2Samiyel 16 - Bible en GuidarDavit də Siba 1 Davit atoŋguk ki dadwar ki mossorgo siɗikke, Siba, gawla na Mefiboset ade ələmsəni. Akiyək korɗe miynet mezeŋgeɗ aket sula dit peŋɗe səkat sula aketi, gatoɗe na megezlembirke məkleket səkatə, sukoyo mənəhən səkat gəm kwenekwene na mbazla taka. 2 Məlĩ aɓsən Siba na: «Məŋgə eŋkiŋ di?» Siba amna: «Korɗeŋgə, ɗiy nana məlĩ da dəpeŋgeŋgin aketi, peŋɗe də sokoyo mənəhənəŋ tamə, məzəlpaŋ dəzimningəni, mbazla tamə, nawsa sən iya na ədaw a kapta-muyã.» 3 Məlĩ amna: «Ya ngay wətən daya nok di?» Siba aɓsən məlĩ na: «Asanək a Yerusalem, vi amna: Kakaŋ mə Israyelɗe wamndan suwən məlĩ na duwa.» 4 Məlĩ aɓsən Siba na: «Zəgeɗ na Mefiboset pak nipsukuke.» Siba amna: «In tat uppu'o, kəta nərah ki nenek ama horoko daya naw Məlyã.» Simey aranək Davit 5 Yaŋ məlĩ Davit agap hã a Bahurim, ɗəf agilik sədak səddəv məlma na Sawlu, iya nan na Simey, wətən Gera. Ndən vit də wəra. 6 Ndən əskan Davit gəm gewleɗ na məlĩ Davit van dit gərmeŋge də ɗiy pak gəm məzəlpaŋ gamberet nan assoŋ dahãdahã zlaŋgə. 7 Yaŋ an Simey adawnəh dəre': «Agili, agili, məbay gəbaya, zəga ɗəɗarə! 8 Yawe amndegetik mbel net ɗiy na Sawlu pak akok məs kəzəm məlĩ a gəlanəŋka. Yawe apsənək məlĩ sən Absalom wətuko. Is yakəŋ ərbet wili, vi məbaygəbay kənani!» 9 Abisay wətət Seruya, aɓsən məlĩ na: «Vimi kəra məmtənəŋ adawran daya naw məlĩ di? Kamə nəmbat ərsla kiyən ɗa.» 10 Məlĩ amna: «Miy nokum də in mənokum kirtət Seruya di? An tay əraw na, kuzuŋ Yawe dənah sən na aran Daviti. Ya naway nawnəh kan na, vimi kəɗɗa vas di di? 11 Davit anah sən Abisay dit gewleɗ nan pak na: Wətu dəgil səddəvu dərəngə, tay əkayan zeŋgilew nawbaywa, kəggətaŋ aka mə Benyaminəŋ ɓa. Məppan də maɗɗulan dərawa! Kuzuŋ Yawe dənah sən soko. 12 Kuzuŋ Yawe wawla ərba wil nawa, asna Yawe wakkpaŋgan su moggon a gəla wəra nan dəpaŋkənka.» 13 Davit dit ɗiy nan tive net kawə, Simey tay əmbat dəba gərma, nan tay əzban ərani gəm əsket gərmeŋge kəla maŋgavani, tay əndol burɗuku. 14 Məlĩ dit ɗiy nan pak agapaŋgək ama Yurden məyet haɓlahaɓlakə, assoŋ əffet adaka. Husay tay əmbat aza Absalom 15 Absalom dit zel na Israyel pak azzoŋ a Yerusalem; Ahitofel tay dəndəni. 16 Husay mə Arki, bayna Davit pay aza Absalom: «Husay aɓsən Absalom na: Azəm krim məlyã! Azəm krim məlyã!» 17 Absalom aɓsən Husay na: «Aski moggon nok aza baynok kan sa? Vimi kəzban baynok ɓa di?» 18 Husay anah sən Absalom na: «Owwo! Vi ɗəf an Yawe dit ɗiyəŋki gəm an mə Israyelɗe pak aweleŋgi, nan nani, dəndəni nədawsawa. 19 Masulan na, nawa nədawgəɗ sən wəza an sən wətəni ɓa di? Va nəgəɗ wəza aba afuko vaski nədaɗɗa wəza aboko.» Absalom dit gil na Davit 20 Absalom aɓsən Ahitofel na: «Məzək meŋ aka walaŋ zukum aka an mədaɗɗa.» 21 Ahitofel aɓsən Absalom na: «Dok azet gəreŋgiɗ afuk apəl nawga gəleŋki. Vasna, ɗiy na Israyel pak waprəmən na, kərayək ama hara afuko, məzəzbokun wampanən təlti.» 22 Yaŋ məher gizlirke sən Absalom aka təgbalka, Absalom nak tek azet gəreŋgiɗ afən nek karet ɗiy na Israyel pakə. 23 Əpel Ahitofel apsit pay nanəs pak tay də gagdak va əpel na Maŋgəlva. Vaski əpel na Ahitofel adawsan aza Davit gəm aza Absalom pakə. |
All right reserved
Bible Society of Cameroon