Yohanna I 5 - Alkawali Woiwoyi

¹ Nza ga gaiciya ge Yesu nu zhin Kristi, woi zhin Shekwoyi Nugun nu n ho Gniyi, agye ho zhin Shekwoyi ɓinu. Oza n wo ye n Dadayi, wo ye lo nu n wo Nugun yi.

² Ntu cenu fye ɓa kpe shi fye ye Shekwoyi aɓi n sun wato efye azaje n na amapwi dna n Dagayi, shi fye ye Shekwoyi fyei vi wo ɓo nsun nyi.

³ Shekwoyi yeye nwu ge ha zhin oɓo nwo ye, ɓehin-hin kwo to dnaɓon.

⁴ Gama Shekwoyi ʼɓi doho-dohoyi ɓami wa vi wo, woi gyi nasara n laifiyi, n na shakpe nukwoyi anyi nya yi, n wa kpema Kristi ntu ge wa bma wo zhin.

⁵ Ama nyikado ɓami wa sunkun wa gyi nasara n okun ye yi, to oza ga gaiciya nu ge, Kristi zhin. Shekwoyi Nugun nu ma?

^6-8 Yi kpelo ge - wo zhin wo Nugun nu, ntuge Shekwoyi ɓei ku da lonu n begye yi nkwo ɓei gmi n eshe, esa n na ɓei zhin Yesu baptisma, n esai n wo ɓei ye wa fi nyi. E, to ge esa n na ɓei zhin wo baptisma gmanyim, ama n esayi n wo ɓei ye wafi nyi. Zafun Gyi-gyi-yi gaiciyada vinya ɓei ku da lonu ce. Ntu cenu yi n na seidada yi lo ngun ata, Zafun Gyi-gyi-yi begye n yi abugbami, begye nkwo ɓei gmi n eshe, esa n na ɓei zhin wo baptisma nyi, n begyeyi kafin wofi, Ɓa ɓei da ɓo gmanyi nu, nge Yesu Kristi zhin Shekwoyi Nugun nu.

⁹ Yi zhin ya ga aza gaiciya n ɓa gmi seida n na awadaba nyi, ntu cenu yi ɓa mi ya ga oɓo gaiciya n Shekwoyiʼa da. Shekwoyi wo gna ge Yesu zhin owo Nugun nu.

¹⁰ Aza vinya n ɓa ga ɓeye gaiciya nɓa bugba, ɓa kpelo ge kwo zhin gaiciya nu. Zaho-zahoyi n wo to ga ɓeye gaiciyan wo yi Shekwoyi nu ge za kata. Ntuge wo ta ga gaiciya lo tu oɓo n Shekwoyi ku da n wo Nugun tukwon.

¹¹ Knido nu n Shekwoyi n kuda? Nge wo la wyewyeyi nyalo-nyalo nya gayi, wyewyeyi ye kwo dna lo n owo Nugun nu.

¹² Ntu cenu oza n wo n Shekwoyi Nugun yilo, wo n wye-wyeyi lo, oza n wo to n Nugun yi lon woto n wyewyeyi n lon.

¹³ Mi ka deye ga fye n fye ku gaiciya ga n Shekwoyi Nugun nyi, n na abai fya kpe ge fye n wyewyeyi nyalo-nyalo nya yi lo.

¹⁴ Yi kpelo lallei, nge woɓa wo yi, wa gayi nyaho-nyahoyi n ya nyawo n lodo n wo ɓeye yi.

¹⁵ N yi kpelo ge wo wo yilo, esa n ya daɓo n owoyi, yi gyi wo wye yi kpelo nu nge wo ɓa ga yi amsa.

¹⁶ Nha gye Yesu-viyi woi zhin laifi n kwo ta ɓe n efiyin, ha gyi Shekwoyi wye wa zhin wo gafara, Shekwoyi wa gawo wye-wyeyi, saidai woku laifi zhin nkwo kunce n efiyi. Ama laifi lo n kwo ɓe n efi yi nwo ku kwo nu zhin, apma to lo a zhin aduwan.

¹⁷ Ɓenukwoyi dohodohoyi zhin laifinu. Mita da alaifi fafayi nu ɓon, mi da laifinu ɓo n kwo ɓe nfi yi.

¹⁸ Oza to lo n wo la zhin Shekwoyi oɓi n wo ɓa gyi abye n laifi zhin, gama Kristi, Shekwoyi Nugun, wo yi shilo n kalayi, shetan ta mi wa to wo bwan.

¹⁹ Yi kpelo ge yi zhin Shekwoyi aɓi nu, anyi vinya n ɓa cenyi ɓafi n shetan sinta nu nwo ikoyi.

²⁰ Yi kpelo ge Kristi, Shekwoyi Nugun, nla ɓe wa bmayi zhin, yakpe, ya bwa Shekwoyi hinhin ye, Nsayiye yi filo n Shekwoyi ntuge yi fi lo n Yesu Kristi owo Nugun. Nwonu zhin Shekwoyi gaiciyada gmanyi, owonu zhin wyewyeyi nyalo-nyalo nya.

²¹ Omi aɓi, fye bui enya si n kwo ɓa gwo Shekwoyi aba dna nfye abugbami.