salomoŋ məlĩ na Israyel atoŋ addəv mambray ɓa sa? Səket dəlveŋge pak məlĩ tay dəgil va ndən ɓa; Maŋgəlva nan aŋgləwəka, Ndəni Maŋgəlva aɗi məlĩ aka Israyel pakə. Də as pak gil nagu atoŋgənənək addəv mambraya.

²⁷ Ya azokum moggoni ɗəf deprəmgən na, mənokum tat əɗɗa mambray metiŋgin aka Maŋgəlva namə, də əɗi gil na guwa sa?»

²⁸ Taka səret kirtin Yoyada wətən daya net məsdəlveŋge Eliyasib, zələt wətən Sanballat mə Horon. Nan nərɓahan faraɗa səzawa.

²⁹ «Aɗɗumeti Maŋgəlva nawa, vi araygənənək matuya, wənmiyna na matuya gəm mə leviɗe.»

³⁰ Nəɗɗak ka duɗakaŋgən də zəga ɗar pakə, nəziwgitik məsdəlveŋge dit mə leviɗe, naway pak aka wəza nani.

³¹ Gəm nəɗiyək wən na əvəl dit seseme də pay nani, may əvəl dit zəgeɗ en dəsɓaŋ daabəŋ. Maŋgəlva nawa, aɗɗum akawa, agəɗ su moggoni!