Gəlyaɗe 18 - Bible en Guidar

Məlĩ tay əsokon Maŋgəlva dərɓaga əska wəla

¹ Səza daya net məyaŋgəlya. Səza gawla na Yawe, səza Davit. Gala apel əpel naddəv gəlyaŋ sən Yawe, pay Yawe akõhgən səvet məzuzelɗe nan gəm səva Sawlu pakə.

² Yaŋ amna: Nəŋglukuko Yawe, gbogboŋ naw kənani.

³ Yawe yi milɓe nawa, təki nawɗam naw gəm məkõhguwa. Maŋgəlva nawa, milɓe məs nədawɗam azani, baray nawa, gulom naska wəla nawa, korgu nawa.

⁴ Nəyak Yawe! Yas akõhgu səvet məzuzelɗe nawa, soko nani.

⁵ Helegeɗ namta atuwəɗwənka. Lolohẽɗ mbəreyit ageslne' guwənka,

⁶ helegeɗ na təki nanziya namta atəwəɗwənka, bizwilɗe namta tahəŋ mənslinit abawa.

⁷ Addəv tatwãh nawa, nəyak Yawe, yaŋ nəhəm sən Maŋgəlva nawa. Aprəmək wəlaw səddəv gəla nani; əhəm nəhəm sən agapək a sləmani.

⁸ Yaŋ dəlvafuŋ aɓələ, akkeri; gabbet mossorgoɗe gugriɗe akkereŋke, aɓlaŋgək vi gədəvən adə.

⁹ Enene agilyoŋgək sə məŋkənni, offo məzuzla əgilyan səmani, slay offo ngiɗngiɗ əzzan səzani.

¹⁰ Akrosək disiŋ, ndən priki, slaybuwən ɗəkɗək ammba təlni.

¹¹ Ndən kərək aka keruba, ndən veŋgi, tay kofloho aka persleke səmyã.

¹² Guzli yi təki nawɗam nani, guɗuk nan kiyən tərwəslə: guzli net iŋkile gəm slaybuwən ɗəkɗəkə!

¹³ Səza təki kerker nabani yi, slaybuwən ɗəkɗək ɓeɓrezle gəm slayoffo agilyoŋgu!

¹⁴ Yawe ahãyək sə disiŋ, Məsəɗəɗə arbanək wəlani, də ɓeɓrezle gəm slayoffo!

¹⁵ Ndən pa' əhwẽt herɗe nani, ndən təraygiti, əwiɗ na buwən kwiti', atəraygiti.

¹⁶ Də wəhãy noko, Yawe, də səmyã nampəs noko, iŋkile arslaŋka, gabba dələv arbəka.

¹⁷ Sə disiŋ, atəl van əslawa, agdəhu səret iŋkile metiŋgiti.

¹⁸ Ndən əkõhgu səva məzuzel naw kəkərtəhã, gəm səvet məzuseɓɗe naw gbogboŋɗe daykiywa.

¹⁹ Pay nawray nawa, ndəɗaŋ əwakaŋ səwəni, Yawe yi məsək suwa.

²⁰ Amõhwəka, ndən vitguwa; vi aŋgluwəka.

²¹ Yawe agəɗ suwək va aza salala nawa, amndan suwək va aza bartata na vawa,

²² Vi nərmak tive na Yawe, nəgəɗ mbərayən aka Maŋgəlva naw ɓa.

²³ Tiveɗnanziya nan pak abawəŋgə, nəzgan wən an aɗi naɗɗa ɓa.

²⁴ Təstəs-gərak nəsaw dəndəni, nəgak zu səza heslepe pakə.

²⁵ Yaŋ Yawe agəɗ su va aza salala nawa, va əssa təstəs na vaw arbə ama harani.

²⁶ Də ɗəf an moggoni, is tat əɗɗa moggoni; də ɗəf an təstəs-gərakə, is tat əɗɗa təstəs-gərakə.

²⁷ Də ɗəf salala, salala kənani; də ɗəf an slokorslokoru, is tat ərban na slokorro kənani.

²⁸ Vi istə kədawkõhgit məssehẽŋɗe, wakəmndeget məzukaɓaŋ afuŋgu.

²⁹ Istə kədawkekeɓe'gən su lalam nawa Yawe. Maŋgəlva nawa, akekeɓe' su guzli nawa.

³⁰ Vi də isi yi nədanzaw əwak sən dula, də Maŋgəlva nawa, wanəzlah ki zlava.

³¹ Tive na Maŋgəlva təstəsi-gərakə, Əpel na Yawe arbək ta'ə. Baray net məɗamaŋ azani yi pakə.

³² Naway Maŋgəlva, abbərki Yawe di? Naway milɓe an Maŋgəlva nami ɓa di?

³³ Maŋgəlva yi məzəpsu gbogboŋgo, tay əkkpaŋgan tive naw təstəs-gərakə,

³⁴ tay əkkpaŋgan təlu məstaka va net muneŋge. Tay iziwgu aket mossorgoɗe gugriɗe.

³⁵ Tay iyagaw nawgaya, gəm vaw danslin bəle na təbəz pepreŋge.

³⁶ Is tat əpsu baray naska wəla noko, vok dəzəŋ tay ərma vawa, ulasahã noki dəɓayguwa.

³⁷ Is tat əkkafan təlu ammbawa, hara təlu agənesl ɓa.

³⁸ In tat ərɓehet məzuzelɗe nawa, nərufuke, namndaw məza nəgrek ɓa ɓa.

³⁹ In tat əŋgrofti, aɓapaŋ na əmnda əsilyoŋ ɓa, tay əskotoŋ ammba təlwa.

⁴⁰ Is tat əvay gbogboŋ nalpa, is tat əvoŋgən kiyit məzusilyoŋ akaw ammba təlwa.

⁴¹ Kərɓehet suwək məzuzelɗe nawa, in tat əzet məzuzelɗe nawa.

⁴² Tahəŋ əhəmaŋ əkay əbbaha, məzəbbah tay ɓa; tahəŋ əhəmaŋ sənən Yawe, dəzlan sit lah ɓa.

⁴³ Wanəkkpeŋget va burɗuk ammba səmyã, wanəndep va ndərɓa aka tive.

⁴⁴ Is tat əkõhgu səza ərmama net ɗiyi, kəɗiwək aket ɗiy-ɗarə. Ɗiy məza nəsin ɓa tahəŋ əɗɗaŋ səwən wəza;

⁴⁵ An nəpelke, tay əprəmwəni; molhõyẽɗ tahəŋ əgagdakawa;

⁴⁶ Molhõyẽɗ addakaŋka, tahəŋ əgilyoŋ səddəv zlava nawɗam net də wəkkere.

⁴⁷ Yawe madarani! Soko sən milɓe nawa! Gagdak sən Maŋgəlva məzukõhguwa!

⁴⁸ Maŋgəlva yi məzəmpəl kiywa tay əmndeget ɗiy ammba təlwa.

⁴⁹ Is tat əkõhgu səvet məzuzelɗe nawa; gəm əmpa is tat əkõhgu səvet məzusilyoŋ akawa, gəm səvet məsgagayɗe.

⁵⁰ Vini, wanəɗi kiyuk aweleŋgit ɗiy-ɗarə Yawe! Wanəyə gəlya də iya noko:

⁵¹ Tay əpsən əska wəla metiŋgin sən məlĩ nani, tay əɗɗa moggon aza mesiya nani, sən Davit də zeŋvin hã faɗə.