2Korintus 12 - Bible en Guidar

Ula gəm hənhən məpsən Pol

¹ Aslək nəkaɓgən sa? Gesiŋ tay an adawtər ɓa. Ya wanəmndaw aka ula temtem gəm hənhən na Daya.

² Nəsənək ɗəf maɓɓan addəv Kristu. Agəɗək əzva kəlaw kiyən poɗo kakaŋka, məslani a disiŋ hã addəv disiŋ mahoko'ən. Addəv gəɓa zən sa? Nəsən ɓa. Addəv gəɓa zəni ɓa sa? Nəsən ɓa. Maŋgəlva dəsəna.

³ Nəsənək ɗəfəs, addəv gəɓa zən sa, addəv gəɓa zəni ɓa sa? Nəsən ɓa. Maŋgəlva dəsəna.

⁴ Məslani a təɗa, aprəmək əpel məs kawɓapi əpelin ɓa, məs məpsəni tive sən ɗəf əha' man əpelən ɓa.

⁵ Anəkaɓ vi ɗəf nani, ya nəkaɓ na vi zək naw an aka əddak nawi ɓa ɓa.

⁶ Vi an nəŋgələk əkaɓ na, wanəsaw dərwa ɓa, Vi gegesiŋ nədawpele. Ya in tat ətak zuwa, vi ɗəf maɓɓan adaɗɗum su dayki an adawla azaw ɓa awaniɓa dayki an adaprəm sə maw ɓa.

⁷ Sekeneɗ vet naggət aketi sawɓa, vini, ka nədawkaɓ ɓa na, məndirɗi wəlaŋga addəv gəɓa zuwa, maslən na Satan, vi dəvərugən a tapaslaywa, vi nədawkaɓ ɓa.

⁸ Təl hoku nəkkaman Daya aka wənəs ka dəkdəh səzawa.

⁹ Yaŋ azlan su na: Mbəlembəle naw mək suki, vi əɓap naw addəv əddak adaknaha. Də ənnek kan nədawkaɓ vi əddak nawa vi əɓap na Kristu dəsangən akawa.

¹⁰ Vini, nədannek də əddak temtemi, də əra, də vavyakə, də əsərma temtemi gəm əzəmsahã temtem vi wən na Kristu. Vi pay məs nəsaw məddakwa, daski nədawsaw də əɓapa.

Geslne məs Pol adattəman aka wən net ɗiy na Korintus

¹¹ Nəkkpaŋgək dərwa, kəɗɗaŋ suwənək vavyakə. Vi mənokumtə nawpel akawa, vi, də zəga tay nəgap ɓa zlaŋ na, nəsaw ɗəf nadərɓe azet maslənɗe nokum gugriɗes ɓa.

¹² Wəzeɗe narban na maslən nanəŋ arbaŋgək a walaŋkum də əɓəs naw gərakə, nəgəɗək zəgeɗ narba naggət aketi, gagdakɗe'e gəm sekeneɗi.

¹³ Mi kərahaŋ gəs səza an net məzutafaŋ meɓɓet, abbər naw na, naw nəppətkum ɓay di? Məvvuyon su mbərayən vanəska.

¹⁴ Təl mahokon yaŋ nəsla zu naddaw anokumda kakara. Ya kappətkumi ɓa, vi zəga nədaŋgla səvokum ɓa, anokum zək nokumi. Gesiŋ, kirniŋ nawzaɓ zəga ammbet migilit ɓa, migiltiŋ nawzaɓ zəga ammbet kirni.

¹⁵ Azaw na, də ənneki nədawzan zəga naw pakə, wanəzan kiyu dayday vi zeŋgilokum. Wakəgəsgənən əŋgluwu vi nəŋglukum day sa?

¹⁶ Ya kəta! In vatə, nəsaw gədak akokum ɓa, nəsawək məmbəɗ ɗəfa, nərmukumək də kuketi!

¹⁷ Də taka nammbet ɗiy en nəslən anokumda, nərah əndəreh səmmbokum sa?

¹⁸ Nəppak təlu aza Titus dəlgən anokumda, nəslən məlməm dəndəni; Titus andərehik dəmmbokum sa? Də əɗɗum taka mədaw ɓa sa? Tive takayi ɓa sa?

¹⁹ Kuzuŋ munokum tat əɗɗum far na, kiyəm mədawpəl abokum soko. Aba Maŋgəlva, addəv Kristu mədawpele, zəgeɗis pak milmiŋgiɗu na makrawa, vi kawɓaygukumi.

²⁰ Vi geslne tay əduwa, adaɗɗa əgap naw anokumda na, nərəhkum va nəŋgəl ɓa, nokum tamə, kərəhwən va kəŋglaŋ ɓa ɓa. Adaɗɗa na: Əgaya, kotoroku, ədagədəva, əlpa, əpel mbərayən, tepelke, əgagdakan zə ɗəfa də ɗarɗar tayi ɓa.

²¹ An nədek anokumda əmpa na, nəŋgəl Maŋgəlva naw dəgəsawgən abokum gəm nəhəmgən viyit ɗiy diyɗa məɗɗaŋ mambraya, ya dəɗiyaŋ marava aka mambray də polkoyo gəm ɗarɗar net adaɗɗaŋgəŋ ɓa.