2Korintus 4 - Bible en Guidar

Əzaɓ na əmpəs addivit mesteɓeɗ na dəlva

¹ Sən aski, adan də ulasahã nan mərah wəzaska, makram amtə na ɓa.

² Məmpetik zəgeɗ naɗɗa mahaɗamma narba wili. Mawdaw addəv vurum mãy əkkpaŋgan əpel na Maŋgəlva ɓa. Ya də gegesiŋ məs dədarba mədazga' sit ɗiy pak aba Maŋgəlva.

³ Ya an Alabara Nenek mədarbanəŋ kiyən asərətəka, asərətək viyit en məzuzaŋgə,

⁴ viyit en məs tahəŋ də ətaf ɓa, məs maŋgəlva negge atip maɗɗuleti, awlanən alabara nenek na gagdak Kristu dəsan Maŋgəlva səɗek əwiɗ ɓa.

⁵ Wən na gəɓa zəm mədarba abbər wən na Yesu Kristu, Daya ɓa, nam mənamtə məɗɗaŋ wəza nokum vi Yesu.

⁶ Maŋgəlva məs dənah na: Əkeɗeɗe wawiɗ ara guzliyo, ndəni dəwiɗ a makramə. Vi kawiɗgən əsən na gagdak na Maŋgəlva aka məɗahara Yesu Kristu.

⁷ Ya mənam tat də əzaɓ na sləmas addivit mesteɓeɗ na dəlva, vi əɓap mətiŋgəs dəsangən səza Maŋgəlva, məza səzam ɓa.

⁸ Məsərni mam va nawsərən pakə, də as zlaŋ məzə ɓa. Məsukuk mamə, ya məsam məza ərəh tive nawgilye ɓa ɓa.

⁹ Mərɓahami, ya mərufmi ɓa, məzlbəmi ya məzami ɓa.

¹⁰ Pay pak mənam tat də əmta na Yesu addəv gəɓa zəmə, vi zeŋgile Yesu dərbəgən addəv gəɓa zəm təmə.

¹¹ Vi mənam madaram məppami ama əmta pay pak vi wən na Yesu, vi zeŋgile Yesu dərbəgən addəv gəɓa zəm məs namta.

¹² Vasna: Əmta tay əɗɗa wəza addəvmə, zeŋgile tam əɗɗa wəza addəvkum.

¹³ Adan əɗɗum nam takay nawtafa, va məverin na: Nətafa ndəni nəpeli, nam pak mətafəka vini mədawpele.

¹⁴ Məsənək na məs dəsilgən Daya Yesu səka əmta wasilgəmə'e də Yesu, waziwgəm də munokum pak azani.

¹⁵ Vi zəgeɗis pak vikuməŋ ka mbəlembəle dəɓaygəni, dənzlərgənəgən əɗɗa soko net ɗiy diyɗa sən gagdak na Maŋgəlva.

Əssa də ətafa

¹⁶ Vini, makram amtə na ɓa. Ya an gəɓa zəm an nakəlappaka tay əza zlaŋ, gəɓa zəm an nakəleŋgil tay əndəf pay pakə.

¹⁷ Vi əzəm nam kakaŋkəŋ kafkafi aza teɓelteɓel na gagdak an faɗ məs adawzaɓan səmə.

¹⁸ Məɗi na kiyəm aka zəga an nawla dule abbər aka zəga an məs awla ɓa ɓa. Vi zəga məs nawla, asan na faɗ ɓa, ya zəga məs awla ɓa, nan tay faɗə.