Isaya 1 - Bible en Guidar

Əpel na kəleŋ temtem aka Israyel ( 1:1—12:6 )

¹ An Isaya wətən Amos awəl addəv hənhən aka Yuda də Yerusalem aka pay net may Oziyas, Yotam, Akaz gəm Hizkiya milyeŋge na Yuda.

Ɗiy məs aprəmaŋ gabba zəga ɓa

² Disiŋ, aprəma! Dəlvafuŋ, apak sləmoko, ha'aw Yawe dəpeli: Nəɓaygitik kirni akkpaŋgaŋgək ɗiy gugriɗe yas net aɓoŋgoŋ akawa.

³ Wasli asənək ɗəf dəlbaha, koro tam təki nawzəm məs afən apsənə. Israyel nan dəsən ɓa; ɗiy naw azgan sləma ɓa.

Zəga tay məza məɓlani aka dələv na Yuda ɓa ɓa

⁴ Əray akokum ɗiy məɗɗaŋ mambraya, ɗiy məknehit də əɗɗa an dəslə ɓa, gebbet məɗɗaŋ ɗarɗarə, kirtit məsukoŋmegiɓe! Azganənənək Yawe, azeleninik Maŋgəlva Salala na Israyel, aktuhunək diɓet səni.

⁵ Kargukum aza mi əmpa mənokum məzban əɓoŋgəŋ di? Ki ɗəf pak tay dit huweɗi, makra ɗəf pak addakka.

⁶ Təŋ səza gədəv təlkum hã aka kikum təki tay salala ɓa. Təki pak huwa yi, gəla ərga ɓulotɓulot gəm huwa wirwiri, məs məskoɓni haran ɓa, miynani ɓa, migipni də mẽl ɓa.

⁷ Dələv nokum tay addəv tatwãha, walaŋgəleɗe nokum məzletiŋgə. Məzuzelkumən tahəŋ əraygənən dələv nokum a ma horokum; əzəmsahã yi va kəɓəs na məzuzel dugulo.

⁸ Walaŋgəla-metiŋ na Siyon dəpəl kaka'ə va guɗuk addəv guli net megezlembirkeɗi, va gizlirke addəv guli net tessekeɗi, va walaŋgəla-metiŋ məsərŋgəslən.

⁹ Va Yawe Məzuɓappak dəpəl səm ɗiy en dəndəwəɗaŋ ɓa na, kəta məkkpaŋgək va Sodom, kəta waməgil va Gomorra.

Əzba an daryaw ara Maŋgəlva

¹⁰ Məprəm əpel na Yawe mənokum məs va ɗiy gugriɗ na Sodom, məpak sləmokum ammba mahenziŋ na Maŋgəlva namə mənokum məs va ɗiy na Gomorra:

¹¹ Mi nədaɗɗa də Maŋgəlva nokum kədawzaɓaŋ diyɗaŋ di? Yawe amna. Nəbək də əda əvəl nawzla kurmbuɗuk net timeŋgiɗi gəm səlhã net zəgeɗ memeyẽɗ mikirti. Mbel net medgeɗgeɗe, net timeŋgiɗi gəm net murgoŋɗe tay nek azaw ɓa.

¹² An mənokum tat əzzoŋ ərban kiykum abaw na, naway dənah sukum kendapanəngən daŋgla naw di?

¹³ Məppan gabba əkisu əvəl məza tay də ətərwəray ɓa, əzla tursan, nan nəzelike; təlaperi, pay naffete ətəlma na wəkkal metiŋgini, zəga ɗari azawa, nətaf na əkkal nokum naɗɗa mbəraynəŋ ɓa.

¹⁴ Wəzləreɗ na təla ama gərəm də əkkal nokum, nəzelike, wakkpaŋgaŋ azaw va zəga miynan nawsla, nəyək dawslani.

¹⁵ An mənokum tat əppar vokum vi kakkama, wanəɗup haraw vi nədawla ɓa. Kəta muwan əkkam nokum zlaŋgə, nəprəm na ɓa, vokum aknahək dit mbeli.

¹⁶ Məslslayə, məbbur zukum, məzargən wəza mbərayən nokum sə maharawa, məppan əɗɗa mbərayən.

¹⁷ Məyagan əɗɗa moggoni, məkayan təstəsə, mətak ma məppət ɗiyi, məgəɗ təstəs sən mitiwe, mətərət gagəbaya.

Ətawwən na Daya aket ɗiy məɓoŋti

¹⁸ Mide, mətawangəni, Yawe anahə. An mambray nokum tay ɗiwɗiwi, wakkpaŋ babar ndasl va ɓeɓrezlerizze. An tay pəreŋ va gozoy, wassan babar va helege na ngərayã.

¹⁹ An kətafənka, kəprəmənka, zəga moggon, naka dələv kədawzəmaŋgə.

²⁰ Ya an kətafən ɓa, kəɓoŋgoŋko, də masalam adawbay kuməni. Vaski, ma Yawe dəpeli.

Əbbur na Yerusalem

²¹ Mbarmbar walaŋgəla-metiŋ an təstəs akkpaŋ məpolkoyo di? Təstəs gəm ədaw sarara tahəŋ addəvən lahəŋka; ya kakaŋ na, məbayaŋ gəbayəŋgə.

²² Təbəz babar nok akkpaŋgək va pəlu movoto, mbazla nok akkpaŋgək iŋkile iŋkile.

²³ Ɗiy gugriɗ nok mitemtiŋgə, met təp dit məhelɗeŋgeŋ, naway pak tay əŋgla zəga na mekeleŋ, tahəŋ əzban zəga naɗɗa soko, aɗɗaŋ təstəs sən mitiwe ɓa, wən nat gagəbay awgepit ɓa.

²⁴ Vini Daya Yawe Məzuɓappak Məzuɓap na Israyel aɗiyman na: «Haya əraya, wanəmpəlkiya aket məzuseɓɗe nawa wanəfaɗ sit məzuzelɗe nawa.

²⁵ Yerusalem, wanəkkpaŋ dəzoko: anəskoɓuk də bətuwa, wanətor haramba sə zoko.

²⁶ Wanəkkpeŋget mətawaŋwən nok va lahəŋka, gəm məzəsəɓ sukun aka ədaw nok va aka ətəŋga. Asna kawyuki Walaŋgəla-metiŋgin na təstəsə gəm Marba Walaŋgəla-metiŋ moggoni.»

²⁷ Siyon wakõh də əɗɗa təstəsə, ɗiy en dəɗiyaŋ marava tam də ədawaŋ sarara.

²⁸ Ya əzay viyit ɗiy məɓoŋti gəm məs mambrayɗe, wəgrak net ɗiy en dəzganən Yawe yi.

²⁹ Vi wil wadukuməni mənokum məŋglaŋ əgegdeketin məŋgilveɗ ammbet wəleŋɗe na matuya, wil wadukuməni mənokum məŋglaŋ əgegdeketin məŋgilveɗ addivit wəleŋɗe rəɓə.

³⁰ Vi wakəssoŋ va wəlaŋga na matuya məs van adayyo'o, va wələŋɗe rəɓ məs awrahaŋ iŋkile ɓa.

³¹ Ɗəf an gbogboŋ wasan va məzləgəlagəla, wəza nan na va offo muhurun, wazlaŋ sulegiti sapə, məza ɗəf namtan ɓa.