2Milyeŋge 18 - Bible en Guidar

Dələv na məlĩ na Yuda ( 18:1—25:30 ) Səza Hizkiya gap aza Yosiya 18:1—21:26 Hizkiya, məlĩ na Yuda

¹ Aka wəzva mohokon na Hose'a wətən Ela aka məlĩ na Israyel, Hizkiya wətən Akaz məlĩ na Yuda, akkpaŋ məlyã.

² Agəm məlĩ na, tay də wəzva kaklaw sula kiyən sle'i, azəmək məlĩ wəzva kaklaw sula kiyən vaytak a Yerusalem. Iya nat man na, Abi wətən Zakarya.

³ Agəɗək zəga təstəs a mahara Yawe, va na Davit afən agəɗ pakə.

⁴ Ndən dəzet gəleɗe-nettuyeŋge, dəkrep serekɗe, aɓzlu Astera, aŋzlan dohõ na təbəz pepreŋ məs Moyis agəɗ lahəŋ naka, vi hã gap payəska mə Israyelɗe tahəŋ əzlaŋ sənən tursan: iyanən na Nehustan.

⁵ Hizkiya aɗiyək makran aka Yawe Maŋgəlva na Israyel. Məlĩ tay sə weleŋgit milyeŋge na Yuda pak en daabəŋ kiyən dit en dərɓagan va ndən ɓa.

⁶ Asanək də Yawe, dəmzla səmmban ɓa. Armek wəsəɓɗe en Yawe aɗi wən nan sən Moyis.

⁷ Yawe tay dəndən təki al pakə; An adaɗɗa pak tay ədaw ammbani. Aɓoŋguk aka məlĩ na Asiri, dəgəɗ sən wəza ɓa.

⁸ Arbə sitik mə Filistiɗe hã gap a Gaza, met meŋge nan təŋ səzet gəleɗe na ɓeɓele hã dit walaŋgəleɗe na korgu.

Əfɗahan va məmõh Samari

⁹ Aka wəzva mapoɗon na Hizkiya aka məlyã, ndəni mabuhulon na Hose'a wətən Ela məlĩ na Israyel, Salmanasar məlĩ na Asiri adek asərŋgəsl Samari.

¹⁰ Amõhunək addəv əzva hoku, vasna aka əzva ma sləre'ən na Hizkiya aka məlyã, na Hose'a məlĩ na Israyel tam əzva ma vaytakani yi məmõh Samari.

¹¹ Məlĩ na Asiri akek ɗiy na Israyel na gagay a Asiri, azi a Hala gəm aka Habor məlpa metiŋ na Gozan, gəm a walaŋgəleɗe gugriɗ na Mediya.

¹² Vi dəprəmnən ma Yawe Maŋgəlva net ɓa, aggaraŋgək ki wənmiyna nani: an Moyis gawla na Yawe aɗi wən nan pak dəprəmnən ɓa, dəɗɗaŋ wəza dəndən ɓa.

Saŋkerib azəmək kiyva məlĩ na Yuda

¹³ Aka wəzva makəlaw kiyən poɗo na Hizkiya aka məlyã, Senakerib məlĩ na Asiri, ade aket walaŋgəleɗe na Yuda mərka kiyit pak amohẽ.

¹⁴ Hizkiya məlĩ na Yuda slən aza məlĩ na Asiri a Lakis, dawnəh na: «Nəraygənəka. Kəde wəgay də in ɓa; an kədawɗi su pak wanəslani.» Məlĩ na Asiri aɗi an nawfaɗgən Hizkiya, təbəz babar kilo gabal vaytak, meleŋge kilo səkat vaytakə.

¹⁵ Hizkiya apsinik təbəz babar naddəv Gəla na Yawe də an na təki nawzaɓ neŋgil ana məlĩ da pakə.

¹⁶ Pay nan das na, Hizkiya ahõkuk meleŋge naket maddambeɗe na Gəla na Yawe, də an naka kiyit maddambeɗe en məs Hizkiya məlĩ na Yuda akkəɗ sit meleŋge; epsin məlĩ na Asiri.

Əpel nabbah na dibirgidik na Saŋkerib

¹⁷ Sə Lakis, məlĩ na Asiri aslən daya net məzəlpaŋgə, daya na dibirgidik də daya net məpsənən zəga nawsa aza məlĩ Hizkiya dit məzəlpaŋ diyɗa a Yerusalem. Apeŋgeŋ azzoŋ a Yerusalem. Apeŋgeŋ agapaŋ a mahara gəla, yaŋ aziweŋ ama tive na maha net iŋkile na disiŋ, aka tive nawmbat a guli na mənɗer gabaga.

¹⁸ Ndəɗaŋ dah iya məlyã. Eliyakim, wətən Hilkiya daya naddəv gəla na məlyã, Sebna, məzuvere gəm Yo'a wətən Asaf daya naba məlyã, agilyoŋ azeti.

¹⁹ Daya net məzəlpaŋ aɓsit na: Kamə məka əpel na məlĩ metiŋgiŋ, məlĩ na Asiri sən Hizkiya, mənah sən na: «Mi məs kəɗi əɗɗum nok akan di?

²⁰ Nəmna, əpel na ma ɗəf na əsəɓi gəm apsa gbogboŋ addəv əgaya. Kakaŋ na aka naway kəɗi əɗɗum nok kəɓoŋgən akawəŋ di?

²¹ Yaŋ kəɗiyək əɗɗum nok aka eflere məŋzləwən, ana Eziptə. Ɗəf dədappan zən akan na, wampa, watilik vani. Vaski Farawən məlĩ na Eziptə asan sit ɗiy en dəɗiynən əɗɗum net akan pakə.

²² An kənahaŋ suwənək na: Aka Yawe, Maŋgəlva nam məɗi əɗɗum namə, namna ndəni məs Hizkiya akrap gəleɗe-nettuyeŋge nan gəm matuyaɗe nan gəm anah sit ɗiy na Yuda də na Yerusalem na: Aba gəla matuyaŋ kaka' kədappu'oŋgu ɓa sa?

²³ Ya kakaŋ na arəm makra də daya nok məlĩ na Asiri kana, wanəpsuk pilseŋge gabal sula, an wakəɓap ərah ɗiy nawpeŋ aketi!

²⁴ Ya mbambar kədawɓap əgəm gabba taka naret deyeɗe nalpa, ya kəta dəsan məddakən nammbet deyeɗe nalpa na daya naw dayday zlaŋ di? Yas kəɗi əɗɗum nok aka Eziptə vi kawrah mawteɗ net pilseŋge gəm mepeŋgeŋ pilseŋge?

²⁵ Ya as lah na, Məza Yawe dənah su ɓa nəpeŋ wəlpa də təkiyəŋ gəm kawzan sa? Yawe zək nan dənah su na, dok aka dələv vani, azani!»

²⁶ Eliyakim wətən Hilkiya, Sebna gəm Yo'a anahaŋ sən daya net məzəlpaŋ na məlĩ nak na: «Kamə apel sit gewleɗ nok də ma Aram, vi maprəmən. Kədawpel səm də ma Yuda ɓa, ɗiy naka zlavaŋ waprəmnəni.»

²⁷ Daya net məzəlpaŋ na məlĩ nak azlan sit na: «Aza daya nok gəm azoki daya naw aslənu əpel wənəŋ sa? Awəl sitik ɗiy dəssoŋ aka zlavaŋka'e, namna net van wazəmən pilwiti, wasenin kine neti, məstaka va nokum ɓa sa?»

²⁸ Ndəni daya net məpsən əsa sən məlĩ asil aŋgəsl vaŋvəl dayadaya də ma Yuda, yaŋ apeli, amna: «Məprəm əpel na Məlĩ metiŋ, məlĩ na Asiri!

²⁹ An məlĩ anah yaŋka: Hizkiya ambəɗokum ɓa, vi aɓap na wəkõhgukum səvaw ɓa!

³⁰ Hizkiya adaɗɗa ka kəɗiyəngən əɗɗum nokum aka Yawe dawnah sukum na: Yawe əkõh adawkõhgəmə, appan na walaŋgəla-metiŋgin ammba va məlĩ na Asiri ɓa ɓa!

³¹ Kədaprəmən Hizkiya ɓa, an məlĩ na Asiri anah yaŋka məsler də iyna: məppan kiykum suwa asna ɗəf pak wazəm megezlembirke gəm sokoyo nani, wasə iŋkile na vov nani,

³² də wəga əzza naw əndukum kawkukum aka dələv maɓɓan va zev nokumu, dələv na haykəmari dadabya gəm na mbazla na meketepe, dələv na zəga nawzəma gəm na megezlembirke, dələv net heremeɗ na mẽlẽ gəm na amama, vasna wakəssoŋ madorokum kəmtaŋ na ɓa. Kəprəmən ma Hizkiya ɓa, vi dərwa adawmbəɗokum dawnəh na: “Yawe wakõhgəmə”!

³³ Meŋgilveɗ naket dəlveŋge, tay an dəɓap əkõhgən dələv nan səva məlĩ na Asiri ɗah sa?

³⁴ Ŋgahəŋ meŋgilveɗ na Hamat dit en na Arpat di? Ŋgahəŋ meŋgilveɗ na Sefarwayim, na Hena dit en na Iva di? Akõhgənənək Samari səvaw sa?

³⁵ Naway səmmbet meŋgilveɗis pakə, məs dəkõhgən dələv nan səmmba vaw ka Yawe dəkõhgənəgən Yerusalem səmmba vawəŋ di?»

³⁶ Ɗiy pak assoŋguk ɓataɓata'ə; dəpeleŋ sənən əpel təttaka dayday ɓa, vi məlĩ Ezekiya aɗiyək wən nan na: «Kədawzlanaŋ sənən ɓa!»

³⁷ Ndəni Eliyakim wət Hilkiya daya naka gəla na məlyã, Sebna məzuvere gəm Yo'a wətən Asaf məzərma an məverin pak azzoŋ aza Hizkiya lukutɗe net məŋgereti karban na addəv tatwãhəŋ, anah sənən əpel na daya net məzəlpaŋ na məlĩ naka.