Amos 1 - Bible en Guidar

Ətawwən aket meggegiɗit məs Israyelɗe ( 1:1—2:5 )

¹ Əpel na Amos, taka naret məzuteɗeŋɗe na Tekowa. An məs awəl aka wən na Israyel aka pay na Oziyas məlĩ na Yuda gəm aka pay na Yerobo'am wətən Yo'as məlĩ na Israyel əzva sula tak əɓla na dəlva.

² Amna: «Yawe ahãyək sə Siyon va ɓoolu, sə Yerusalem wəlan adaprəma. Səɓɓan na, əzəmsahãyi kan, a təki nawtaɗ net məzuteɗeŋge, ki gərəm na Karmel waŋkələ.»

An Yawe adawzelen sən Israyel gəm meggeŋgiɗni Aket mə Siriɗe

³ An Yawe apel yaŋka: «Aka əɓoŋ an ɗiy na Damas aɓoŋgoŋ ɗayɗayəŋ na, nəppan na wən an nəziwgin ɓa, vi andepetinik ɗiy na Galad də təbəz nawziyan təkiya

⁴ Wanəslən offo aka gəla na Hazayel, offo van wazla gəla na məlĩ Ben-Hadad.

⁵ Wanəŋzliw təbzeŋge nawkəɗəsl maddamba na Damas, wanəzan ɗəf dəsan də gəla a Bike'at-Awen, ana məzəm məlĩ a Bet-Eden. Ɗiy na Aram na, kawketi aka balam a Kir,» Yawe anahə.

Sit mə Filistiɗe

⁶ An Yawe apel yaŋka: «Aka əɓoŋ an ɗiy na Gaza aɓoŋgoŋ təl hoku gəm aka əɓoŋ poɗo, nəppan na wən an nəziwgin ɓa, vi asimgitinik ɗiy diyɗa appet sitin Edom.

⁷ Wanəslən offo aka zlava na Gaza; dəzlegin gəleɗe nawzəm məlĩ nani.

⁸ Wanəkkẽh ɗiy sə Asdod də məs dərma zleŋge na məlĩ na Askelon. Waməskoɓ dit ɗiy na Ekron. Madambirgit mə Filistiɗe wamtaŋgə,» Yawe Maŋgəlva anahə.

Sit mə Fenisiɗe

⁹ An Yawe apel yaŋka: «Aka əɓoŋ an ɗiy na Tir aɓoŋgoŋ təl hoku gəm aka əɓoŋ poɗo, nəppan na wən an nəziwgin ɓa, vi asimgitinik ɗiy diyɗa appet sitin Edom. Dəɗɗumoŋ aka wənmiyna na məlma ɓa.

¹⁰ Wanəslən offo aka zlava na Tir; dəzlegin gəleɗe nawzəm məlĩ nani.»

Sit mə Edomɗe

¹¹ An Yawe apel yaŋka: «Aka əɓoŋ an ɗiy na Edom aɓoŋgoŋ təl hoku gəm aka əɓoŋ poɗo, nəppan na wən an nəziwgin ɓa, vi arɓahanək məlmən də masalam appanək ulasahã nani arbanək ədagədəv nan məza agrak ɓa. Asanək dit herɗe nan məza meŋge ɓa.

¹² Wanəslən offo a Teman; dəzlegin gəleɗe nawzəm məlĩ na Bosra.»

Sit mə Ammonɗe

¹³ An Yawe apel yaŋka: «Aka əɓoŋ an ɗiy na Ammon aɓoŋgoŋ təl hoku gəm aka əɓoŋ poɗo, nəppan na wən an nəziwgin ɓa, vi abekinik gil na Galad də daway vi kazlzleten dələv neti.

¹⁴ Wanəsɗa offo sən zlava na Rabba; dəzlegin gəleɗe nawzəm məlĩ nani, addəv vaŋvəl nawgay pay nalpa, addəv buwən də səmyã pay na barkataŋ.

¹⁵ Kawsimgəni məlĩ net a guwa, ndən sap dit ɗiy naban pakə,» Yawe anahə.