Luka 18 - Bible en Guidar

Wənməkkpaŋga nat gagəbaya gəm mətawwəna

¹ Yaŋ Yesu apel sit wənməkkpaŋga vi adahək dəkkamaŋgən pay pakə məza əppan ɓa.

² Aɓsit na: Mətawwən tay a walaŋgəla-metiŋ maɓɓani awgeslne' sən Maŋgəlva ɓa, ɗiy tuturɗe ɓa pakə.

³ Ga gəbay tat a walaŋgəla-metiŋ vanəs məzəzzat azan ənah sən na: Ataw su wən na walaŋgu də məzuseɓ nawəŋka.

⁴ Ya mətaw wən van anziyək aka əɓoŋgo, ya dərɓagani, aɗɗumuk a makran na: Də nawgeslne' sən Maŋgəlva ɓa, ɗəf titir ɓa zlaŋ,

⁵ adan guluk kəŋ tat əki mawa, wanətaw sət wən nata, vi tədazzat təkastəkas əkrap su kiyu ɓa.

⁶ Yaŋ Daya amsak ənəh na: Məprəm an ɗəf mətawwən mbəraynəs anahə.

⁷ Sessel vasna Maŋgəlva agəɗ na təstəs sit ɗiy məs awel məzuhəmaŋ sənən dəfəɗ də kapay pak ɓa, wappet əlyaŋ sa?

⁸ In tat ənah sukum, wagəɗ sit təstəs go'ləŋ. Ya an Wətən Ɗəf adek na, warah ətaf aka dəlvafuŋ sa?

Wənməkkpaŋga aka mə Farisa gəm aka məkkal nzalaka

⁹ Yaŋ Yesu apel wənməkkpaŋga maɓɓan əmpa, vi məzulanən zit va ɗiy təstəsə gəm əzeletin ɗiy meɓɓeti:

¹⁰ Ɗiy sula tahəŋ dəmbataŋ addəv Gəla na Maŋgəlva vi kakkama, taka mə Farisa, maɓɓani məkkal nzalaka.

¹¹ Mə Farisa aziwke, akkamək də makran vaska: Aw Maŋgəlva nəgəɗ sukuk əsoko vi in tat va ɗiy meɓɓet ɓa, va mehelɗe, məɗɗaŋ mbərayən, məkuwaŋ a gizbe, awaniɓa va məkkal nzalakaŋ ɓa.

¹² In tat əɗɗa meme addəv pay buhul pak təl sula, in tat əgəm makəlaw na ərəh naw pakə.

¹³ Məkkal nzalaka aziwik faraɗa, dəɗɗum naw slan haran a disiŋ ɓa, ya tay ərga makrani, amna: Aw Maŋgəlva awəl sahã akawa, in məs mambraya.

¹⁴ In tat ənah sukum, ɗəf nan aslerik də Maŋgəlva aka amndan eŋgil ananda ki ɗəf an maɓɓanəŋka. Vi ɗəf an dəɓaygən kizən pak kawgəsani, ɗəf an dəgəsan kizən pak kawɓaygəni.

Yesu aɗɗak əzaɓ aket kirni

¹⁵ Ɗiy akiyaŋgək kirin memeɗeŋɗe dayday sən Yesu vi dərəŋgitigəni, ya adan gewleɗ nan awlanən vaska, ahayẽtini.

¹⁶ Yesu ayeke, amna: Məppet kirin dəzzoŋ azawa, kədawteknin ɓa, vi məlĩ na Maŋgəlva tay viyit ɗiy en dəgilyoŋ va ndəɗaŋ.

¹⁷ Gesiŋ gesiŋ nədawnah sukum: An ɗəf dətaf məlĩ na Maŋgəlva va wiyən muzliya ɓa, sessel atoŋ na addəvən ɓa.

Ɗəf məsarya

¹⁸ Ɗəf daya maɓɓan assohõnək Yesu dawnəh na: Mərbəzəga moggoni, mi nədaɗɗa nərahgən zeŋgile an nassa faɗ di?

¹⁹ Yaŋ Yesu azlan səna: Vimi kənah su na moggoko di? Ɗəf təttaka yi moggoni, Maŋgəlva yi.

²⁰ Kəsinik mahenziŋɗe ɓa sa: Kədakuh a gizbe ɓa, kədawbay gəbay ɓa, kədawhal ɓa, kədawa wən aka ɗəf ɓa, agagdakan afuk dət moko.

²¹ Zəgeɗis pak nərmek far səka sawãwã.

²² Adan Yesu aprəm vaska, aɓsən na: Apəl sukuk zəga təttaka əmpa: Avəl zəga nok pakə. Awɗak sit məssehẽŋɗe, vasna wakərah arya məzaɓan a disiŋ. Asna kədegən əzbaw kana.

²³ Adan aprəm wənəska, ɗəf nak kpaŋ gədəvən mədan, vi məsarya yi sawɓa.

²⁴ Yesu awlak vaska, amna: Tuwãhi məsaryeɗ dətoŋgoŋgən məlĩ na Maŋgəlva.

²⁵ Ɗəɗah zlogomo watoŋ dəmmba lapina kulat ki məsarya ətoŋ məlĩ na Maŋgəlva.

²⁶ Məzəprəmən wən nan aɓɗaŋ na: An vaski na naway nawkõh di?

²⁷ Yaŋ amna: An tuwãh azet ɗiyi, aza Maŋgəlva tay tuwãh ɓa.

²⁸ Yaŋ Piyer amna: Awle nam məppetik zəgeɗ nawray vamə, məzbokko.

²⁹ Yesu aɓsit na: Gesiŋ nədawnah sukum, ɗəf tay dədappan gəla nani, awaniɓa guluk nani, awaniɓa milmiŋgiɗni, awaniɓa migilni, awaniɓa kirtini aka batam məlĩ na Maŋgəlva,

³⁰ məza arah na vas təl ɓaɓay aka pay an kakaŋka, gəm zeŋgile nassa faɗ aka pay an dədazan ɓa ɓa.

Yesu tay ərban əmta gəm əsilye nan səka əmta təl mahoko'ən

³¹ Yaŋ Yesu agim gewleɗ kəlaw kiyit sula, aɓsit na: Mənam tat əmbat a Yerusalem yaŋka, an məskəleŋɗe avereŋ aka Wətən Ɗəf pak waknahə.

³² Vi kappani ammba vet ɗiy-ɗarə, kawmasi akani, kawrani, kawtufi mefɗe akani,

³³ dərɓaga ərgan də ɗoŋgroŋ, wabayəni; pay mohoko'ən wasil səka əmta.

³⁴ Ya dəprəmən an məs Yesu adawpel akan ɓa. Wənəs aɗamək a mahereti, dəsənnən an aŋgəl əpel ɓa.

Yesu tay əmbəlgən daŋgar

³⁵ Adan Yesu agap go'o aza Yeriko, daŋgar maɓɓan tay ɗewwe aba tive əbbəka.

³⁶ Adan aprəm ɗiy ətoŋgoŋgu, attok aka an dəgəɗə.

³⁷ Yaŋ mənah sən na: Yesu mə Nazaret məzutoŋgo.

³⁸ Aɗiyək geŋgere dawnəh na: Yesu Wətən Davit awəl sahã akawa.

³⁹ Ɗiy en nabe ahayãnənək dəɓətgəni, yaŋ adaŋzla vaŋvəl dayki lahəŋka: Wətən Davit awəl sahã kawa

⁴⁰ Yesu aziwke, aɗi wən nan dəkisənəngəni. Adan agap azani, assohõn na:

⁴¹ Mi kəŋgəl nəgəɗ sukugən di? Azlanəka: Daya, kəta nəmsak ula.

⁴² Yesu aɓsən na: Amsak awələ, ətaf nok akõhgukko.

⁴³ Haran akoluk gətgətəs ləŋ, azbanək Yesu də əgagdakan Maŋgəlva. Ɗiy dulanən as pak aɗiyənək ki Maŋgəlva.