Gəlyaɗe 132 - Bible en Guidar

Siyon, gəla na Daya, walaŋgəla-metiŋ na Davit

1 Gəlya nawpəŋ ədda əkkam a Yerusalem.

¹ Gəlya nawpəŋ ədda əkkam a Yerusalem. Yawe, aɗɗum aka Davit, dit tatwãhɗe nan pakə.

² Ndən məs dəsway sən Yawe, gəm aynan man sən Məzuɓappak na Yakob.

³ «Sessel nətoŋna a gizlirke anawda ɓa, sessel nəlna əvoŋ aka zəga nawvoŋ naw ɓa,

⁴ sessel nəppan na haraw əɗup ɓa may haraw simbrim sit sin ɓa,

⁵ hã in gassa təki sən Yawe təki nassa sən Məzuɓappak na Yakob!»

⁶ Məprəmək na tay a Efrat, mərəhək a muyã na Ya'ar:

⁷ Mədam a təki nassa nani, məpu' səm aba təki nawɗi təlni.

⁸ Asil ade a təki naffet noko Yawe isi də akoti na gbogboŋ noko!

⁹ Məsdəlveŋge nok dəgulnən lukut na təstəsə, en dətafkun dəɗɗəlaŋ də wənneke!

¹⁰ Vi gawla nok Davit, kərɓahan mesiya nok ɓa!

¹¹ Yawe asway sənək Davit; gesiŋgi aggbi'en na man ɓa: «Uwa naddəvuki məs nədawɗi aka mazaŋga noko.

¹² An kirtuk armanənək wənmiyna nawa, də an aziwgin temtem nədawyagan siti, asna kirtit pak wassoŋ aka mazaŋga na məlĩ nok hã faɗə.»

¹³ Vi Yawe awelik Siyon, aŋgluwək ka təki nassa nani:

¹⁴ «Aŋki təki naffet naw hã faɗə, aŋ nədawsawa, vi anan nəŋgələ.

¹⁵ Wəzaɓ nədawzaɓan wərəh nani, wanəbet məssehẽŋɗe nan də waya.

¹⁶ Wanəgul sit wəkõh sit məsdəlveŋge, en dətafaŋ əɗɗəla adaɗɗəlaŋ sən ənneke.

¹⁷ Adaki nədawgilgin mohõ Davit, nəɗiyək lalam ta' sən mesiya nawa.

¹⁸ Wanəggbo' wil aket məzuzelɗe nani, kulpup na məlĩ nan waffuĩ akani.»