Yohanna I 3 - Alkawali Woiwoyi

¹ Fye gye shi eyi Dada eshe nya yeyi nsun, har woi ye ge a yi yi ge owo aɓi–gaiciyai nu yi zhin wo aɓinu, ama aza n mwa begye nɓa ta kpe Shekwoyi yen, ɓata kpe lo ge yi zhin owo aɓi nun,

² E, omi anugundo, yi zhin Shekwoyi aɓinu nsaiye, yi ta mi ya kpe enya ye nkwo ɓe lon, ama yi kpe lo ge, esa, n wa ɓe n cei yi ɓa wu ngye wo, ntuge yi ɓei gyewo shi wo wu.

³ Oza n wo ga ɓeye gaiciya wo ɓa shi wohin n gyi-gyi-yi, shi Kristi nwohin gyi-gyi-yi nyi.

⁴ Ama aza n ɓa gyi abye n laiti zhinyi, ɓa zhin Shekwoyi nuwunyi nu, gama ata zhin alaifi doho-dohoyi n Shekwoyi ɓeye yi nun.

⁵ Fyei kpe lo ge wo ɓei la ze zanyikwoci n na bai wa ku yi alaifi ya, woi to n laifi owohin nyan, wo to na Shekwoyi ɓeye zhin ɓo nsaho-sahoyi n, n zokwo doho-dohoyin,

⁶ Ntu cenu n yi wo vivi-wyi n woi, yi vi wo ɓo, yi ta gyi abye n laifi zhinyin, ama aza nɓa gyi abye n laifi zhin yi nyi, kwo kunce ɓa kpe ge, Ɓa zhin alaifi ntu ge ɓa to shin woye kpe nun, kwo ɓa to ze owo anyan.

⁷ O, Omi aɓi, fye toye zaha wa dna fye kwoce n, nfya zhin ɓemana n esai vinya, kwo wunu ge fye zhin aza manayi nu ngye wohin.

⁸ Ama n fya gyi abye n ɓenukwoyi zhinyi, kwo wunu ge fye zhin Shetan nyanu, oza n wo ɓei ya laifi zhin to wa shan ka nkwon, ama Shekwoyi Nugun ɓei ɓe ntuge wa wun shetan atnu-tnu ya nu.

⁹ Oza n na la wo ma dna n Shekwoyi aɓi wo ta gyi abye n laifi zhin yin, ntuge nsaiye Shekwoyi wye-wyeyi dnalo n wo, ntuce wo ta gyi abye n laifi zhin yin, ntuge ala wye-wyeyi woi-woyi ye ma dna nwo, kwoi wanwo shi, alawo shanma.

¹⁰ Nlonu yi ɓa mi ya wu oza n wo zhin Shekwoyi ɓi, n zayi n wo zhin shetan nya. Oza nwo sase dnalo n laifi to woi ye nwo azaje yin, wa wunu ge woto dnalo n Shekwoyi aɓin.

¹¹ Gama nabari n yi ɓei wo tunyi n kmisunyi, okwonu ge yi ye n na ajeyi.

¹² Yi to ku ze ngye Kayinu, nwo ɓei zhin shetan nya, wa wu owo mado nyin. Kninu ɓei zhin wa wu woa? Ntuge Kayinu ɓei zhin woi zhin ɓenukwoyi, wo ɓei n cei kpe n ge owo mado zan-zan ɓei gna wo nya bmiya.

¹³ Ntucenu ce to wo fye n, emi anugundo ndei anyi wun yi nun.

¹⁴ N ya ye n na a Yesu-viyi ajeyi kwa wunu ge alayi gni n na anapi, ai la wye wyeyi nyalo-nyalo nya gayi. Ama oza n wo taye n wo aje yin wo lo efi nyalo-nyalo nya.

¹⁵ Oza n wa wun owo Yesu-viyi do nu, wo zhin zawuyi nu. Fye kpelo ge oza to lo n wo wu oza nwo wye-wyeyi nyalonyalo nyayi lo-lo nwo min.

¹⁶ Yi kpelo ge ye-ye hin-hin kun n Kristi aba nu, ngye shi wa fi ntu nyi ɓo nyi, ntu cenu kwo kunce lo ya gayi awye-wyeyi ntu n yi a Yesu-viyi aje ɓo.

¹⁷ Ama ndei oza n wo zhin Yesu-viyi wo n na agyiwyeyi lo nwo ɓa sase n dagma, wa gye zado n na awyekwoyi to wa bmawo zhin, Shekwoyi ye-ye dnalo n wuna nu nwo miʼa?

¹⁸ Omi aɓi, yi fa ɓeda ɓo n gbeyi ge yi ye eyi azaje lo, yi ye ɓa cewo ya wu ɓa n yi aɓo zhin-zhin.

¹⁹ Nnavun yi ɓe kpe dei-dei n yi aɓezhin, nge yi malo n Shekwoyi bwa, nsai eyi abugba ɓe bwa lafiya, kwo esa n ya gni-agni zhin n Dagayi abye.

²⁰ Ama n yi n na abugba anukwoyi, kwa gnayi ge yi ku ɓenukwoyi zhin, Dagayi ɓa gna kwo wo, gama wo kpe ɓeye lo vinya n yi zhin.

²¹ Ama emi a nugundo ye-yeyi ndei eyi abugba gyi-gyi-yi lo, yi ɓa mi ya ɓe Dagayi aba n bugba kalayi n tna edna.

²² Ya bwa enya n yi nya, ntuge yi vi wo ɓo lo, yi zhin oɓo n wo ye.

²³ Enya nyi n Shekwoyi wa gna ge yi zhin, Yi ga gaiciya n Yesu Kristi owo Nugun eye, ya ye n na jeyi.

²⁴ Aza n ɓa zhin enya n Shekwoyi wa da ɓa sease lo fi n Shekwoyi owohin nɓa mi, Yi kpelo deye kwo zhin gaiciya nu, n tuge Zafun Gyi-gyi-yi n wa gayi nyi wo gna yi nlonu.