Yohanna I 2 - Alkawali Woiwoyi

¹ Omi aɓi, mi gna fye aɓo deye ntuge fya bui laifi si, ama nfya zhin laifi, oza lo n wo ɓa gyiwye ga fye n Dada aba. Ayi woye ge, Yesu Kristi oza n wo zhin ɓefyece yi, woi da Shekwoyi agma.

² Owo nu ɓei shin Shekwoyi minagyi n yi tukwo wa tu wohin, wa ga yi jedoɓe n Shekwoyi, owo nu zhinyi alaifi gafara, to ge eyi anya gmanyin ama har anyi nya vinya.

Gaiciya Ga Mwi-mwi

³ Yi ɓa kpe nwuna nu ge yi zhin owo anya nua? N ya shi yihin awye, yi zhin atna lo ya zhin oɓo n wo ye?

⁴ Ozaho ɓaci ge, “Mi zhin Yesu viyi nu, mi tu lo n zokwo mi-i lo eshe, mi zhin Kristi nyanu.” Ama nwo ta zhin oɓo lo n Kristi a gna won, wo zhin zakata nu.

⁵ Ama aza n ɓa zhin oɓo n Kristi a gna ɓa ge ɓa zhin, ɓa ɓa tumwi ɓa ye Shekwoyi ndudu, nlonu yi kpe kwo yi zhin a Yesu-viyi nu.

⁶ Oza n wo ci ge wo zhin Yesu-viyi nu, wo zan-zan shi Kristi ɓei zan.

⁷ Omi azaje, mi ta ka wyidna woiwoi nu ga fye fya shibwan, ama kwo-kwoyi nu nfye ɓei ncei shinsun tunyi n kmisunyi. Fye ku kwo shinwo.

⁸ Ama kwo zhin woi-woi nu, kwoi zhin fye apma shi kwo ɓei zhin Kristi nyi, n yaa shi wyidna ye bwa, fye ye n na ajei, wyegma n yi a wye-wyeyi ɓa busi, Kristi buzangna, wye-wyeyi nya ɓa bmiyana fi n yi mi.

⁹ Oza n wa ci ge wo zan-zan dna lo n Kristi buzangna, ama woi wun owo zado nu, woye dna lo n wyegmaa.

¹⁰ Ama zaho-zahoyi n wo ye nwo zadoyi, wo zan-zan dna lo n buzangna, woi gyewo zokwo ntna bonyi-ce dna n wyegma ko laifi.

¹¹ Gama oza nwo ta ye nwo zadoyin, woye dnalo n wyegma zafun nya, to woi kpe aba nwo lon, gama wyegma n ku wo bwi awye to woi gye wyebam.

¹² Mi ka aɓeye ga fye nu efye vinya, emi aɓi, gama aku fye a laifi zhin gafara dna n Yesu eyi Gniyi.

¹³ Mi gna fye aɓeye azakwoyi ntuge fye kpe Kristi ye lo. Oza n wo wyewyeyi tunyi n Kmisunyi. Efye aɓi anuyi, mi daɓo n fyei, ntuge fye ku nasara gyi n Shetan tukwo, mika ga gye aɓi anuyi n abi anyikwoyi, ntuge fye ku tumwi ce, fya kpe Shekwoyi eyi Dada ye.

Fye To Ye Anyim

¹⁴ Ntucenu, mi daɓo n fyei a dada n fye kpe Shekwoyi nyalo-nyalo nya ye lo nyi, nfyei abi-anuyi nfye na kalayi lo n Shekwoyi Ɓeda yi nfye abugba nyi, fyei ku nasara gyi n Shetan yi.

¹⁵ Fye ku fa anyi ye ɓo, na nya yi n anyi ga fye vinya, gama n fye ye anya ye, fye wunu ge fye ta ye Shekwoyi lon.

¹⁶ Gama anyi nya ye vinya, anyikwo shakpe aɓo awyeda, anya si n ɓa lo ha wye, ntukwo mwayi n kwo ɓe n nyabwa aba nyi, aɓeye vinya to zhin Shekwoyi nya nun. Ɓa kun n anyi nukwoyi ye nu.

¹⁷ Anyi ye duyalo, nna anya nukwoyi yei vinya ɓa ɓeilo n gnisun nɓai, ama oza n wa gyi abye n Shekwoyi ɓeye-zhinyi wo ɓa bwa wye-wyeyi nyalo-nyalo nya.

¹⁸ Emi aɓi, anyi ye esa kmaknayi nla ɓe, Fye ku Kristi Nuɓayi ɓo wo, oza n wo zhin gaba n Kristi nyin-saiye azahi pya n mwa begye nku ɓe, deye wuyi ge anyi zo sa la ga si.

¹⁹ Aza n ɓa zhin gaba n Kristi yi nyi, ɓei fi n yi aduwa nyakun, ama ɓa to ɓei kunsun n yin to ɓaye kun, esa nɓa ɓei fa yi nyi kwo ku wuyi ɓa to ɓei zhin eyi anya num.

²⁰ Ama fye to wu lo nlonun, gama Zafun Gyi-gyi-yi la ɓe nfye tukwo, fyei kpe gaiciya yelo.

²¹ Ntu cenu, mi taka fye ngye aza nu, n ɓa cei pma ɓa kpe gaiciya yen. Ama mi pma fye gna nu, ngye aza n ɓa kpe gaiciya ye, n na akatayi.

²² Nyikadonu zhin akata esua? Oza n wo ci ge Yesu to zhin Kristi nun. Ozahi pya zhin Kristi nuɓayi nu, ntuge wo to ga Shekwoyi gaiciya n wo Nugun yin.

²³ Gama oza nwo ta ga Kristi Shekwoyi Nugun gaiciyan, wo ta bwa Shekwoyi Dadan, ama oza nwo n Kristi Shekwoyi Nugun yi lo, wo n Shekwoyi Dada yi lo.

²⁴ Ntucenu fye gyi abye n gaiciya gai n nya n na ku wu fye, tunyi n sapa. Nfya zhin lonu fye ɓa bwa jedoɓe n Shekwoyi n owo Nugunyi.

²⁵ Nwohin tukwo wo ku deye alkawali zhin yi wato wye-wyeyi nyalo-nyalo nya.

²⁶ Omi ɓeda tu n Kristi nuɓai ɓo, mi da aza nu ɓo n ɓa ɓa ye ɓa bwi fye awye, ɓa dna fye n zokwo kasa.

²⁷ Ama fye la Zafun Gyi-gyi-yi gwo, wo dnalo n fyemi, n fya bugba mi, nna bai n fye ta sun nzaho apmai wa wu fye nyahon n kwo bmiyan. Gama wo wu fye anya vinya, owo nu zhin Gaiciya, ntu cenu, shi wo ku da, tilas fye sase fi n Kristi, to fya shan ka n won.

²⁸ Nsaiye emi aɓi, fye ku fi n zumunta agmada n Dagayi n na bai n wa ɓe fye ku kpe nge ɓeho to lon, vinyikwo to ɓei wo fye, fyei ta n na avun yin esa n wa ɓe n cei n.

²⁹ Shi yi kpelo ge Shekwoyi zhin oza manayi nu, woi zhin ɓemana n esai vinya, yi ɓa mi ya ci ge, aza nɓa zhin ɓe mana, ɓa zhin owo aɓinu.