Daniyel 2 - Bible en Guidar

Əssine maddaabəŋ na Nabukodonozor

¹ Addəv əzva masula'ən na Nabukodonozor aka əzəm məlyã, Nabukodonozor assinik əssine mbərayən. Makran azlahka yas dəɓap əleŋ ɓa.

² Məlĩ aɗiyək wən nan kakkelet məskaŋ heligi, məɗɗaŋ tetele, məɗɗaŋ sekene gəm məkosonən wən net ŋgərzleɗi, ka dəboton sənəngən əssine nani. Azzoŋko yas aziwəŋ aba məlyã.

³ Məlĩ anah sitik na, nəssinke, ya əssine van atapawka, maw aka əsən an aŋgəl kawnahã.

⁴ Mə Kaldiyeɗ azlan sənənək məlĩ də ma Aram na: Məlyã, ənziya nok dəsan zek ka faɗə! Anah əssine nok səm mənam məɗɗaŋ wəza noko, waməboton suk va aŋgəl kawnahã.

⁵ Məlĩ azlan anah sit mə Kaldiyeɗ na: «Aŋki məs nəziwgən a makrawa: an kərban suwən əssine naw də əboton su məs aŋgəl kawnah ɓa na, kawbəlokumi, gəleɗe nokum wakkpaŋgaŋ va dagərgiya.

⁶ Ya, an kərbansuwənək əssine də əboton va aŋgəl kawnah na, wakərahan zəga na vokum səvawa, zəgeɗ na mekeleŋ gəm gagdak diyɗa. Məboton su kan va əssine van aŋgəl kawnahã.»

⁷ Azlanənək masula'əŋ əmpa, aɓɗaŋ na: «Məlĩ dənah əssine nan sit məɗɗaŋ wəza nani, waməboton suk va aŋgəl kawnahã.»

⁸ Məlĩ amsakək əpele, amna: Nəsənək gegesiŋ na, mokum aka əzan paya, vi kulanənək na nəziwginik wən nan a makrawa.

⁹ An kənah suwən wəssine van ɓa, wən taka dədawgukum; ya yaŋ kədawtuvuron wən vi kawa tepelke abaw də wərka wən ɗarə, də wəɗɗum abe na wən nan waddəɗə. Vini kan na, mənah su əssine vani, naw wanəsən na wakəɓap əboton suwən gabbani.

¹⁰ Mə Kaldiyeɗ azlan sənənək məlyã, aɓɗaŋ na: «Ɗəf tay təttaka aka dələv nawɓap əɗɗa an məlĩ assohuŋ ɓa! Vi məlĩ tay təttaka, də asan daya gəm də gagdak na, dəttok ɗah zev wən vas a met məskan heligi, məɗɗaŋ tetele awaniɓa a met mə Kaldiyeɗ ɓa ɓa.

¹¹ Zəga an məlĩ attokəŋ tuwãhĩ, ɗəf tay maɓɓan nawɓap əɗɗan ɓa, an meŋgilveɗiŋ ɓa ɓa, vi net tahəŋ də gəla aret ɗiy ɓa.»

¹² Də əprəm əpelis na, gədəv məlĩ adək sawɓa, Yas aɗi wən nan ka kawzet məsmaɗɗulet na Babilon pakə.

¹³ Mətəli ma aka wən nan na kawbeyti məsmaɗɗuleti, yas akayanən Daniyel dit beyneŋgiɗin vi kawbeyti'e.

Maŋgəlva tay ərban əssine na məlĩ sən Daniyel

¹⁴ Ndəni Daniyel apel də keket sən Ariyok daya net məzəlpaŋ na məlĩ məs dəgil vi kawbey məsmaɗɗulet na Babilon naka.

¹⁵ Attokonək Ariyok daya net məzəlpaŋ na məlĩ də wənah na: «Vimi məlĩ atawwən nan ɓəl vas di?» Ariyok arban wən van sən Daniyel.

¹⁶ Daniyel ləŋ mbat aza məlyã, akkaman ka dəpsəngən pay siɗikke; vi dəbotonsəngən va əssine nani.

¹⁷ Daniyel ambatək eŋgil ananda, aboton wən nan sit may Hananiya, Mikayel gəm Azariya beyneŋgiɗin,

¹⁸ anah sitik ka dəŋglaŋgən mbəlembəle aba Maŋgəlva na disiŋ aka wən məɗamnəŋka, vi adawbeynin may Daniyel dit beyneŋgiɗin sap dit məsmaɗɗulet na Babilon ɓa.

¹⁹ Yaŋ də dəfəɗ na, wən məɗamən nak arbək ama hara Daniyel addəv ula. Yaŋ Daniyel agagdakan Maŋgəlva na disiŋ.

²⁰ Daniyel agəmək əpele yas anah na: «Gagdak dəsan aza Maŋgəlva, təŋ kakaŋka hã faɗə! Vi maɗɗula də gbogboŋ pak avani yi.

²¹ Ndəni dədaddəɗet əzvaɗe də paya; ndən dədaggbuk milyeŋge, ndən dədawɗiti; ndən dədapsit maɗɗula sit məsmaɗɗuleti, wəsən sit məs əsən aketi.

²² Ndən məzərbet zəgeɗ kpukpumɗe dit en məɗemti; asənək an dəsan ara guzliyo, vi əkeɗeɗe tay dəndəni.

²³ Nəgəɗ sukuk soko, nəgagdokokko Maŋgəlva net efiŋgiɗwa, vi kəvayək maɗɗula də gbogboŋgo! Kakaŋ na kərban suwək an məkkomok akani; adan kərban səmək an dəfãyan məlyã.»

²⁴ Yas Daniyel ambat aza Ariyok, ɗəf məs məlĩ appan wən nawbey məsmaɗɗulet na Babilon a van naka; səza agapə, anah sənək vaŋka: «Kəbey məsmaɗɗulet na Babilon ɓa! Aku aba məlyã, ka nəboton səngən məlĩ va əssine nan aŋgəl kawnahã.»

²⁵ Ndəni Ariyok aka Daniyel də kakara aba məlyã, yas anah sən na: «Nərahək ɗəf sə weleŋgit belemɗe məs mərmet sə Yuda, məs nawboton sən məlĩ va əssine nan aŋgəl kawnahã.»

Zəgakamaŋgəlva, məs tələn amban məddakəni

²⁶ Məlĩ agəmək əpele yas anah sən Daniyel məs adawyaŋ Beltasar na: Wakəɓap wərban su əssine naw də əboton su va aŋgəl kawnah sa?

²⁷ Daniyel azlansənək məlyã, amna: Wən məɗamən kəttokəŋ na məlyã, məskaŋ heligi, məɗɗaŋ tetele, məɗɗaŋ sekene gəm mə Kaldiyeɗ aɓapən na kawboton suk ɓa məlyã.

²⁸ Də as pak na Maŋgəlva na disiŋ tay, ndən dədarban an dəsan məɗamən, ya arban sənək məlĩ Nabukodonozor an nazzan abe. Wəssine də ula nok yeŋki.

²⁹ Gala pay kəsok ɗuffo aka zəga nafna nok na, kəɗɗumuk aka an dədazzan abe, vini məzərban an dəsan məɗamən arban suk an dədaɗɗa abe vani.

³⁰ Naw na, vi nəsaw də wəsən daykiyit ɗiy membirtiyə nəsən wən məɗama van ɓa; vi ɗəf dəɓapgən wəboton sən məlĩ va əssine nan aŋgəl kawnahĩ yi ka dəsəngən əɗɗum na makrani.

³¹ Məlyã addəv əssine nok na, kulak zəgakamaŋgəlva məɓayni. Metiŋgin sawɓa, tay əwiɗ sawɓa, tay ziwwe aboko, aza ulan na, awgeslnegən ɗəfa.

³² Ki zəgakamaŋgəlva məzaɓən vani, na meleŋge saksaki yi, makran gəm van na təbəz babara, gədəvən də metetileni na təbəz pepreŋge;

³³ Seserən na təbza, tələn nawɗi afuŋ sulegiti, pəɗak net na təbza, pəɗak net mbərni na membezleŋgi.

³⁴ Aka kədawlan gərəm ade əbəta akan sə disiŋ məza va ɗəf dərəŋgən ɓa; argak zəgakamaŋgəlva məzaɓən nak aka tələn na təbəz gəm na membezleŋ naka, yas atakaɗa.

³⁵ Aka ma taka, təbza, membezleŋ, təbəz pepreŋge, təbəz babara gəm meleŋge aŋzlaŋ pakə; akkpaŋgaŋgək va eslesle məzəzzoŋ sə kelleɗe də mawala məs səmyã adawka məza batamən əsən ɓa. Gərəm məs dəbət aka zəgakamaŋgəlva məzaɓən van tamə, nan akkpaŋgək mossorgo metiŋgini ya aknahək dəlvafuŋ pakə.

³⁶ Aski əssine vani, aməboton sən məlyã.

³⁷ Məlyã istə məlĩ net milyeŋge; anoki Maŋgəlva na disiŋ apsuk əzəm məlyã, əɓapa, gbogboŋgo gəm gagdaka;

³⁸ Avoki appet ɗiyi, zəgeɗ memeyẽɗ nawra gəm biŋgeɗ na disiŋ, istə məlĩ aka təki assoŋ pakə: kiya na meleŋgeŋka, istə.

³⁹ Sədəbər kiyuk na, məlĩ maɓɓan məza tay də gagdak va nok ɓa wasani; sədabər kiyən tamə məlĩ maɓɓan mohoko'ən wasani, nan na təbəz pepreŋgi, wasan məlĩ aka dəlvafuŋ pakə.

⁴⁰ Sədərɓegeti, məlĩ mapoɗo'it wade, nan wasan ɓəɓəl va təbəza: va təbəz adawtakaɗ gəm əkrap zəga pakə, va təbəz adawsər zəga pak vaski məlĩ van adawtekeɗit gəm adawsirti.

⁴¹ Tələn dit pirŋgiɗ tələn kuwəl pəɗak na dələv gəm na təbzəŋka: tay wərban na məlĩ van wawɗakə ya zloŋgotən mbərəŋ wasan ɓəl va təbza, va kula təbəz məslahəŋ də membezleŋ əŋka.

⁴² Ya kirtin tələn pəɗak na təbza gəm pəɗak na membezleŋ əŋka: zloŋgot taka na, məlĩ van wasan də gbogboŋgo, zloŋgot mbərən tamə, wasan məddakəni.

⁴³ Kulak təbəz məslahəŋ də membezleŋ: Vi milyeŋges wakayaŋ gil aza ziti, ya aslereŋ na awalaŋ zit ɓa, va təbəz awsler də membezleŋ ɓaŋka.

⁴⁴ Aka pay net milyeŋgeska, Maŋgəlva na disiŋ waɗi məlĩ mbərən məs azbərna ɓa, ɗiy mbirit agəmən na məlĩ sə van ɓa. Nani watekeɗ gəm wazet milyeŋges pakə, nan wasan faɗə,

⁴⁵ va kula gərəm dəkõh səka mossorgo metiŋgin məza va ɗəf ɓa, atekeɗ may təbza, təbəz pepreŋge, membezleŋ, təbəz babara gəm meleŋgeŋka. Maŋgəlva metiŋgin arban sənək an dədazzan abe sən məlyã. Va kəssiniska vaski, an aŋgəl kawnah nawtafiyə.

⁴⁶ Ndəni məlĩ Nabukodonozor appu' aba Daniyel. Yaŋ aɗi wən nan ka kawki sən əvəl gəm tursan.

⁴⁷ Məlĩ azlan sən Daniyel də wənah na: «Gesiŋ, Maŋgəlva nokumi Maŋgəlva net meŋgilveɗi, daya aket milyeŋge gəm məzərban an dəsan məɗamən adan kəɓap əboton su wən məɗamnəŋka.»

⁴⁸ Ndəni məlĩ aɗi ki Daniyel, apsənək zəgeɗ na sləma diyɗa, aɗiyək daya aka kivadələv na Babilon pakə, gəm aɗiyək daya aket deyeɗe na bərzləŋna-kivadələv aket məsmaɗɗulet na Babilon pakə.

⁴⁹ Daniyel attokonək məlyã, ka dəɗigin may Sadrak, Mesak gəm Abed-Nego dəssoŋgən məzədawgənən an dəsan aka va na Babilon. Daniyel tamə asanək a meŋgle ana məlĩ da.