Hose'a 5 - Bible en Guidar

Məsdəlveŋge mbəreyti

¹ Məsdəlveŋge məprəm wənəŋka, məpak sləmokum gəla na Israyel; gəm gəla na məlyã: mənokumtə nawtawwən kəta, yaŋ kəkkpaŋgaŋ həmbaw a Mispa, ka mazzaɗ aka mossorgo metiŋ na Tabor;

² ɗiy mbəreyit aso'oŋguk vov kpukpum na gəbaya. Ya naw wanəzəmgit sahã pakgiti.

³ Naw nəsənək Efrayim, wən na Israyel dəɗam azaw ɓa. Adan kakaŋ kəpolkoyonək zuko Efrayim, Israyel pak arnokonək zəni.

⁴ Wəzaɗe net tahəŋ ərban na, əmnda net tuwãhĩ aza Maŋgəlva neti, vi əmpəs na polkoyo dəzəm məlĩ aketi, dəsənən Yawe dərəŋ ɓa.

⁵ Wəkaɓ na Israyel tay ətawwən akani. Israyel də Efrayim ataŋgbayãŋgək vi heslepe neti, Yuda pak ataŋgbayə̃k dənɗaŋgə.

⁶ Waddoŋ əkayan Yawe dit gilew net gəm wasliɗe neti, ya arəhnən na ɓa: vi azarək faraɗa səzeti.

⁷ Araygənənək iya na Yawe, vi awaŋ sulomɗe; kakaŋ wəzləra na təla ama gərəm wazim də zəga an haran net pakə.

Əlpa awalaŋ Efrayim də Yuda

⁸ Məffon mohõ a Gibeya, gozloro a Rama, məɗi gogoyo a Bet-Awen. Karmuki səkəla dərɓogoko Benyamin!

⁹ Efrayim wakkpaŋ kiyməski pay nazga'a. In tat ətəlma də əssel a weleŋgit mahəlfaɗe na Israyel.

¹⁰ Deyeɗe na Yuda, ɗiy mədderenən met meŋgeŋgə; wanəgbo' herɗe naw aket va əggbo' iŋkile.

¹¹ Məsərni ma Efrayim, wən armaka, vi ampa tələn əzban səmyã ɗarə.

¹² Wanəsaw va məsuksləma aza Efrayim gəm va yoro a daŋgla na Yuda.

¹³ Efrayim awlak gbəgba' nani, Yuda tam yoro nani; Efrayim alək kəla Asiri, aslənik metiveɗ aza məlĩ metiŋgini, ya nan aɓap na əkõhgukum ɓa hara, anzaɗ sukum na yoro nokum ɓa.

¹⁴ Vi wanəsaw va ɓoolu aza Efrayim, va gawla ɓoolu aza Yuda. Naw in nədawpiweni, sissiŋ wanəmbat dəndəni, ɗəf tay nawmõhən ɓa.

Əmnda aza Maŋgəlva

¹⁵ Wanəmbatə, wanəmndaw agəlawa, hã gap dəsənəngən na araygənənka, addəv əzəmsahã net na dəkayawəngəni dəkkpaŋgaŋgən azawa.