Nahum 1 - Bible en Guidar

Ətawwən aka Niniwe ( 1:1-14 )

¹ Ətawwən aka Niniwe, ɗerewel nawla na Nahum mə Elkos.

Yawe, Maŋgəlva nawgeslne' səni, moggoni

² Maŋgəlva məskotoroki, Yawe ampəl kini. Yawe ampəl kini; ədagədəv nan gədaki yi. Yawe tay əmpəl kiyən aket məzuseɓɗe nani; herɗe nan addəɗ səket məzuzelɗe nani.

³ Yawe awda gədəv gu' ɓa, tay də wəɓap metiŋgini, appan na məgəɗ zəga ka məs man bartata ɓa. Tive na Yawe tay addəv buwən də səmyã gəm addəv barkataŋ; slaybuna, ndəni ologudum nammba təlni.

⁴ An ahãyanək pehe, pehe sa'ãtə; məlpeŋge pak tay əkkpe'ti. Dələv na Basan gəm na Karmel wamtaŋgə; gaslembeɗ na Liban aɓətaŋka.

⁵ Aɓletik mossorgoɗe gugriɗe, mossorgoɗe tahəŋ uwwereŋgi. Dələv aɓələk abani, gəm dəlvafuŋ dit zəgeɗ nakan pakə.

⁶ Naway nawɓap iziw aba ədagədəv nan di? Naway nawsilyen an makran asilik di? Makran tay vakvak va offo; awehetik gərmeŋge səbani.

⁷ Yawe moggoni; təki nawɗam pay na tatwãhĩ. Asinik en dəɗamaŋ azani,

⁸ an vovolum nawza tay ətoŋ daydayə. Tay əpalkat walaŋgəla-metiŋ warɓehet məzuzelɗe nan ara guzliyo.

Azet deyeɗe na Yuda

⁹ Miy kədaynaŋ aka Yawe di? Nan waraygən zəga; tatwãh asil na təl sula ɓa.

¹⁰ Dəssoŋ slakatslakat va gedirgeɗ daydayə gəm addəv əsa neti, kiyit gərəŋgərəŋgə: wazlaŋ dəwənnet va tərɗa məklakani.

Sən Niniwe

¹¹ Niniwe, sənokda yi, ɗəf məhew wən mbərayən aka Yawe agili, məziyan ma ɗəf aka mbərayən.

Sən Yuda

¹² An Yawe anah sən Yuda yaŋka: An məzuzelkumən tahəŋ gərakə, də diyɗa net zlaŋ na, wazaŋgə, tay dədambra ɓa. Nədoɗuk kiyko, nədoɗ na əmpa ɓa.

¹³ Kakaŋ na, wanəŋzlu zuk nan səkoko gəm wanəɓuh ŋgiyamɗe noko.

Sən məlĩ na Niniwe

¹⁴ Yawe aɗiyək wən nan akoko: Wətuk naddəvuk asan na nawka iya nok abe əmpa ɓa; wanəzan zəgakamaŋgəlva noko may məhəsit; səddəv gəla net meŋgilveɗ noko wanəso' magamas noko vi kəgap zəga ɓa.