Galatiyen 2 - Bible en Guidar

Pol dit mesləŋɗe meɓɓeti

¹ Siske na, sə dərɓaga əzva kəlaw kiyən poɗo, in həmsak peŋ a Yerusalem də Barnabas, nəgəmək Titus ammbawa'e.

² Nəpeŋgik adak dəka hənhən an nərahə, nərban sitik Alabara Nenek məs nədarban sit ɗiy en ɗarə, ya də tive temme nərban sit ɗiy en məzuɗinən kini, vi, va agəɗ pak wəza naw adassan ɗar mekeleŋ ɓa.

³ Ya Titus məs dəsan də inəŋ Gəreki, məskay wəlan dayday dəskəlgən awra ɓa.

⁴ Sən wən net milmiŋgiɗəm mətoŋgoŋwən-gif məwaŋ wəna, məs dətoŋgoŋ aram vi kakkes gabba əssa na kiyəm mərah də Yesu Kristu vi kakkpaŋgamən belemɗe.

⁵ Məppan zəm əɓe' sit pay siɗikke ɓa, vi gesiŋ na Alabara Nenek dəsan sukumgəni.

⁶ Ya məs adawgagdaketin va ɗiy na sləma nek, tay dəssaw aza an assoŋ lahəŋka ɓa, aza va ɗəf asan Maŋgəlva adazga sləma ɓa, vi ɗiy na sləma vet dədoɗnən kiyu ɓa.

⁷ Awlanənək dərəŋ na, məpsuwi ərban Alabara Nenek sit gayẽɗ va məpsən Piyer dərban sitgin en dəskəlaŋ awra.

⁸ Vi məs dəgəɗ wəza addəv Piyer dəsangən maslən net en dəskəlaŋ awra, agəɗək wəza addəvwa'e viyit ɗiy-ɗarə.

⁹ Adan mãy Yakob, Kefas gəm Yohanna, ndəɗaŋ məs adawlaŋ va dədəkeɗi, asənnən mbəlembəle an məvaya, armanənək vawa gəm na Barnabas karban əslere, vi məmbatgən azet ɗiy-ɗarə, net tam azet məs dəskəlaŋ awra.

¹⁰ Məssehẽŋɗe kaka mədaɗɗum aketi, ndəni vani yi'e nəgəɗ də kakara.

Pol tay əhãyan Piyer a Antiyos

¹¹ Adan Kefas ade a Antiyos, nəziyək haraw akani, nəhayanək kerekeke vi amzlaka.

¹² Vi tak əzza net ɗiy en məs Yakob aslənə, tay əzəm sap dit ɗiy-ɗarə, ya səza azzoŋgu, ndən zən ɗoh bit səzeti, geslne sit dəskəlaŋ awra.

¹³ Yaŋ mə Yudeɗi meɓɓet aɗɗaŋ va nani, hã kpaŋ agdəhən Barnabas əɗɗa va neti.

¹⁴ Ya adan nula awdawaŋ təstəs va addəv gesiŋ na Alabara Nenek ɓa, nənah sənək Kefas abet ɗiy pakə: An is mə Yuda is tat ənziya va net ɗiy-ɗarə məza va net mə Yudeɗ ɓa na, kami kədaska wəlet ɗiy-ɗar dəssoŋgən va mə Yudeɗ di?

Mə Yudeɗ dit mə Yudeɗiŋ ɓa pak, əkõh net də ətafi

¹⁵ Nam məwəm mə Yudeɗi, məde səzet ɗiy-ɗar məs mambrayɗeŋ ɓa.

¹⁶ Məsənka, ɗəf tay nawsan təstəs də wəza na mahenziŋ ɓa. Abbər də ətaf Yesu Kristu ɓa, nam pak mətafək Yesu Kristu, vi məsamgən təstəs də ətaf Kristu məza də wəza na mahenziŋ ɓa. Vi ɗəf tay nawsan təstəs də wəza na mahenziŋ ɓa.

¹⁷ Adan mədawkayan əssa təstəs addəv Kristu, mərəhmi na, nam pak məs mambrayɗe mənani, kaŋ kan na Kristu məgəɗ wəza na mambray yi sa? Tay vas ɓa!

¹⁸ Vi an nəmsakə ərkan an məs nəɓəzlə, asna in tat əkkpaŋgan zu ka məggar ki mahenziŋ.

¹⁹ Vi naw də mahenziŋ nəmtə sən mahenziŋ, vi nəsawgən madaraw sən Maŋgəlva. Məkkpa'u nan də Kristu aka məzliwrihe,

²⁰ Madaraw nani ya intə əmpa ɓa, Kristuwi madaran addəvwa, vi əssa naw madaraw kakaŋkəŋka, in tat əsaw madaraw addəv ətaf Wətən Maŋgəlva məs dəŋgluwa gəm məs dəppan ki zən dəvan viwa.

²¹ Nəzan na mbəlembəle na Maŋgəlva ɓa, vi an ərah təstəs tay də mahenziŋ na, asna əmta na Kristu ɗari.